鬼殲: 師父川
太陽起身無耐，隔離洗車屋準備打開鐵閘。我依然等緊眼前果間鋪。識得朋友住附近，但係佢地冇一個對眼好似我咁感嘅。仲記得老豆個眼神係非常之認真，所以我選擇聽佢講。
再等左一陣，我見到一個約米七，同我一樣廿幾歲嘅師父行過嚟，佢開左栢昹3座地下車房鐵閘個鎖，將鐵閘升高，洗車屋內部嘅設備出現喺我眼前。
「唔該，你係咪負責呢個車房架？」
我行過去問佢。
「你想洗車唔該電話預約。」
佢咁樣同我講，語氣有啲串。
「我老豆比人殺左！」
「果邊系差館，你去搵差佬啦。」
個師父已經開始執緊嘢，好唔耐煩感同我講。
「我老豆叫洪少全！」
本身想搏下佢知道d嘢，點知個師父聽到老豆個名即刻停左手，望住我。我係首次見到佢對眼，正常黑眼睛，但係壓迫感仲強過我老豆。
「我點知你係咪佢個仔？」
我將我手上唯一兩張符咒攞出嚟，俾佢望兩望。希望佢帶我見呢度嘅法師或者道士。佢問都唔問一手搶左去，對眼好認真咁望，好似想核實符紙上嘅紅色符號。佢將個兩個符放系自己工作枱面，然後轉過身同我講。
「d符係我俾佢嘅。」
果刻我先知道佢系老豆要我搵嘅人。
佢叫阿川，花名肥川，但佢一d都唔肥。
佢好快就同老細請左假，我都照樣。佢俾左自己件衫我換，自己著住公司後備制服，然後帶我去隔離茶餐廳請我食早餐，我先至安定落黎。
佢想知道成件事嘅來龍去脈，我就講左班草猛襲擊條村嘅事俾佢聽。我問佢點樣救返自己條女，佢話佢有方法，要我帶佢去自己條村先，我就同意左。
返到圍村，已經有一大批差佬到場。有居民聲稱琴晚d狗猛咁吠，有幾戶嘅狗唔知點解斷左氣。有啲貨物升左上半空消失咗，又有人好似俾鬼撞開，但死嘅只有我老豆。
琴晚走左冇耐，但差佬已經到場。救護車已經一早送走傷者。但佢地搞左好耐都唔明琴晚發生咩事。
有個人本身同差佬爭執緊，認得我係老豆個仔，指住我話我一定見到啲嘢。班差佬就帶左我上車。本身同我一齊嘅師父肥川就避開左人群。
***
本身開緊工，有條友就嚟話自己系洪哥個仔，又話佢比人殺左，我跟佢去望望，點知真係洪哥條村。佢個仔英文叫Jimmy，雖然果日個碌系便服，但應該系啲斯文白領，我好難想像佢點樣用棍打死班蟲妖，但我見到啲圍村人指住佢，就更加相信洪哥系佢老豆。
趁Jimmy比班差佬帶走，我就同另一d圍村人講系洪哥叫我嚟裝修。佢地同我講洪哥琴晚已經死左，我叫佢地帶我去確認下，佢哋見我著住制服就帶左過去。
我一入村就帶返副昔望鏡，行家叫佢昔睇鏡，外貌系一副眼鏡，陰陽眼人士帶左可以擴大靈界系人間嘅痕跡。
觀察一下果班村民，大多數都陣係識得拜神燒乳豬，冇人有陰陽眼，都無人真係識得開壇作真法，更加唔洗講點樣對付班蟲妖。
佢哋知道洪哥死左之後，好多都話移民。陰間嘅嘢，官府唔認，村民都控制唔到，比著我唔識都會走。
未識法術之前，我跟過洪哥學嘢，包括裝修。呢個恩我一定會報，但應該唔喺報系佢本人身上啦。我到左洪哥遇害現場，透過副鏡見到越嚟越多痕跡，佢地同大草猛搏鬥，為左救返Jimmy女朋友，一刀飛向半空捉住女仔嘅大飛黃，就好似Jimmy所講感，另一隻大草猛下顎咬住佢個魄體，然後咬斷左頸部，斷左佢氣路。
人有三魂七魄，死後魄散魂先會升天。陰間鬼妖要傷人除非高道行先會連肉身都影響到，一般都系由人嘅「魄體」入手。相信洪哥嘅軀體已經系停屍間，應該唔會見到任何損傷，但魄體嘅頸位就比妖怪下顎整斷左，然後散落系土。
我系班村民面前搞下個電箱，佢地仲未知我著緊果件系洗車制服。見我好似做得幾專業，佢地就返左企屋。成條村無人認得已經大過左嘅我。
「入呢圍村做咩呀？川仔。」
聽到洪哥把聲，佢仲未升上去。我望住隔離，見到佢攞住隻橙肉，另一隻手攞住幾億冥紙。
「過呢拜你呀！」
「唔洗拜啦，我系村大L把人請我食嘢。你不如睇住我個仔好過啦！」
「Dllm，你個仔連殺你果隻叫咩都叫錯，你叫我點睇住佢呀？」
「你咪教下佢先攞，我得一粒仔同一個新抱喳！」
講到「新抱」兩個字，感受到洪哥語調中嘅殺氣，我即刻醒水。
「喂！感你知唔知d大飛黃帶走佢飛左去邊個方向呀？」
洪哥指住女事主經佢屋企果條窄路，相信帶左佢去另一個山頭。大飛黃唔單止識飛同力壯過大草猛，佢地系陰間出名性慾旺盛，去到邊搞到邊，正常系唔去出現系南面鄉下地方。
我系袋入面攞左粒橙味嘅定魂丸，交系洪哥食完橙嘅手掌上。
「食左佢，可以耐d先上去，但記得填返表。」
「系唔系寫你個全名呀？」
「你唔好玩呀！我隱居緊架。」
地有陰間，天有仙界，亡靈當然要跟世上嘅法道。
「你，你，你…寫阿桂個名啦！」
「你條仆街仔又要桂仔執手尾。」
洪哥指住我，陰陰嘴笑住講。
「我已經幫到呢度啦，剩低靠你啦。」
見完佢最後一面就走人。我令到佢無咁快升天，同埋可以四圍走，佢有足夠時間用魂體飛去搵佢新抱。以洪哥嘅道行，應該死左都可以帶多幾隻升天。
幫人搵新抱事小，我仲有件事唔明，系洪哥魂體訓緊時段發生嘅，我一定要親口問Jimmy。