我想同佢講咁樣俾佢搞一搞我真係以後唔使喺U入面搵食,雖則我既無打算要喺度搵食,而且我都就畢業。如果Ella見到確實係無嘢,但我驚佢唔知諗咗去邊唔開心;Cindy嘅話一定會識做,但我怕佢貪得意走嚟當我哋兩個玩具咁玩…我有啲後悔點解唔一早同Cindy溝通好先…再者其他啲中同都唔係乜好東西。
但睇怕我就無得揀,反正都唔會拖足成日,於是我用手掌捉住佢手掌咁拖,而佢個樣就好似好新奇刺激開心咁。
琋:「等我呢個女朋友去買嘢食啦,Issac你想食乜呀?」
我:「我都唔係好知,平時我唔想諗就食頹飯。」
琋:「頹飯?」
我:「每間大學都有㗎,大同小異,即係嗰邊個counter,廿五蚊潷一樣餸,三十蚊潷兩樣餸,叫佢畀幾多飯都得嘅,未食過嘅人唔配叫讀過U。」
琋:「咁…我幫你揀埋啦,你乜都食㗎啦?」
我:「妳揀啦,攞我張八達通去買。」
琋:「唔使啦,我今日嚟麻煩你我請啦。」
我:「我今日係男朋友喎。」




佢聽到之後就乖乖攞咗我張八達通去買嘢食,走咗兩轉買咗一個雙髀飯,一個芝士焗海鮮飯,重有一碟菜,其實同商場food court都係差唔多,但佢個樣就出奇地興奮。
琋:「留返半隻鴨髀畀我,我鍾意食。」
我:「琋玟,妳今日嚟重有乜想睇想做?」
琋:「嘻,我係妳女朋友,叫我琋就得喇,我就無乜所謂,又唔知邊度去到,你安排啦。」
我:「想唔想上堂?」
琋:「吓!真係可以㗎?」
我:「大LT啲堂梗係得,不過驚悶到妳瞌眼瞓。」
琋:「唔會呀!我想上呀…不過最好唔係文學歷史嗰啲啦,同你一齊上堂一定好開心。」
我:「放心,嗰啲我都唔肯上,4至6有堂Mechan Eng應該會溫考試係咁計數,好唔好?」
琋:「好呀,唔識嘅話我實問你。」




我:「咁我哋食完飯就去圖書館參觀先,之後周圍行下最去上堂,上完再諗下有乜做啦。」
食完飯偷偷帶佢入拉靶,佢見到啲書雙眼發光。
我:「嗱,呢度係圖書館入面嘅discussion area,係一間玻璃房嚟,我哋都叫佢做金魚缸。」
雖然此金魚缸不同彼金魚缸,但都有女睇嘅;不過我當然無同佢講,因為肯定聽唔明。
琋:「呀,我想自己睇下書,費事悶親你,你喺金魚缸入面等我啦。」
如果我喺U呢四年可以有佢咁鍾意圖書館,我諗我都可能有機會報MIT,不過一切已經過咗去,我都係趁有時間攞啲notes出嚟喺金魚缸溫下先。
過咗半個鐘到琋攞咗兩本書返嚟搵我。
琋:「你繼續溫書啦,我哋一齊努力。」
我:「Finance?係妳嘅目標?」
琋:「其實我未決定到讀理科定商科,不過我兩邊都有揀,等放完榜先再諗,反正A1一定收我。」




我:「係先好,小心輸比我。」
琋:「未驚過,輸咗畀你任你中出都得。」
我:「…咁似某高登仔小說topic嘅…」
琋:「原來你都睇過?」
我:「未呀,睇完書名未得閒睇。」
琋:「唔需要睇,呢啲嘢現實無可能發生囉。」
就係咁我哋兩個喺金魚缸入面睇咗半個鐘書,琋佢挨住我黐到實一實,應該任何一個經過嘅人都會望入嚟,因為琋真係好靚女,而且肯定覺得我同佢好恩愛,正常嘅U-mate情侶有幾多個會喺呢度溫書溫到咁嘅樣,考試前乜都滑晒牙啦。點都無所謂啦,過多兩個月之後我諗我都無乜機會再嚟呢度,當係留返少少回憶都好。
上堂前我就同佢再周圍行下,睇下今非昔比嘅民主牆,活動板…點知俾我撞到兩個人,重手拖住手迎面行緊過嚟。
A:「咦,有新女呀?」
威:「咁開心呀Issac,咁…」
我雞咁眼望住佢哋,拜託佢哋唔好亂講嘢。
我:「有幾開心,你兩個咪又係喺度拍緊拖。」
點知Amy就鬆開咗隻手。
A:「哈哈,我見佢一個人咁慘咪益下佢囉,一場朋友無謂要佢搵PTGF啦,留返啲錢嚟請我食飯好過啦,係咪?」
威:「真係羨慕死你,重要係後生靚女妹妹仔…」




琋:「唔使羨慕佢,Issac今日係我PTBF嚟㗎咋。」搞乜鬼?暴走發言?咁識玩…
A:「妹妹妳唔係呢度學生?」
琋:「我啱啱考完DSE㗎咋,佢帶我嚟參觀。」
威:「Issac,話我知,一個鐘要幾錢!」
A:「作死你呀!係咪想我收返你錢呀?」
然後有人被扭耳仔。
威:「呀!呀呀呀!唔敢!」
琋:「請Issac做PTBF好貴㗎,勸你都係慳返。」
A:「咁你兩個玩得開心啲啦,我哋行先喇。」
睇個樣佢兩個而家都相處得幾好。
去到大LT上Mechan Eng堂,為咗唔起眼我揀咗個半山頂位,睇得出琋佢對於喺大學上堂呢件事好興奮,一路拖住我隻手一路專心望住出面個screen。
琋:「有無紙同caltor呀?」
我:「嗱,呢度…使唔使咁認真?」
琋:「順便啫,估唔到我聽得明,唔太深喎。」
我:「呢堂Year1㗎,妳識一半係正常。」




我嘅大學生涯可能得返最後幾堂,可以一齊咁同佢玩下都幾好嘅,我睇住佢一路抄題目跟住professor一齊計,見佢唔明我都有教佢,基本上呢啲科Year1我一定跟到嘅。
琋:「好開心呀,搞到我有啲想讀Mechan添。」
我:「妳而家咁嘅心情,我帶妳去上邊科嘅堂妳就想讀邊科㗎啦。」
琋:「嘻嘻,我又想食嘢喇,去canteen啦!」
我:「咁快又餓?」
琋:「計咗咁多數要消耗好多能量,同埋我頭先已經睇定夜晚有乜想食。」
讀咗差唔多四年大學嘅我到而家呢一刻先知讀U可以咁開心,開心到我差唔多想用full price讀多一個degree,同琋佢一齊做同學。
佢帶咗我去canteen一個比較入嘅位,係一間西餐廳嘅corner,好多U都會間一格呢啲位出嚟扮高級少少,賣下咖啡同牛扒,其實只係貴啲啲,但就好似同出面個平民區分隔開咁,等啲professor或者交流生嚟呢度品味下人生。琋佢就點咗個牛柳粒青醬菠菜麪同一個白醬雜菌豬肉腸闊條麪。
我:「妳想揀邊碟?」
琋:「我兩款都想試,不如…我哋食完一半再交換好唔好?」
對情侶嚟講,呢樣嘢好平常,我同Stella,Cindy一向你一啖我一啖;又或者當你有啲人生經歷,就唔會介意,好似Zoe同我食飯都係咁款;不過…琋佢始終係一個拖都未拍過嘅小妹妹…而且重係食下食下好易會咬斷嘅意粉,我都唔好意思要佢食我口水尾。
琋果然出身中產,識得用正式方法叉加羹繞意粉,好在我都唔係市井,雖則我平時一定食到雪雪聲外加個嘴污糟晒;而且可能因為佢讀理科加追求完美,食剩一半真係好似剛剛好食咗一邊半隻碟嘅份量咁。
琋:「跟住重有乜節目呀?」
我:「呢個…呀!我醒起要去CSC print題目。」
琋:「CSC?」




我:「即係電腦室呀,順便帶妳去睇啦。」
當我正想攞部電話出嚟睇要印乜,我見到有新message…
C:『喺U?一唔一齊落去TASTE買餸返屋企?』
我:『唔喇,我重忙緊,而且食埋din,妳返去等我啦。』
C:『頭先撞到Amy,佢叫我周圍行下,話有得意嘢,其實係乜呢?』
我:『我帶緊琋玟參觀大學,無特別。』
好明顯我知道無得暪佢。
C:『畀一次機會你話我知位置。』
我:『喺CSC,真係無嘢…』
佢覆咗我一個點點眼笑笑口嘅emoji,據我經驗絕對唔會有乜好事發生,琋佢坐到貼一貼重用手捉住我,如果我叫佢縮開啲就即係同晒兩邊講此地無銀,我唯有祈求Cindy唔好玩得太過份。
C:「哇,乜咁啱呀Issac!點解嘅?哈!臨畢業終於唔做毒撚嗱?學人標尾會?」
比起上次串我同Ella,今次佢再多兩錢肉緊…
我:「唔好笑我啦…哈。」
C:「我係佢中學同學,可以叫我做Cindy,今年Year3 BBA。」
琋:「我係Hazel,今年啱啱考完DSE,我係Issac女朋友。」




搞乜鬼?Hazel?呢個名我都係第一次聽…重有做乜點解咁直接話係我女朋友?
C:「Wow,你個死仔包喺邊度識到咁靚嘅妹妹仔?」
我:「哈…唔係好方便講,我都唔知點解咁好彩。」
C:「Hazel妳諗清楚未㗎?佢大妳咁多唔驚相處唔到咩,使唔使我爆佢以前啲衰嘢妳知?」
唔知點解Cindy好似想置我於死地咁…
琋:「唔使,我諗清楚,我同佢係認真嘅。」
唔知點解呢邊又認真到咁,明明係扮情侶…
C:「有幾認真?唔驚佢好認真咁食咗妳?」
琋:「我相信我男朋友嘅為人。」
認真我好驚擦槍走火,重驚過當年溫泉旅館…
C:「哈哈,我識咗佢七年喇,信唔信我?」
琋:「我信我自己嘅眼光。」
C:「佢讀四年U有乜未玩過,妳信佢同妳純愛?」
琋:「無話過純愛,我都唔係細路女,我會就佢。」
C:「咁同佢打個茄輪嚟睇下先。」
琋:「我同佢先啱啱開始…」
我:「Cindy姐姐,人哋又唔似得妳呢啲交際花咁,唔好嚇親人啦。」
C:「係咩,有無咁易嚇親呀?你唔好咁假啦。」
我:「都無理由第一次見人就叫人打茄輪㗎…」
C:「咁就驚,去到Ocamp實俾人恰死呀…係呢,我同你都好耐無惜過,女朋友唔幫你使唔使我代勞?」我唔明…我到底做錯乜。
我:「Cindy妳唔好講笑啦…我幾時同妳…」
我唯有咁講,就算佢好似想六國大封相。
C:「重記唔記得我同你玩Ocamp嗰陣,明明塊保鮮紙好容易吸住,但你就係有方法撞走佢,跟住嘴埋落我到,我好似未原諒你㗎喎?重有上次Re-u呢,你跟埋班PK仔一齊起哄,你唔好話你醉咗呀,雖然講真我就無乜所謂嘅。」
到底乜事?我同妳唔同Year唔同department點解會一齊玩Ocamp?但我知道講大話一向係Cindy嘅絕技,佢真係可以唔眨眼望到定一定天花亂墜信口雌黃,無論件事係幾咁唔合理都會令人覺得有信服力;我諗…佢係下定決心要我同琋反面,而且一路講塊面就哄到越埋。
我:「唔好…」
我都未諗到講乜,個頭就俾人硬生生咁擰轉咗九十度,未嚟得切反應就睇住琋佢惜咗埋嚟,重即刻伸咗條脷入我口度,佢啲動作好生硬,啲牙係咁撞到我,我擘大口lead返住佢,用條脷底橫掃返佢脷面…
我哋濕吻咗半分鐘。
琋:「滿意未呀?Cindy姐姐。」
C:「睇嚟你搵到個好女朋友喎。」
琋:「咁可唔可以唔好再騷擾我同埋我男朋友?」
C:「唔打攪你哋,玩得開心啲。」
Cindy笑容滿面咁行出CSC,我完全唔知佢諗乜。
我:「琋…咁等我print埋…送妳返去…」
琋佢成塊面都紅晒,隻耳仔好似著咗火咁,就連上次佢喺我隔籬自慰都無咁大反應,可能因為呢個係佢嘅初吻…
琋:「多謝你今日陪我,我走先喇!」
佢起身就行去門口度,我急步追出去捉住佢手。
我:「等埋我先…」
琋:「唔使送我,我想靜下。」
我知道呢一刻我無嘢做到,唯有眼白白睇住佢嘅背影越行越遠,再消失喺轉角位。
我係咪要send message畀佢道歉…但係咁又好似會阻住佢靜下。
我:『Cindy,我唔明,點解要咁…』
其實我真係有啲嬲,但係呢個世界上有兩個女人我絕對唔會怪佢,無能力亦無資格怪佢,就係Stella同埋Cindy,我哋應承咗以整個生命信任對方,所以就算佢玩到幾大我都唯有硬食。
C:『見面先講,我喺TASTE。』
於是我印完嘢就急急腳跑落去TASTE,兜咗半個圈終於搵到Cindy,佢竟然望住我扁嘴。
C:「點算…八爪魚已經俾人買晒…」
我:「妳…剩係想同我講啲咁嘅嘢?」
C:「唔係嘅話你想同我討論啲乜?」
我:「Cindy,點解頭先要搞到個氣氛咁尷尬?」
C:「呀,你個Hazel妹妹呢?唔使陪佢嗱?」
我:「佢走咗…我諗…俾妳嚇親。」
C:「關我乜事,係佢自己選擇咁做。」
我:「我同佢無嘢㗎!佢今日只不過貪得意同我玩扮拍拖遊戲,只係等佢體驗下…」
C:「哦。我同你都係玩咗四年扮SP遊戲,其實我同你都係無乜嘢,如果你好唔想見到我我可以消失。」
我:「Cindy,我唔係…我只係想知,點解妳要咁樣刺激佢?因為妳嬲?呷醋?想玩佢?」
C:「我有無咁無聊?我當日有無攪你同Ella?」
我:「所以我想知原因。」
C:「你咁叻又點會唔知呢?」
買完嘢,一齊搭黨鐵,再行返屋企;一路上我哋都無乜嘢講,不過我同佢咁多年,呢啲好小事。
我:「Cindy,我…應唔應該同琋玟道歉?」
C:「咁你認為你做錯乜先?」
我:「我…我…」
C:「怪晒落我到囉,有個變態女同學貪得意專登嚟玩你兩個,其實你無錯。」
我:「我點可以咁不負責任,我唔係咁嘅人。」
C:「如果你負責任點解頭先唔攬住琋玟嚟惜?」
我:「點得!我同佢都唔係…只係詐假意…」
C:「咁你認為佢係咪咁諗吖?」
我:「至少…佢係咁講,我諗,佢覺得我係一個值得信任,可以依賴嘅大哥哥,所以先咁玩。」
C:「咁無嘢呀,玩完發覺玩唔掂咪樂極生悲囉,以後唔再玩就乜事都無。」
我:「但係…佢啱啱好似真係好唔開心。」
C:「我先想鬧你係咪想令到多一個女仔為你唔開心呀!」
我:「但我都無做過啲乜…」
C:「我叫咗你,一係就忘記晒以前嘅嘢全心全意去追佢,一係你就同Stella神交話佢知你今日喺度做咗啲乜啦!我唔Q想理你!」
我:「Cindy,對唔住,係我錯…」
我喺後面攬住Cindy條腰,希望可以安撫到佢,Cindy一直都係一個EQ好高嘅女仔,識佢咁耐第一次用咁硬嘅語氣同我講嘢。
C:「唔使同我講對唔住,你無嘢對我唔住,如果你對我唔住嘅話我一早消失咗。」
我:「Cindy…唔好…我需要妳…妳明知道,我同琋玟係無可能,唔可以。」
C:「咁而家佢走咗唔係幾好咩?你重想點?」
我:「但作為朋友我點可以咁對佢…」
C:「我同你講,其他人真係無所謂,我拋開埋個身出嚟配合你玩都得,你想同Zoe玩3P我都可以諗計幫你,你想翻撻Ella做SP我甚至可以同你message代打氹掂佢,但如果你敢玩弄琋玟妹妹感情你唔好怪我絕情。」
我:「我又點會玩弄佢感情。」
C:「你留返嚟同Stella講啦。」
我:「Cindy,我明白喇。」
我知道,無論我send乜畀琋玟妹妹都係於事無補,再相處再玩落去只會更加出事,因為呢個問題係no solution,就好似我明知Stella個心喺我度所以一直唔拍拖一樣,只不過我從來無當過呢個係一個問題,我真係一個大仆街。
表面上嘅和諧,往往係醞釀內在問題嘅糖衣。
琋玟,對唔住,我實在無辦法send message同妳講聲對唔住,希望妳靜下靜下會唔記得咗我啦;如果妳覺得同我相處呢段期間係感到快樂嘅話我已經好滿足,妳會永遠喺我心入面。
當然,呢件事我係唔敢同Icarius講,雖然她們確實是多麼的相似,除了一個是曾經的十六歲,一個是現在的十八歲,或者喺N年後琋玟變成三十幾歲一樣可以同我flirt到成地都係水…
電話又有message…
E:『我今日見到你同個女仔喺金魚缸…』
我:『哎呀,俾妳見到添,我其實同佢只係朋友。』
E:『我諗咗好耐應唔應該message你…其實我知道我唔應該管你嘅事,但無論如何我都有責任,我想問你,你當初話唔係對個女仔有興趣,點解今日會俾我見到啲咁嘅嘢?』
死火!大鑊!我只係記得顧住我同佢EX嘅關係,完全忘記咗佢係當日幫我手摷琋玟妹妹啲料!
我:『對唔住,呢個係意外嚟,放心,我同佢嘅事已經完結咗,實際唔係妳見到表面咁樣。』
E:『我其實唔介意你同呢位女仔點樣,但係我都唔想有一個人格有問題嘅EX,至少我要確認你唔會傷害佢,如果唔係我就變咗幫兇。』
我:『Ella,妳可以放心,我保證…』
事實我又唔可以講,結果都係用一堆說詞嚟幫自己辯護,希望呢件事真係可以告一段落。
而又非常好彩地,琋玟佢之後真係無再搵過我。
Z:「咦,呢排唔見琋玟嚟搵你嘅?激嬲人呀?」
我:「無,我同佢講成日落嚟玩好易招人話柄,費事到時尷尬啦,同埋佢都要準備升大學啲嘢。」
經過無數嘅努力,考試,FYP,我終於迎嚟我嘅最後一個暑假。
Z:「Issac,係呢,你畢業㗎喇喎,嚟緊九月我重會唔會見到你?」
我:「呢層,我都未知,但至少我而家未搵到工住。」實情係我根本無搵過。
Z:「如果見唔到你,我就私下約你食飯啦。」
我:「做乜…講到我一定要出現咁…」
Z:「做乜?搵朋友食飯好正常啫。」
努力係有回報嘅,雖然transcript未出,我都已經知道最尾一個sem拉返好多分,second up不成問題,總算一切塵埃落定;不過對上幾個月真係好攰,反學反工都chur得好犀利,橫掂前路未睇到,所以我又hea返排先,開返部電腦打下機,同Cindy過返啲日常生活。
直到我自己都唔記得咗有呢一日。
琋:『Issac Sir。』
係一幅相…
『中文5*,英文5**,數學5**,通識Pass,經濟5**,物理5*,M2 5**。』