我與家姐的互相育成遊戲: 第四章 互動的機會

呢個遊戲，極其簡陋。

一打開，背景就係家姐既自拍照，畫面中有個卡通女孩，代表住家姐。左右兩側有兩條bar，左邊紅色既，代表心情。右邊藍色既，代表健康。

目前家姐心情同健康都填滿左bar既八成左右，代表家姐衣家心情唔錯，同埋都幾健康。

“哇，你紅色果欄就爆，紅色代表心情？你好開心咩？”家姐用佢膊頭撞一撞我，笑嘻嘻咁。

“準唔準架。。。頭先就咁掃描一下我地個頭就可以知道我地既心情同健康咩？有無咁勁啊？”



但老老柒柒，我衣家既心情真係相當之唔錯。

“唔知呢。。。喂，有日任務做架喎。每日呵護(0／3)，即係點？要點呵護法。。。乞痴！”

由於我間房既冷氣關係，家姐稍為著涼。

“下，我點知。”我反手拎起搖控，較高啲溫度。

就係呢個時候，我手機震一下，我低頭一望，每日呵護已經變成(1／3)。



“哇，點解？就係因為我較高左溫度？兒唔兒戲啲？但呢個app點知？咁高科技？”

我不禁問出一連串問題。

事實証明，真係咁兒戲， 經過我地測試，好簡單咁為對方斟水，遞紙巾，問候一句凍唔凍，都已經可以成功得分。所以，我同家姐好快就完成左呢個日任。

“下。。。咁。。。有咩咁好玩，唔駛玩呢隻game都得啦。。。”我忍唔住吐槽。

“真係？你平時有鬼幫我斟過水咩。睇下仲有啲咩玩先。。。啊有啦，呢度有個特別任務，睇下先。。。任務內容係要提升對象的肌肉強度。姐係我要督促你做運動增肌？”家姐扭頭望向我。



好近。。。我就頂唔順。

”我果個係。。。提升對象的柔韌性，哦，姐係要幫你拉鬆啲筋啦，下化。”

我忍住唔同家姐對望，如果唔係，我驚我會咀落去。

“但係。。。完成左有啲咩用？”家姐問左個好問題。

“呢到有個遊戲說明制，睇下先。。。佢話任務完成越多，可以解鎖越多功能。”我指一指手機。

”唔理啦！總之我要幫你地獄式訓練！好！夜啦，今日俾你準備一下先。聽日開始！”家姐講完，興緻高漲咁落牀，然後就走左去。

我並唔抗拒，反而好期待，呢隻game，睇黎可以拉近我同家姐既關係，增加我地互動既機會，實在係一隻好game。

胡思亂想一番之後，我都開始攰攰地，打開隻game，望一望家姐頭先既自拍，無幾耐我都熄燈訓教。