從我開車撞死她的那刻開始: 第十一章

　　無可奈何之下，我讓Jenny睡在在妹妹的房間。在妹妹死後，我基本上都很少進去，裡而有不少東西都封塵了，不過Jenny好像沒有什麼意見。

一晚過後，我就要跟她一起上班了。

不過，在那之前，我總得交代一下有關Jenny的事。

在答應了讓她住下來後，我便問她，吸血鬼是怎樣的種族，因為感覺上，她跟我所認知的吸血鬼有不少出入。

「妳會唔會話怕太陽，隨身收起唔少吸血蝙蝠，夜晚要訓棺材咁樣架？」



「唔會呀。」Jenny歪著頭。「其實我地既身體構造同一般人冇咩分別，如果唔係，我都唔會俾車車死啦。最多，咪就係唔會變老，死左會自動復活，同間唔中要吸下血囉。」

是沒想像中那麼誇張，但仍是難以置信。

她補充：「呃。我知道有好多關於吸血鬼既傳說同故仔，通常佢地被描述得十惡不赦，但係你可以放心，我地呢，係一個好善良既種族，如非必要係唔會傷害人既。」

「妳講野呀？頭先妳都話會吸人血啦。」

「唉，對上一次吸血呢，已經係幾百年前既事啦……我都話左只要有西瓜汁，我就冇必要去吸人血。」



「幾百年？咁妳咪……」我瞪眼。

「有咩咁出奇？我咁既體質，長命少少都好正常呀。」她扁嘴，好像對活得久一事不太高興。「總之，如果唔想出事，記得買多啲紫色西瓜汁俾我。」

說著說著，Jenny又拿起了一包紫色西瓜汁。

喂。她已經把這裡當成自己的家了。

「咁我又想問，點解歷史從來冇記載過你地既事？冇理由，冇人發現過你地既存在架。」



「因為我地夠低調囉。好似我自殺都係專揀冇人會出現既地方，不過估唔到會係公路度撞到你之嘛。」Jenny突然眼珠一轉，又說：「同埋再補充一下啦，以我既認知，呢個世界應該淨返我一個吸血鬼。」

「吓？冇理由呀……妳係不死身喎，咁妳既同類應該一樣，點可能會滅絕呀。」

「要講起黎一匹布咁長喎。簡單咁講，就係我地呢個種族既繁衍次數只有六百六十六次，而我就係呢點血脈既最後一人。只要我死埋，吸血鬼，就正式從呢個世界消失。」

聽到她這樣，一個念頭突然閃出。

「等陣先。頭先妳話妳吸過人血，印象中，俾吸血鬼吸過血既人都會變埋做吸血鬼，咁會唔會……」

未待我說完，她就打斷我：「叻仔喎，其實你冇講錯。俾吸血鬼吸左血既人，都會變做吸血鬼，但係我淨係會吸動物同屍體既血咋，所以放心啦。」

「哇。咁即係話，妳隨時可以將我變做吸血鬼？」

我重視生命，但我沒想過活那麼久，而且要我每天喝紫色西瓜汁，大概會吃不消吧。



始終，生老病死才是大自然的法則。

「放心，唔會咁做，因為我知道長生不死既痛苦。」

無法理解她的價值觀，不過也罷了。我輕咳了一下，接下來，我要問她我目前最關心的事。

「好喇，妳既背景我大概知道，我想知既係，照呢種情況發展，我收留妳會唔會有咩野災難？」

「吓？我唔係好明你既意思。」

「其實，妳會唔會俾吸血鬼獵人追殺？又或者，其實你同其他超自然種族有咩派系鬥爭？」

雖然看來不像，但我其實是一個很喜歡看書和看電影的人。在我看過所有以吸血鬼為主題的作品裡，都有一個共通點，就是一但主角跟吸血鬼扯上關係，就會被捲入大大小小的戰鬥，生命無時無刻受到威脅。



他們就是麻煩的代名詞，而我這樣的一介凡人，是不可能周旋於這些奇異生物的鬥爭之中。

聽到我這樣說，Jenny突然爆笑起來：「啊哈哈哈！你會唔會睇戲睇上腦呀？冇。絕對冇。你可以放一百二十萬個心！」

「……真係？」我謹慎地問。

「真架！你諗下啦！世上除左你之外，根本冇人知道吸血鬼真係存在，咁仲點會有人想獵我地頭？而且，我真係諗唔到仲有好似我地咁既超現實種族存在囉。」

也對。地球上有她一個這樣匪夷所思的生物，就已經足夠了。簡單來說，這個人除了會復活和需要喝西瓜汁外，就跟常人沒什麼分別，而我大概也不需擔心會被捲入恐怖襲擊，唯一要提防的，就只有作為同居者的她。

她說，會跟我同居三個月，不論是工作還是在家也會死纏著我，直到我肯跟她做愛。

這到底是什麼發展呢。

要不要上高登求救？如果開帖說「有一個好索既鬼妹話要同我一齊住，直到我肯同佢做愛」，大概只會被巴打當成甜故，然後不停被要求加甜吧。



加甜？我不想嗎？我想得要死啊。可是，我做了愛的後果，又有誰跟我承擔了？

唉。