《前度超渡師》: 第三十九集-告別之前（一）
時間早一秒一秒走，時間的初衷總要守，最後一個月，踏破鐵鞋遊香港，不過今次唔再係毒杰遊，而係有阿嘈陪伴嘅拍拖遊，無論最東嘅東平洲、最南嘅蒲台島、最西嘅飛機維修區、定最北嘅沙頭角，總之去得嘅地方，都有留下我同阿嘈嘅腳毛，電話內存記憶體早就已經應付唔到大量兼美滿嘅回憶。
-
走過繁華都市、穿越綠草如茵，城市急速脈搏相比鄉郊寧靜心跳，所記載嘅回憶截然唔同，唯獨一樣嘅係，無論城市定係鄉郊，呢度都係香港-我最愛嘅香港，世上冇任何一個地方可以取替，繁華美抑或自然美，喺香港都係襯到絕配。
-
每踏足香港唔同嘅地方，去到嗰度就會回憶唔同嘅事，成長嘅小學、挫折嘅中學、甚或失敗嘅工作與情場，一一重遊舊地。
-
相信每個香港學生必定作過「重遊舊地所見有感」呢篇文，亦都對文章嘅體裁唔陌生，觸景抒情，每一個地方見證住我嘅成長。
-
同細個阿嘈食芝士撈麵嘅青澀、至大個成熟被玩感情嘅茶餐廳之戀，對於戀愛嘅成長之路，唔同地方都成為唔同嘅踏腳石，一步一步咁指引我成長。
-
身邊多咗阿嘈，遊歷香港嘅回憶截然多咗細個同阿嘈嘅時光，郊野公園、天星小輪、迪士尼、南生圍等等，景點嘅變化就唔係好大，但大家嘅變化就好大，趁著告別之前，用電話記錄香港之美，亦都記住我哋嘅笑容。
-
相簿每張自拍，將我同阿嘈歡笑嘅樣子攝入鏡頭，背後亦都有唔同嘅景色襯托，只可惜深層嘅情緒就係我對香港嘅不捨之情。
-
我決定將呢個情緒收埋至內心嘅心底，唔向任何人透露，我唔想阿嘈因為我唔捨得而唔開心，我知道佢好想去英國繼續發展，我擔心佢因為見到我唔開心，改變決定留返喺香港，貿然放棄發展嘅機會。
-
最大令我改變心態嘅唔係阿嘈，而係我阿媽……
-
某日食飯，阿媽再次聽到我要離開香港嘅消息之後，冇好似上次咁隱晦希望我留低，反而大大力支持我哋嘅決定，話後生仔係要向外闖一次先得，見識下呢個世界嘅宏大，並叮囑我要保持聯絡，得閒要返嚟探阿媽，同埋記得俾家用。
-
雖然我唔知阿媽係真心支持，定係知道佢冇得反對而變相支持，定抑或口不對心，口裏支持，身體卻反對。無論點都好，既然連唯一嘅屋企人開口支持，自己冇理由唔支持自己啊，亦都冇理由唔支持女朋友嘅決定啊！
-
路唔轉就人轉，喺香港我都可以白手興家，一個人成立咗「前度超渡株式會社」，冇理由去到英國會被社會淘汰，或者做打雜啊！我都可以用返自己嘅專業幫人，唯一唔同嘅係要用英文同客人溝通啫，我連英文名都諗好㗎喇，就叫「Burn Your EX company」，又簡單又直接，唔識英文都get到咩係burn，咩係Ex。
-
阿嘈聽完我辛苦改完嘅新店名之後，竟然聲稱後悔帶我去英國，話我啲英文咁差，去到點同人傾偈啊。，我就帶阿嘈去某某「隧道」美式潛艇堡連鎖店，展露我嘅英文技巧。
-
「This bread and this this this thank you！」
-
企喺隔離望住我尷尬嘅阿嘈已經想搵窿捐，甚至連店員都聽到一頭霧水，雖然我估計佢都知我想要啲咩，係騎呢啲啫。語言都係用嚟溝通，至少起碼溝通到啊！假若真係唔得，咪用gg translate囉，冇嘢難到我嘅。
-
相信經過呢次之後，阿嘈應該有啲想放棄移民英國，可惜the show must go on，已經冇得再改。
------
時光總不留人，已經去到最後兩個禮拜，香港之旅都已經完成咗一半，而前度超渡師嘅交接工作就一直都冇停止，腎仔亦都把握時間吸收我所教嘅內容，包括：點樣安撫客人面對前度、由搵資料到傾談嘅專業，唔可以同客人有任何感情，要秉承自己嘅專業，一切嘅規則盡在《前度超渡條文》，簡簡單單四條規則，由自己開舖前所訂立，到而家一直都緊守條文，而腎仔之後接手「前度超渡株式會社」，理所當然要遵守啦，再次重溫條文：
-
『前度超渡株式會社』-前度超渡條文
-
1.當事人需攜同與前度的故事前往「前度超渡株式會社」，由前度超渡師解決。
-
2.超渡前度時，可作口頭上的人生攻擊，但不可以使用暴力解決。
-
3.超渡個案或許有失敗，可能會帶來更傷痛的後果。
-
4.當值的前度超渡師擁有一切決定權，一切後果由當事人負責。
-
一日前度超渡師，一世前度超渡師；對得住自己嘅工作，對得住自己。
-
當然腎仔接手我啲工作就冇乜難道，話晒佢都睇過我跟進唔少個案，睇住我「超渡」，平時又會負責聯絡唔同幫手超渡嘅人物，做一啲文字紀錄嘅工作，以便我去存檔。
-
工作嘅事都搞掂得七七八八，都要照顧工作以外一個好重要嘅人，呢個女人就係我娘親喇！
-
最後同阿媽相處嘅時間，每晚都返屋企同阿媽一齊共進晚餐、共渡最後時間，大家一齊食飯，傾咗好多偈，又近傾到遠，再由遠傾到近，每晚嘅晚餐都喺歡笑聲之中度過，好感恩阿媽身兼父職照顧埋呢個不孝子，養到我肥肥白白，咁多年都未帶過女朋友上嚟食飯，我知道阿媽一直都好期待杯新抱茶，點知一帶女朋友上嚟又話要移民，茶都未飲，連個仔就話要走。
-
其實我都好想帶埋阿媽一齊離開呢度，唔想阿媽一個孤零零喺度終老，可惜阿媽唔想離開香港，生活咗喺香港咁多年，一早習慣咗呢度嘅生活模式，驚去到外國會唔習慣唔適應。做仔嘅唯有接受阿媽嘅意願，即使唔捨得，都要尊重阿媽嘅意見，唯有節日先同阿媽再相聚。
-
（待續 To be continued）
IG：chingchingstory