[愛情有甜]《當你識咗對雙胞胎》: 第三章

第三章
 
「你想聽日放工之後過屯門，帶我見下你爸爸媽媽順便食餐飯？」
喺阿廣整理緊檯面嘅學生功課同時，順恩走到阿廣身邊提出「見家長」。
於是阿廣隨手拎起條橡筋，將檯面嘅功課綁埋一齊。
之後就轉身望向順恩：「反正聽晚無嘢做，見下Uncle、Auntie都好啊。」
「唔只我爸爸媽媽喎。」
「嗯？仲有其他人？」阿廣嘅表情立即好奇起來。
而順恩只喺「嗯」咗一陣，就答：「仲有……我家姐。」
「家姐？」


「喺，之前無同你提過，我其實仲有個家姐。」
只喺順恩講完呢番說話嘅同時，阿廣對面檯嘅大媽同事忍唔住插嘴：
「哦！小情侶原來有隱瞞！」
搞到場面一度有少少尷尬起來。
於是阿廣都即刻開口化解：「我無問過所以佢咪無講，無乜問題啊！」
「呵呵，你兩個小情侶真喺恩愛。」大媽同事講完之後，就一邊笑笑口一邊拎住堆簿離開咗個位。
睇住大媽離開咗之後，順恩都有少少唔好意思咁捏住自己條裙講：
「對唔住啊，之前一直都無同講過我有個家姐。」
「唔緊要啦，家姐咋嘛，又唔喺咩大件事。」
阿廣隨即就露出微笑，但可惜依家身在學校，唔可以當眾撫摸對方個頭作安慰。


不過，順恩就似乎仲有啲嘢想講咁，但喺當佢想開口嗰陣，中文科主任卻突然大叫阿廣嗰名，叫佢過去同其他中文老師共備。
於是順恩都只好示意阿廣盡快過去主任，晏啲先再傾。
然而，呢個「晏啲傾」一晏就晏到第二日放工之後，二人準備出發去屯門時先再提起……
------------------------------------- 

嚟到第二日二人放工個陣，順恩向阿廣提議想翻屋企換一換衫先。
本來阿廣都有啲不解，點解唔直接著住同一套衫過去。
但喺順恩就以「著靚啲」嘅理由，講掂阿廣比佢翻去換過套衫。
而喺等待對方換衫同時，阿廣都翻咗入自己屋企睇一睇啱先喺信箱攞嘅信。
「哇，下個月對閘又轉密碼啦，睇睇會轉咩密碼先……1、3、1、4。」


阿廣讀完個密碼後，立即反咗個白眼：「邊個屎忽鬼諗架！」
接著，正當佢打算開下一封信嘅時候，鐵閘外傳嚟順恩把聲：
「阿廣，我換好咗衫啦！」
於是阿廣隨手就將啲信扔埋一邊，拎起件外套同準備送比順恩屋企人嘅禮物，隨後就打開度閘走出門口。
但喺當見到順恩嘅一刻，佢忍唔住「哇」咗一聲。
因為喺佢眼前嘅順恩，由本來著翻工住嘅普通鬆身Polo裇同長裙，換咗做一件白米色嘅荷葉露肩T裇同藍色緊身牛仔褲，而且頭上面仲戴多咗個白色髮箍。
「我都好似第一次見你咁著。」
「你……你無見過我咁著咩？」
對於阿廣嘅愕然，搞到順恩都隨即變得有少少難為情。
「無啊，無見過你著得咁靚女。」
順恩聽到呢句，即刻面紅上嚟，然後就忍唔住拍打咗一下阿廣嘅手臂。
「我男朋友講嘢幾時咁口甜舌滑架！」
「不嬲架啦，哈哈。」
於是隨後二人都一邊嘻嘻哈哈咁打情罵俏，一邊走去搭升降機，踏上前往屯門嘅道路。