從我開車撞死她的那刻開始: 第三十三章
符見藥，在某天開始神不守舍。
那一天，八婆珍依舊穿著內衣到處跑，而且喝完紫色西瓜汁後只是隨便把盒子丟在一邊，但是，符見藥卻沒有責備八婆珍，只是坐在一旁發呆。
雖然我也不喜歡八婆珍的隨便，但既然符見藥沒有出聲，我也不方便多說什麼了。
我以為那只是符見藥偶而不適所以沒有太放在心裡。畢竟她才剛上中三，應該是學習上衝刺的時刻，本來要照顧弟弟的她，最近又自告奮勇常常替我整理房間，所以才會沒精打采吧。
看到她這副模樣，我問她：「符妹呀，妳面色睇落好似唔係太好喎。如果妳攰就早啲返去休息啦。」
「吓。」符見藥先是一愕，不過很快就強裝振定，說：「你……講咩呀！我邊忽似攰呀！」
「真係唔駛勉強喎。做哂暑期作業未呀。中三好緊要架。」
符見藥「哼」了一聲交疊手臂，說：「我駛乜你擔心呀，一早就已經做哂啦。而且，唔好話中三，DSE既題目基本上都難唔到我。」
「我知妳係資優生，但係得閒就放鬆下啦。」
「得啦。我有分數。」符見藥站了起來伸了懶腰，然後用力地擦拭書架，而書架在抹拭之下失去了灰塵的痕跡。然後，她徐徐說道：「唔該你呀，車仔。」
符見藥的背影看起來有點纖細，彷彿跟我的妹妹重疊了起來。她跟我妹妹一樣愛逞強，有時喜歡強人所難，不過經常為人著想，連表達謝意也是那副模樣。
想著想著，嘴角帶著一絲笑意。
「喂，車仔，做咩係度傻笑呀。」八婆珍不知從何時爬到我的身後，如此跟我說。
「關妳鬼事咩。」
「點呀，依家先覺得符妹人好啦咩，想對佢落手呀？」
八婆珍用手肘撞我的側腹，我以手刀劈她的頭回應。
「痴線啦妳。」
「哇……駛乜咁大力打人呀。」她摸住頭鼓起腮說，看起來有點可愛。「冇呀……其實我睇得出，佢好著緊你架。我諗唔多唔少都對你有啲好感掛。」
「咪傻啦，人地先十四歲，我當人地係妹妹咋。而且跟我啲咁既廢青，注定一世冇運。」
「又好似係喎。」八婆珍眼珠子一轉。「不過愛情既野話唔埋既。第時我走左，試下追下人啦。」
麻煩的傢伙就是喜歡加油添醋。
「費事同妳講。」
這天平凡的過去，我以為符見藥隔天就會打起精神來，繼續盡責地看管八婆珍，不過，隔天她沒有來，然後一個星期轉眼過去，她還是沒有跟我聯絡。
下班後，我和八婆珍並排步行回家時，她突然如此問我：「車仔呀，符妹呢排做咩呀，好似好耐冇見佢啦喎。」
「佢可能有啲忙掛……」
「係呀？」
「而且妳問黎做咩呀，佢唔係度妳唔係仲開心咩，咁樣咪少個人話妳囉。」
「緊係唔係啦，其實我幾鐘意佢架。我係特登做啲野激嬲佢，因為我覺得佢咁真心，好好玩……」
「睇唔出喎。」
我禁不住揶揄她，因為要不是符見藥在，我有幾次差點便被八婆珍強暴了。
那才不是逗人家玩的程度的惡作劇呀。
八婆珍對我吐了吐舌頭，然後說：「唔好講呢啲野住啦。我係想問，你覺唔覺得符妹好似有點怪怪地？佢果陣時真係好冇精神呀，連黑眼圈都出埋黎啦。」
就算是八婆珍，也發覺到符見藥的不妥嗎。
「我都覺，不過佢可能有啲事要忙掛。」
「咁佢幾時搞掂手頭上既野？」
「我點知呀……」
「不如你打個電話畀佢，問下佢幾時再上黎啦！」
「妳都傻既。話哂佢幫我執屋都係佢自發性要幫我，叫佢上黎點好意思呀。」
「嗱，車仔，你咁就唔岩啦。」八婆珍呶起嘴，發出了「嘖嘖」的怪聲。「其實呢，我覺得你點都應該關心下佢……人地明明鐘意你，你點都要有啲表示啦。」
「痴線啦。又亂講野……」
我裝模作樣的想要拍打八婆珍的腦袋，不過她笑嘻嘻的躲開了，接著，她一反常態地，一本正經地說：「哈哈，不過講笑還講笑，你點都應該打個電話……問下佢有咩需要幫手？」
「吓？」
「我既直覺話畀我知架。佢好似有啲麻煩。」
她說得有道理，那時候的符見藥的確看來有點憔悴。於是，我回家後決定要做的第一件事，就是打電話給她。