《前度超渡師》: 第二十七集-忘不了的妳（七）
同之前外國男朋友分咗手之後，我冇再同其他男仔拍拖，因為我知道我想要嘅係你，冇其他人可以取締你，所以我都一直懸空「男朋友」呢個位置，我諗住等你主動追求我，點知等咗咁多年都係杳無音信，我有諗過你係咪已經有女朋友，抑或已經成家立室。
-
隨著時間一日、一年咁過去，呢個「孤單心事」已經收埋喺心入面十四年，我發覺自己唔再等得，我好想知道你嘅生活，於是我就特登訂機票返嚟香港搵你，我一定要喺你面前講出自己嘅心聲，無論你有冇另一半，我都好想當面講多年嚟對你既愛意。
-
我哋，仲有冇可能好似以前一樣，可以好幸福咁一齊？
-
（阿嘈視覺完）
------
聽完阿嘈嘅心事之後，我好內疚，好內疚自己點解唔早一步搵返阿嘈，要阿嘈自己長途跋涉咁搵我出嚟。
-
但我知道阿嘈都好快要離開香港，我亦都要把握時間，用盡自己嘅方法獲得佢嘅歡心，不過獲得佢歡心之際，阿嘈都要離開香港。
-
我究竟為咗愛情而放棄麵包，定係為咗麵包而放棄愛情呢？我唔知，我都好猶疑。
-
［人只得一個，情趣太多，而手得一對，最愛太多。］
-
做人應該要及時行樂定未雨綢繆呢？雖然我係一個好有計劃嘅人，但我決定呢刻都係享受我同阿嘈兩個人嘅時光仲好啦！唔通又等到失去咗先再珍惜咩？冇可能啦，我亦都唔會俾呢件事情發生囉！
-
我哋相識第一日就互相一見鍾情，然後就一齊，可以話係puppy love。十四年前嘅夜晚，送佢返屋企嘅時候阿嘈都係挨住我膊頭瞓；十四年之後嘅相遇，一樣都係，不過呢個係true love。
-
我成日都講呢句：鍾意一個人唔係用識咗幾耐嚟做單位，而係第一眼望到佢，我就已經好鍾意、真係好鍾意阿嘈。鍾意一個人，唔係計識咗幾耐、諗佢係咪鍾意我，而係簡單到我望住佢笑，我就想一生一世都淨係望住呢個人笑。
-
十四年前嘅我咁同自己講，十四年之後嘅我一樣咁講，不過今次唔再係齋諗，而係真係做，兌現返自己嘅承諾。
-
既然今次我早就知道阿嘈會返去英國繼續生活，唔可以再返轉頭，但我同時都要諗下「前度超渡株式會社」啲客人。
-
唔經唔覺已經去到第二朝，我哋互相挨住大家瞓覺都已經瞓到不似人形。我決定打一個好重要嘅電話。
------
「腎仔，有事想請你幫手。」我打俾我嘅助手-腎仔。
-
「搞咩啊杰哥，晨早流流打嚟。」腎仔好似仲未瞓醒，講嘢有啲啲起床氣。
-
「如果我將間嘢俾你接手得唔得？」我直接咁問。
-
「呢個決定有啲大，我諗諗佢先。」以我所知腎仔係有正職嘅，要佢放棄自己嘅工作係有難度嘅。
-
「慢慢，你諗清楚再覆我啦！」雖然我好急，但間嘢又真係唔趕時間，冇人接手大不了唔做。
-
明明一個咁重大嘅決定，點解腎仔唔問我因由，原因係我哋喺相識之時都已經講到明，當我再拍拖嘅時候，我就唔會再接手呢間嘢。
-
而我相信，腎仔已經知咩料。（至於我同腎仔相識經歷，請欣賞《前度超渡師》彩蛋）
------
當我同腎仔傾完電話之後，膊頭嘅另一邊終於都重獲自由，阿嘈終於都起身。
-
「傾下傾下，借咗你個膊頭瞓一晚㖭。」阿嘈怕怕醜醜咁講。
-
「唔緊要，都話呢個膊頭以後都屬於你㗎啦！」如果我要為呢句加個期限，我希望係一萬年。
-
［誰人又相信一世一生這膚淺對白，來吧送給你叫幾百萬人流淚過的歌。］
-
歌，我就識唱喇！但我係咪真係做到呢？
------
記得阿嘈仲有兩個月就走，我諗住同佢進行香港遊2.0，雖然我平日要開檔而未能陪伴阿嘈遊香港，但阿嘈都可以喺「前度超渡株式會社」等我收工㗎嘛。至於假日呢，梗係去玩、去癲遊香港啦！
-
簡單梳洗過後，我哋都各自返屋企整理行裝並相約喺阿嘈屋企等，今日嘅行程就係先去大西北嘅南生圍，夜晚再去旺角掃街。
-
唔怕老實同大家講，其實我咁大個仔都係第四次踏入大西北範圍，第一次係同屋企人去濕地公園，而第二次同第三次就係同阿嘈分開之前嘅香港遊，再續濕地公園之旅同探索新景點－南生圍。
-
［綠蔭裏，草坡上，讓我胸襟一再展……］Sorrry播錯歌㖭，我未戴綠帽㗎！
-
受到唔同媒體嘅推崇，南生圍同尋晚食嗰間芝士撈麵店舖一樣，都係人生人海，龐大翠綠嘅草地都變得串步難行。當中最出名嘅搭木筏環節，基本上每個入嚟嘅遊人都會排隊乘搭，但船得一架、船夫又得一個。真係「人只得一個，乘客太多，而手得一對，慢慢等啦！」
-
木筏唔係威尼斯湖嘅貢多拉，冇一個唱歌了得嘅船夫一路唱歌，一路拉船，取而代之嘅係船夫對於手軟嘅問候。問候乘客壽堂嘅同時，湖邊嘅雀仔就互相呼叫，彷彿嘲諷緊船夫雖然好多怨言，但都繼續埋頭苦幹服務乘客，相映成趣。
-
本土版貢多拉旅程喺陽光最酷熱之下完成，由於遊客真係越嚟越多，我哋擔心再唔走之後要同一大班遊客排隊等車，又要逼餐死先可以返出市區，所以我哋都提早離場。不過我又點會俾拍拖之旅咁快收隊，梗係有下半場啦！
-
至於去邊，真係一個好問題，出返市區又好似好掃興，話晒難得都入咗嚟大西北，睇歷史去屏山文物徑又驚悶，冇理由同女朋友拍拖睇歷史嘢啩？定係去幫天水圍聚星樓咁有趣先，淨係睇嗰棟樓都悶爆，定入流浮山食海鮮，我哋又後後生生，加上我又唔識揀海鮮，仲要話晒係遊客區，肯定俾人劏啊。所以去邊度真係好難諗啊，出返市區又無mood。
-
（待續 To be continued）
IG：chingchingstory