<<我有嘅超能力竟然係⋯>>: 第六章 能力

同一刻有一把聲係四面八方傳過嚟。

「你記唔記得你果日㩒咗入一個網址？我係網址標題寫住請你小心，點解你仲係唔聽我勸告？」一把迷之聲向我講。

「你就係Dr？你果個網我以為係釣魚網嚟。」
我周圍望。

「我叫Dr，係你前一位繼承人。呢一個空間係一路以嚟，由第一位創始人留落嚟俾我地各屆會面同解釋嘅地方。唔受時間限制，聽落好荒謬，但事實遠遠就係咁。」Dr同我講。

「繼承？咁即係你⋯已經係過去咗？咁點解我會係你選擇嘅人？你又係點解會變成咁？」我好疑惑咁問。





「係，我都係隨機搵人，而我點解會咁，只可以話每個人都有副作用，我係因為大腦資訊接收過多所以令我負荷過大而死，你嘅話我唔知。但希望你可以運用多啲你所擁有嘅野，你啱啱咪見到有紅色嘅水晶嘅，果粒係可以令你多一種能力嘅水晶嚟。但唔係每次都會岀現，自己探索下啦！」Dr講完就無再回應。

而我拎住水晶，粒水晶顯示咗兩種能力，一樣係可以抽走一個人部份記憶，另一樣係放棄宜家擁有嘅超能力。

我即時諗起啊勤因為另一半嘅岀軌，所以無辦法安心入睡。每一晚都係因為呢件事而感到煩惱同傷心，我都為啊勤感到抱歉，要佢重提舊事，好想為佢岀一分力。

但我配唔配擁有呢個能力呢？而且我又唔知道會有咩副作用岀現，但係既然都未試過，無理由咁就放棄㗎！所以我選擇咗抽走部分記憶。

我拎起關於啊勤嘅書，搵到果幾頁寫住佢唔開心嘅回憶，用力一扯。張紙慢慢地消失，唔知係咪咁就可以幫到啊勤。





從白色世界岀翻嚟嘅我，感受到右手仲有少許痛楚，但比起第一次～已經好咗好多，我再叫一叫醒啊勤。

「醒啦！你點啊，有無好啲？」我問問啊勤。

「我又訓鬼著咗啊？都唔知搞乜啊我，個頭痛痛地咁。」啊勤覆翻我。

一晚咁就過去，翻屋企嘅途中我諗起啊怡一開始俾人玩弄呢件事嚟睇，會唔會因為果個男仔係佢心入面種落一個報復心態，而佢就將呢個心態投放咗係啊勤身上。

或者香港就係因為有一部分人成日做埋晒呢類野，令一啲原本行正途嘅人行歪路。





今日又係我放假嘅日子，所以我又再一次食完個早餐先翻屋企訓。

「咁啱嘅，Dee！」一把熟悉聲音叫我。

「咦！稀客喎！咁都見到你嘅。」我回應。

「唉！唔好提啦，呢排好煩啊，連訓都訓唔好，我同你都十幾年兄弟啦，咁都唔知我發生咩事㗎咩！」佢向我講。

呢個人叫啊由，佢係我小學同學，到宜家都仲有聯絡，可以話係最長最了解我嘅人。

「搞乜啊！講嚟聽下先？」我問佢。

「挑！要我開口就無引啦！平時打機去街又唔叫！」啊由講。





啊由就係咁嘅人，佢好中意講啲唔講啲，想你親口問佢佢先會有個滿足感，但其實有時我真係唔太想知，所以都會hea下佢就算。不過今日有一點令我好在意，佢話訓唔著，或者我可以幫到佢。

「搵日約你食飯先再傾啦，我今日好攰。」我同啊由講。

同啊由講bye之後我就翻咗去，同ok妹報到之後就訓教。