《彌留喺人間嘅罪名》: 《彌留喺人間嘅罪名》 - 《最後一幕 夙願》

彌留喺人間嘅罪名 - 《最後一幕 夙願》
「唔好意思啊！閻王君，其實呢個老鬼陽壽已盡架喇，所以我哋枉死城已經困佢唔住！
不過唔知佢做乜鬼噉心急走左過嚟審判殿，之前還押喺枉死城同佢保管嘅冥物都未簽收好。」
原來老鬼嘅家人燒左好多金銀衣紙比佢，但係佢就因為陽壽未盡而收唔倒，直到依一刻。

「死得心急過人都算啦！依尐程序死人冧樓都唔錯得架嗎！
麻煩你同我簽收點算清楚先啦，唔係冥通財政部又話我哋條數唔啱，差左幾個零架喇！
你都知我哋尐冥鈔鬼死咁多個零架啦！」老鬼逐樣逐咁簽收所有屬於佢嘅冥物，當佢簽收晒嘅時候，佢就唔再係死窮鬼喇！

但佢心入面仍有一絲嘅空虛想彌留翻去人間見見佢嘅妻兒子女，直至佢簽收埋最後呢一件 - 




一本寫滿女兒對父親、妻子對丈夫永遠懷念嘅相簿。佢揭開相簿細心噉睇，心中默念每一字一句，
當佢揭到去最後一頁相，睇倒佢家人寫比佢嘅最後一句話嘅時候，佢終於感覺倒咩叫老懷安慰！
「老公，您放心去啦！我同啊女都生活得好好，佢下年大學畢業喇，上個月仲帶左男朋友翻黎食飯，
個樣同您後生果時都有幾分相似，算係有我一半咁有眼光啦！」老鬼睇到呢度已經眼濕濕，佢嘗試強忍淚水睇埋落去。

「您啊！正一大傻瓜嚟！為左可以維持我哋嘅生活質素，公司減薪唔同我哋講，裁員又瞞住我哋，
仲要借咁多大耳窿錢都夠膽死嘅！我本來真係好憎你架，大家一家人嚟架嗎！點解你要將所有野揹晒上身先得架？」
老鬼覺得呢封信就好似係佢老婆係佢身邊讀比佢聽咁忍唔住喊左出黎。

「唔知你記唔記得呢？當時你比丫女發現左你公事包暗格果份保險，如果係比我發現你實比你個傻樣出賣晒啦！




好地地點會背住我哋偷偷地買咁大份保險丫，可惜丫女發現得太遲，又傻傻噉信晒你。不過託賴，亦都因為噉，所有嘅債務都還清晒喇！」
老鬼睇完呢封信之後，認為生前嘅事佢已經處理好曬，所以再冇喺審判殿裡面發顛發狂，默默噉走番入陰暗嘅角落，靜侯閻羅王發落。

而喺側面睇倒晒呢幕嘅三位年青人亦似乎特然明白到被閻羅王判定為「青春」呢個罪名嘅真正意圖，
簡單嚟講，青春罪只不過係一個籍口，比佢地可以彌留翻去人間道完成最後嘅心願。

但係，唔通佢哋嘅心願就係噉簡單，只要有靈魂彌留係人間就可以圓夢咩？
定係有尐嘢始終需要血肉之軀先可以完成得倒呢？

可能，生命可貴嘅地方就係呢度！





FB/IG: Sylvansstory
https://www.facebook.com/sylvansstory/
https://www.instagram.com/sylvansstory/