我哋間學校分咗做四個社,好死唔死,揀社嗰日唔得閒,學校偏左是但一個俾我

好好彩咁,冇一個friend同我同社

係頭一個月,我哋學校都會搞過四社迎新,即係叫晒全校人分開四個社玩遊戲

班主任節之後就要去集合,

同學A : 「估唔到你都係黃社!」



同學B :「又咁啱嘅,我都係!」

依兩個係我同班同學,叫做有偈傾下,好彩未死晒

去到又係玩下遊戲傾下計咁,咁就比學校Hea左一日

第二日又係要返學嘅日子

嗰一日就係我哋班俾訓導捉嘅第一次



唔記得咗講,我哋班F.1嘅時候係出名比訓導捉得最多嘅其中一班

話說嗰日

因為我哋係低form,所以一定要留喺課室食飯

食完飯梗係得班friend一齊周圍玩吓㗎啦

哈士奇就過咗嚟搵我吹水



就俾佢見到呀欣枱頭有枝烏龍茶

「喂,有冇興趣玩吓呀欣?」

「你又想點呀?」

「無~~」

「佢枱頭咪有枝烏龍茶嘅,有冇興趣唔小心咁搖一搖佢?」

講完之後,佢就攞咗烏龍茶,係咁搖

好似幾得意喎

佢搖完,咁我咪接手囉



跟住又有幾個friend過嚟,見到我哋喺度玩緊

「喂,有乜咁好玩?」

「我又要搖!」

「我又搖!」

「唔爭在多一個啦!」

「有好嘢玩竟然唔尋埋我?」

就係咁,成五六條友喺度圍埋輪流搖枝烏龍茶



唔講仲以為玩緊生命麵包

枝烏龍茶俾我哋搖到出晒泡

係呢個時候,呀欣同佢嘅朋友就返咗嚟,見到佢枝烏龍茶俾我哋搞成咁

咁就梗係叫我哋賠錢啦

喺起承轉合入邊,起同承就發生咗,而家就到咗轉喇

咁我哋五六條友,一支烏龍茶油淨係要$6$7

每人都係賠一蚊姐

咁我哋梗係玩嘢啦



雖然就有啲都正正常常咁俾一半佢就算

有啲就俾$100佢找,有啲就俾10個一毫子佢

好死唔死,出面有個風紀經過,以為我哋賭緊錢

就話咗比當值老師聽,咁啱嗰日嘅當值老師又咁啱得咁橋係全校供應最惡嘅女訓導

咁佢走入嚟問我哋邊個做

「喂,你哋頭先係咪有人賭緊錢,學校係唔容許賭博嘅地方,頭先賭錢嗰幾個人同我出嚟」

我哋就咁樣俾佢搞到一頭霧水



我哋冇賭錢,咁梗係唔知佢講緊啲咩,仲繼續做自己嘢

「好,我數三聲,再冇人應嘅話,今日放學就全部人留低寫口供紙!」


我哋放學嗰陣時嘅班主任節,佢就入咗嚟,揸住一疊口供紙,全班都要寫低今個午息做咗啲咩
已有 0 人追稿