《前度超渡師》: 第七集-恐怖前男友（二）
口講無憑，做就最實際，我亦都開始構思點樣幫星瓊報復。值得慶幸嘅係，星瓊臨走之前，俾咗樣好重要嘅嘢我哋，呢樣嘢就係佢同衍皓嘅對話記錄，由初相識到第三次分手之後，所有文字對話一覽無遺。
-
呢一堆對話，已經係我揸住衍皓嘅籌碼，有啲嘢，星瓊收收埋埋唔敢做，就由一個外人去幫手解決。
-
［忘掉種過的花，重新的出發，放棄理想吧！］
-
但單憑我嘅實力係唔足夠，我要搵衍皓嘅現任，我要令衍皓嘅女朋友知道衍皓並唔係一個好男仔，我要衍皓承受返當初星瓊所受嘅痛楚。
-
「腎仔，國家有任務俾你喇！」我打電話俾我嘅得力助手-腎仔，叫佢上嚟商討對策。
-
腎仔住喺「前度超渡株式會社」附近，話咁快上咗嚟，我同腎仔好快咁講星瓊嘅事，腎仔都覺得衍皓咁樣做係完全接受唔到，唔係一個男人應有嘅行為。
-
腎仔諗咗一陣，佢講出嚟嘅意見比我更加兇狠，就係直接叫衍皓女朋友咁樣對返衍皓。作為男人嘅我都好buy腎仔嘅建議，以其人之道，還治其人之身。
-
一個尋找衍皓女朋友嘅故事，正式展開。我同腎仔透過Instagram已經迅速搵到衍皓嘅現任女朋友。開頭佢以為我哋係詐騙集團，但當我哋send衍皓對同星瓊嘅對話同埋錄音，佢就知道衍皓唔係一個好人，佢開始漸漸相信我哋，佢亦都唔想再俾一啲賤人繼續欺騙落去。
-
經過幾日嘅傾偈之後，佢都有一個初步整衍皓嘅一個方案，就係做返衍皓之前所做嘅嘢，先有外遇，然後分手，但佢唔會再同衍皓一齊，永遠都唔會。
-
而呢個「外遇」就係嚟自Instagram假account嘅我，由我去成為衍皓女朋友嘅外遇，之後就靠衍皓女朋友特登唔小心露出馬腳，但衍皓知道佢係有外遇嘅。
-
再經過多幾日嘅研究同練習之後，「分手計劃」正式開始。
-
首先我同衍皓女朋友已經偽造咗好多親暱嘅對話，猶如一對曖昧中嘅情侶，然後就等衍皓女朋友自己發揮，引申到之後嘅劇情，咁作為前度超渡師嘅我，喺呢次嘅case究竟有咩做？我就係要跟住佢哋兩個，確保劇情係跟住劇本進行，至於我點跟蹤，咪就係同女朋友夾定喺邊度同衍皓一齊囉。
-
根據劇本，佢哋喺餐廳坐低之後，女朋友就會話去廁所，呢個時候女朋友就留低部電話喺枱面，同時間，喺同一間餐廳坐喺附近嘅我就會用甜蜜嘅文字聯絡女朋友。當枱面上嘅電話震動加發光，相信坐低嘅衍皓會望望，睇下邊個搵佢女朋友，當衍皓一睇，就知佢女朋友有外遇。
------
將時間跳去超渡當日，女朋友放低電話之後，向坐喺後面嘅我打眼色，而我都準備聯絡女朋友。
-
「B~聽晚去邊度食飯？我好掛住你吖！」
-
衍皓嘅動作同現實一樣，偷窺咗一下女朋友電話嘅內容，佢眉頭一皺，塊臉突然黑過關公，好似想爆發嘅感覺咁。
-
「呢個男仔邊個嚟㗎？」女朋友返到嚟，衍皓即刻黑住口臉咁問。
-
「哦！呢個咪我男朋友囉！我哋一齊咗幾個月㗎喇！」女朋友都不甘示弱，直接講「事實」出嚟。
-
「點解你要瞞住我同第二個拍拖？你知唔知我好愛你㗎！」作為聽眾嘅我，唔多唔少都覺得呢句係大話，衍皓當初同星瓊講咪又係好愛佢，結果咪大家都知囉。
-
「我冇隱瞞吖，係你自己唔知啫。」呢句說話都講得出，好嘢！
-
「你食屎啦！唔想拍拖一早出聲，嘥Q晒我啲時間。」當一個男人面子受到打擊嘅時候，所謂嘅粗言穢語就會破繭而出，目的就係守護所謂嘅「尊嚴」。
-
「冇話唔想嘅，當初都仲愛你嘅。不過而家係想你知道你以前對星瓊嘅時候，人哋所受嘅苦係有幾傷啫。」當然啦，水能載舟，亦能覆舟，衍皓嘅「尊嚴」已經被自己踐踏晒啦！
-
「點解……點解你會知道㗎？」一個大話精被人揭露咗之後當然想知邊個放料啦！
-
「你唔需要知，我好多謝星瓊令我知道你係賤人，如果我冇緣接觸星瓊，我呢刻肯定係蒙在鼓裏，永遠俾你呃緊。」即使衍皓知道係星瓊報料又點，星瓊已經轉校，唔會再有機會見到衍皓。
-
「你走啦，我唔想再見到你。」衍皓面子盡失，唯一可以做到嘅嘢就係趕走女朋友，盡力挽回嗰啲啲嘅面皮。
-
「呢一下，我係為星瓊而撥嘅。」女朋友攞起枱面杯水，一嘢撥落衍皓身上，之後頭也不回咁走。至於衍皓，唔好話有少少面皮可以執，經過啱先有型一撥之後，所有面皮都隨著杯水沖走晒嚕！
-
女朋友冇得睇衍皓尷尬樣實在可惜，而我梗係坐低繼續食下花生先走啦！另一邊廂嘅星瓊，正正就喺我隔離，睇住衍皓俾人淋水，佢呢種發自內心嘅微笑，雖然睇落佢好賤，但其實佢之前俾衍皓同佢啲朋友欺凌，咪都係咁。
------
撥水之後，衍皓嘅兩位前度，星瓊同女朋友，聚首喺「前度超渡株式會社」，佢哋今次係第一次見面，但完全冇好似大台宮廷劇嗰啲龍爭虎鬥，反而似一對相識咗好耐嘅朋友，完全冇妒忌之意，或許佢哋嘅敵人都係一樣，都係衍皓。
-
正路嚟講，女朋友呢個位理應該要收錢，始終要拋頭露面，但女朋友耍手擰頭，堅決唔收任何「演出」費用，而星瓊亦都無奈咁收返。企喺女朋友個角度嚟睇，即使少咗個男朋友，而且啱先嘅動作可能會令自己嘅聲譽受損，但起碼唔再被人呃，都係好事嚟嘅！
-
見係咁，我都唔收星瓊咁多錢，始終慳咗女朋友嘅「演出費」。但基本嘅「超渡」費用都要嘅，話晒呢度唔係善堂吖！
-
（待續 To be continued）
IG：chingchingstory