(紙言版後記:估唔到個故有十二萬字…亦都喺三年之後校對好,而家睇返感覺幾有趣,未必寫得返當年嘅感覺,而唔使指意我亦都轉咗做唔使指擬,以下嘅後記係書於三年前,大家唔使太認真,睇過就可以算,當年嘅回覆挑戰其實早就達成咗,至於有無機會續寫就睇緣份,由於我唔肯定完未,所以暫且保留未完結個tag,鍾意呢個故嘅人,不論新知舊客,不妨留言分享下閣下嘅睇法,我一日在生都會檢查回覆嘅,感謝各位貴客支持!估唔到呢篇文成為咗我喺紙言第一篇貼完嘅長文,其他嘅請耐心等待,緣份到了自會上載。)


首先,我諗大家一定想問個故事係咪已經完晒,嗯,即係咁,我覺得關於人嘅感情故事,主角一日未死咁就一日都未完嘅,唔通結婚真係愛情嘅墳墓嚟咩,老實講,我腦入面一早就有多大概七至八節嘅故事,包括佢哋上咗大學之後會點,但其實係咪一定要寫晒出嚟呢?我諗真係肯睇咁長篇嘅讀者都一定會自我腦補,又例如我今次喺女角描寫度都留白咗少少,等你哋可以腦補返佢哋嘅外表,至於我會唔會寫,就睇下時機啦…

第二,我真係想寫短文,點解會變咗廿三節乘幾千字出嚟…有無七萬字?真係寫到攤喺度…

第三,粵文其實好難寫,因為無標準,自古中文好多通假,跟本無所謂絕對啱嘅字,我用嘅係中間落脈,例如䟴腳,用un/震/銀/印,大家都知係同音借代,咁我就索性盡可能搵本字喇,如果例如閉翳呢啲用到字典都收錄埋嘅就從俗算喇,所以,爾個/渠等/其等/一尐(其實錯用)/噉樣/而今/毋通,呢啲字我唔會用,唔係我唔識,而係我都要方便大家睇,廣州/粵/港/嶺南文化係一個活嘅文化,唔係考古學,唔嘅啲哋呢,門氏五虎將,係我哋嘅偉大發明,點解唔用?不過成篇文我無proof read㗎,錯字一定大把,搵到可話我知,因為我有時間都嘥咗喺例如成粒鐘喺(唔使指意)度,旨意?指儗?旨懿?最後我揀史記(指意)…

第四,以前未完嘅會唔會寫返?其實睇心情,同埋唔知有幾多人想睇,身體檢查呢篇嘢話我知寫短文c/p值高好多,不過我都想大抖先,大家可能要餓下。反正現今論壇文化係一落千丈,如果返返去飛仔文年代,我諗我會寫得有火好多…





第五,好不幸地呢篇嘢我可能要譯返做語體文…點解?因為有個台妹可能想睇,要譯幾萬字廣東話,想死…

後記寫咁長做乜?因為唔覺得有人會睇囉!大家喺下面回覆『求家文夢蝶巧玲三人後續』,集齊十五個,我應該會認真寫埋未寫嘅(雖然我覺得呢個結局已足夠),唔使開分身回,我淨喺接受老帳號嘅回覆。

係咁先,下回再見:p
已有 0 人追稿