《前度超渡師》: 第十三集-裙腳仔男友（四）
「係！係好大男人嗰隻。」我都直接咁答佢。
-
「咁你一定要幫我，我想改咗佢。」從佢眼神流露咗堅定嘅眼神，咁我都要盡全力幫佢。
-
「你真係、真係唔好嬲，我真心想為你好嘅。」我都再重申一次我嘅出發點。
-
「即管踐踏我啦！我準備好㗎喇！」
-
你嘅大男人性格令到其他人有啲討厭嘅感覺，好多時候我行我素，唔聽其他人嘅意見，作為一個男人，擁有自己嘅意見、堅持自己嘅原則係好重要，但你而家嘅身份除咗係男人之外，你仲要負上「男朋友」嘅責任。
-
你要好清楚你而家係兩個人嘅生活，唔係你自己一個人拍拖。Wendy亦都唔係你嘅隨從，你哋兩個人都係一個獨立嘅個體，有自己嘅價值觀，有自己嘅興趣同諗法。
-
摩擦好易就因為呢啲小衝突而發生，遠至談論未來人生路向，近至今晚晚餐食咩，呢啲衝突往往導致關係變差。我知道男人好要面，永遠唔想做低頭嗰個，但你要知道，喺你身邊嘅佢有可能係你終身伴侶，如果連食咩都要嘈一餐嘅時候，你心就會諗：到底佢係咪真係適合我？
-
有時意見不合咪退後一步，讓下佢，就下佢嘅意見囉。你都要尊重人哋㗎嘛！一段長嘅關係唔係要一方盲目跟從，而係要互相遷就，咁樣段關係先可以長久兼舒服。
-
［頑強性格，帶來更重災禍。］
-
我聽Wendy講，分咗手之後你死纏難打，成日去佢公司接佢收工，要佢做你樹窿。「分離從來不易，這個妳我早已知」，人哋都講到咁白咪學識分手啦！兩個人嘅感情就好似有條線，一個即使拉到好實，另一個完全放鬆，呢條線都唔會連繫到對方，你要知道呢條感情線已經完結咗，再唔會連繫對方，你再緊握，傷害嘅只係你哋嘅關係，持續咁癡纏只會令到人哋再討厭你。
-
不過有樣嘢你要感恩，就係Wendy冇繼續討厭你，佢不斷俾機會你改過，永遠等你有一日改過自身，因為佢都好愛你。不過，如果你仲鍾意佢嘅，你有樣嘢一定要做，呢樣嘢需要好大勇氣，你敢唔敢做？
-
「敢！只要可以同佢一齊返，我乜都願意。」確定過Ryan嘅眼神，我都好放心Wendy嘅幸福。
-
呢個大問題就係你阿媽，你阿媽成日講埋啲侮辱性嘅說話令到Wendy聽到之後好唔開心，我知道你要同你阿媽講佢嘅缺點，你會覺得自己係好不孝，作為人哋個仔唔應該提出自己阿媽嘅錯處，因為你覺得阿媽做咩凡事都啱，永遠淨係聽阿媽講，有咩事都聽阿媽嘅意見。
-
但如果你真係想再同Wendy一齊嘅話，你真係要捨棄你多年嚟永遠尊敬阿媽嘅觀點。喺你耳中，你會覺得你阿媽講嘅說話其實係一個開玩笑，不過喺旁人耳中就覺得好傷害，正所謂「講者無心，聽者有意」，始終你阿媽講到Wendy好差咁，又話拜金女，痴埋你係為你啲錢。事實到底係咪真係咁呢？咁得你一個自己知，我唔知佢到底同我講嘅嘢係咪真實，但我係相信Wendy講嘅情況係真，我亦都相信你可以正面同你阿媽提出呢個問題嘅。
-
我要講嘅嘢都講晒，你有冇嘢要講？
-
「基本上都冇嘅，我真係好多謝你，如果冇你嘅意見，我都唔知自己做得咁差，就好似『裙腳仔』咁。」Ryan連忙咁多謝我。
-
「其實你習慣咗有阿媽嘅陪伴，凡事都問阿媽，永遠都用阿媽嘅意見作為答案，但你已經唔再係一個細路仔，而係一個有思考、有批判性嘅人。」雖然啱先嘅一段長篇大論都係講佢，不過都係講多次好，費事佢聰明過頭聽唔明白。
-
「我明白嘅，我會盡力改變我自己，唔會令佢對我再失望嘅。」Ryan咁講，我都放心晒，冇辜負Wendy對佢嘅期望。
-
「好多謝你特登抽空聽自己嘅問題，希望你之後可以改變自己、改變你阿媽嘅態度，最後祝你哋可以成功復合啦！」話後，我就行去門口開門送客。
-
「承你貴言，如果我第時成功追返Wendy，一定要請你食飯。」Ryan欣喜咁同我講，不過我相信佢可以嘅。
-
「咁我恭敬不如從命喇！」我自己都好想可以見到佢哋可以復合，始終兩個都相愛對方，但當中嘅小問題影響兩位嘅感情，不過經過啱先嘅對話之後，呢啲少問題都迎刃而解啦！
------
件事過咗幾個月之後，我收到嚟至Ryan嘅WhatsApp，相入面有兩個人，而呢兩個人就係Ryan同Wendy手拖手去北極睇北極光。
-
「賤人，我餐飯呢？」我厚面皮咁問。
-
「屎就有你份食。」Ryan趣緻咁覆。
-
嗰日完咗見面後，我亦都同Ryan做咗朋友，我哋成日約出嚟飲住啤酒傾「男人經」，每次嘅見面都睇到佢嘅進步，一次比一次進步，每次都漸漸脫離「裙腳仔」、「大男人」呢啲負面嘅暱稱，一步一步成為一個好男人。
-
前度超渡師嘅唔工作唔係淨係要事主放棄佢嘅前度，而係超渡前度，忘記前度，不論係前度嘅性格、前度嘅行為定前度嘅陋習。
-
而Ryan就係前度嘅陋習，喺對話中，Wendy都一直冇話要決絕「斬纜」，搵得我講Ryan嘅問題就係想由第三者去解決呢個問題。第一次望見Ryan，我亦都覺得佢係一個可造之材，佢係一個好仔嚟，不過未有一個人同佢講佢嘅問題啫。
-
由前度再次成為正印，咪就係超渡前度嘅缺點囉！我喺故事嘅開頭都曾經講過，我唔可以改變當事人嘅過去，但我可以改變嘅就係佢哋嘅未來。
-
而家我咪改變到佢哋嘅未來，等佢哋重新上路，重新認識對方，而今次嘅超渡我覺得係非常之成功嘅！
-
（待續 To be continued）
IG：chingchingstory