《前度超渡師》: 第四十二集-告別之前（四）
阿媽一語中的，突然講中咗，即使離開香港亦都唔代表要放棄自己所有嘅嘢，去到英國都可以重新打拼一番事業，不過心水清嘅大家都應該知道，小弟啲英文係半桶水，分分鐘連同事主傾偈都有難度啦。
-
英國分部呢啲嘢就後話啦，連發都未出，講到咁宏遠做咩啫，去到嗰邊安頓好再慢慢諗都唔遲啦！而家目前嘅問題就係清理呢個兇案現場，殺害咗無數海鮮嘅地方。
-
「我！等我去洗碗啊！你哋一家人慢慢傾。」一開閘，腎仔率先先聲奪人，霸咗個頭位先。
-
「唔好，過門也是客，我嚟。」家母出咗古代諺語拋窒腎仔。
-
睇嚟呢場龍爭虎鬥爭奪洗碗之名正式開戰，我同阿嘈坐咗喺梳化食花生，觀賞戰況激烈嘅賽事。
-
「唔使啦，平時多得大佬關照，而家我先有咁嘅成就咋。」腎仔一個華麗轉身，借跟我搵食之名推咗我上枱。
-
「你唔熟呢度啲位啊，我洗會方便啲。」阿媽直接用東道主嘅優勢壓贏返腎仔。
-
當阿媽出動絕招之後，腎仔放棄佢嘅進攻，最後由家母勝出呢場賽事，腎仔敗走，當然腎仔都知道唔好阻住我同阿嘈嘅私人時間，就決定先行離席。我同阿嘈帶腎仔落樓下車站，盡做地主之誼，送完腎仔上車之後，順便度過下我哋嘅二人時間。
-
送完腎仔上車之後，我同阿嘈手拖手行到去附近嘅公園散心，今次唔再係阿嘈獨自一人上路，而係有我呢個優秀嘅男朋友同行。唔會再係十四年前單人出門遠走讀書嗰下孤獨同埋無奈，取而代之嘅係寄望以及期待。
-
沿住公園小徑走到海邊，我哋搵咗一個無敵海景二人位坐低咗，大家默不作聲，望住對岸嘅萬家燈火，任由海風吹過我哋嘅面頰，將對話交俾大家嘅心靈作沉默交流。
-
走唔係問題，問題係望住呢個養育自己嘅地方一步一步咁變壞，雖然呢度變差根本上唔關我事，但對住呢度咁多年，啲歸屬感唔係上面強制要愛先有，而係真係發自內心嘅愛，呢種「愛」唔需要人哋講先做，亦都唔需要立法，更加唔需要無間斷洗腦，我都唔知點解咁愛，可能大家都係一樣「同熱愛這遍土地」。
-
離開唔一定討厭；留低都唔代表一定鍾意，五光十色嘅城市轉眼間變咗頹垣敗瓦，由唔同嘅管治手法將自由開放嘅城市變成專制嘅地獄。身處喺呢個城市，講咩都有機會俾上面監控，就算私人對話之中嘅一字一句，都要提心吊膽，費事被清算。
-
無論呢度最後變成點都好，呢度永遠都係我嘅一個家，雖然佢唔係最好，但係點都係最鍾意嘅。
------
相依咗一晚之後，太陽亦都從對面嘅大海漸漸露出水面，原來已經過咗一晚，而我哋係乜嘢都冇傾到，純粹有時挨著瞓，有時攬一攬，有時手拖手圍住海濱散步，好輕鬆咁相處一個晚上。
-
迎接晨曦之後，我哋返屋企梳洗，重新檢查一次行李，最後落街食埋個茶記，飲返一杯充滿「香港味」嘅奶茶，同埋冇忌廉味嘅忌廉雞湯素鮑魚火腿通粉。
-
講個搞笑嘢俾大家知，眾所周知鮑魚火腿通粉啲鮑魚一定係假㗎啦！大佬廿幾三十蚊俾真鮑魚你，間鋪頭都執笠啦，咁多年嚟，大家都約定俗成咗一定係素鮑魚，點知幾年前真係有人告上政府話違反《商品說明條例》，之後大家鋪頭為咗唔犯法，就喺鮑魚之前加一個「素」字，以免觸犯法例啦！
-
既然係咁，點解唔告埋「老婆餅」、「雞尾包」嗰啲傳統香港小食呢？話晒雞尾包都冇雞嘅成分喺入面，老婆餅當然都冇老婆啦，當然你食「煲仔飯」都唔希望入面有人肉食。
-
荒謬嘅條例加上荒謬嘅人類，話唔定轉頭有個回力鏢搵上頭釋法都可以，呢度就係荒謬嘅法治地方。
------
急急腳食完呢個突如其來嘅早餐之後，就迅速返屋企攞行李然後搭腎仔車去機場。
-
「走先喇！係咁先喇，下次再玩啦！」耳熟能詳嘅歌從汽車音響播出，呢首歌借派對嘅離場，暗示離開呢個城市嘅人，似乎腎仔想借歌寄意。唔知大家有冇睇過呢首歌嘅Music Video（MV），雖然大家嘅視線應該都係圍繞住兩位男主角同埋一個四位數字嘅女仔。不妨同大家講一個小彩蛋，MV嘅背景就係影住北大嶼山公路，而一般大眾又幾可途徑北大嶼山公路啊，除咗搭車入去迪士尼，或者去大澳、昂坪呢啲熱門嘅遊客地點之外，當然就係去機場啦！
-
MV最大嘅暗示就係漆黑嘅天空加上暗黃嘅街燈，一架車正正喺北大嶼山公路奔馳，相信醒目嘅觀眾都知道係去機場莫屬，難度三間半夜去上述嗰啲遊客區玩咩？凌晨請我去，我睬你都傻啦！
-
繼續沿著北大嶼山公路奔馳，飛過每一個街燈都證明同機場嘅距離越嚟越近，同時亦都表示自己離開呢度嘅時間正在一分一秒咁減少，車廂上彌漫住沉重嘅氣氛，大家都專心望住車窗外最後喺呢度嘅景色，用最後一章記錄落嚟。
-
而我就不斷回想咁多年喺呢度嘅成長片段，有開心與唔開心；有幸福與厄運；有微笑與落寞……就係呢啲回憶造就咗我嘅成長，每一段回憶都係印證住自己嘅進步。
-
無論經過咗啲乜嘢事，至少我都係繼續做自己，向住自己嘅興趣同夢想進發，創辦咗「前度超渡株式會社」，繼續用自己獨特嘅能力幫人，我亦都有好好嘅家庭同友誼，我有一個好好嘅阿媽，又有一個好好嘅女朋友，當然不可缺少嘅工作得力助手-腎仔啦！有齊呢啲，我人生已經係贏晒，真係已經無悔，好感恩人生路上可以遇到佢哋，可以陪我度過上半生。
-
而家就等我開始踏上呢個無盡嘅旅途，喺一個陌生嘅地方展開全新嘅下半生，活出一個新生活。
-
（待續 To be continued）
IG：chingchingstory