毒撚大挑戰之女神要離開了！？: 陸-迎新營

成日都有人話，o camp一世人得一次，一定要去。大學可能係嘅，但係我都未讀大學，啱啱升中學咋喎。

8月12號

街上一片白/黃海，但係阿兒呢？我都唔知。淨係知佢同我唔同班。

我發覺香港啲學校有一個傳統，就係第一日返去，就要聽校長嘅一番「肺腑之言」，好聽啲就肺腑之言，難聽啲就叫鳩噏。

當然，我呢啲粗魯人梗係叫做鳩噏啦，因為年年都係講差唔多而且毫無意義嘅嘢。好彩係喺禮堂講，唔係我覺得我已經暈撚咗。





聽完校長鳩噏之後，就返去等啲F5哥哥姐姐教我哋喺新學校有乜規矩。

聽佢哋噏完一輪之後就話學校有過一人一樂器計劃，F1仔一定要學一樣樂器。

其實我都唔明，點解一定要學樂器，冇音樂天份得罪咗啲乜，好似仲話要計埋入考試分入面，我仆你個街。本身唱歌唱到成個技安嘅我音樂都唔慌好，重要夾硬將我冇學過嘅樂器計埋入考試分入面，仲唔冧硬班。

跟住我睇咗啲樂點樣玩，發覺好似都係打鼓最啱我。梗係，其他嗰啲樂器難用到死。打鼓就係揸住碌棍係咁敲個鼓就搞掂，除非佢無啦啦教點樣花式揸住碌棍。

上晝時段冇見過阿兒，其實大拿拿成個月都冇見過。希望食飯嗰陣可以見番。





天公依然係不造美，食飯見唔到阿兒不特止，仲要冇人陪我，不過唔緊要，新環境唔熟習得自己一個好正常㗎啫。尤其是我嗰班仲要冇熟人。

跟住下晝唔記得做咗啲乜。不過我敢講，冇阿兒嘅生活真係頹咗好撚多。

夜晚

我:仆街，我件PE衫呢？

老豆:係咪你唔知收埋咗去邊呀，叫你平時收衫嗰陣擺返落自己個櫃桶度㗎啦，又唔擺。





是咁的，之後3日都有活動要著PE衫，但係我搵唔到，但係聽講搞嗰個活動嘅阿sir好撚惡，驚佢屌到我仆街。

我心諗:天呀，同我死件PE衫出嚟喇。

講清楚先，我唔係耶撚，只係驚畀人屌。

我:唉唔記得咗件PE衫未攞。

老豆:咁你聽日著乜返學。

我:我會諗辦法㗎喇，唔使驚。

最後我揀咗件同PE衫質地好似嘅粉紅色衫返學。

第二日





返到去又要聽老師鳩噏，我淨係記得我返到去嗰陣我件褸吸引咗其他人嘅目光。

阿賈:嘩咁熱你仲著褸嘅。

我:係呀。

我終於喺我間中學到講第一句嘢。冇計啦，毒撚係要攞呢啲嚟打飛機。

聽完老師鳩噏之後返到課室，個timetable上面寫話乜英文銜接課程。心諗仆街了，依間係一間英中，唔識英文真係好大鑊。

同個老師打完招呼之後畀咗本嘢我哋。我一打開嚟睇...

我心諗:到底一點鐘兩點鐘嘅英文邊個F1仔會唔識。





係㗎，本嘢係真心戇鳩。啲嘢好似由幼稚園、小一開始重新教咁。最慘嘅係，竟然要上三個鐘，即係要聽啲小學雞嘢聽成三個鐘，真係人都癲。雖然我英文唔好，但係都差極有個譜呀，邊可能一點鐘兩點鐘都唔知點寫呀。

跟住我再揭，我直頭O撚曬嘴。

鉛筆，原子筆，擦膠，間尺。冇理由一個F1仔唔識喇啩。真係唔識嘅話晨早去咗隔離band3學校讀啦。

三個鐘就咁過去了。

跟住又係自己一個柒撚懵懵食甜筒咁去麥當勞食嘢，跟住見到有人send嘢嚟。

小同:阿兒食嘢.jpg (真係相嚟)

我見到嘅係阿兒同小同、一大班新識嘅人一齊去食嘢，但係我只可以自己一個坐喺M記度食嘢，真係好撚葡萄。唔通呢個就係樣嘅問題？

返到去成個下晝都係喺度同成班人玩下啲小遊戲咁啦，不過我都係冇投入到，畢竟始終都係新環境，未適應到。同埋我唔慣同咁大班陌生人玩。





第三日

返到去第一樣要做嘅嘢又係嗰個悶到死嘅課程，今次嘅嘢更加令到我大開眼界。

佢竟然係講交通工具。呢個唔係應該幼稚園就要學㗎喇咩，點解佢會覺得F1仔唔知道巴士地鐵的士英文係乜。

喺個咁悶嘅環境下，令我更加快想見到阿兒，亦都令到我更加頹。成堂都唔知喺度做緊啲乜，昅女又唔係，昅仔又唔係(非基)，做嘢都唔係。

食飯都係好似之前咁，見唔到阿兒，又係得自己一個喺M記度食。令我呢幾日嘅生活悶上加悶。

返到去個人就更加頹。因為完全冇嘢做，又唔畀瞓覺，焗住要同陌生人玩。同埋我嗰班啲女嘅質素真係... 應該點講好呢？就係蝦蝦霸霸成日講支那話又老牛聲囉，樣就更加唔好提。同阿兒爭好遠。

Hea hea地又過咗一日。





之後嗰兩日都冇乜可以講啦，因為都係上嗰個課程，我冇聽書直接瞓覺。至於嗰個活動我都冇乜點幫過手，只係一個飯桶咁坐咗喺度。

8月19號

今日係最後一日迎新營，呢幾日真係生不如死。冇得同阿兒一齊，又冇朋友。終於喺今日可以得到解脫，成個人即刻開心返曬。

臨走之前就每班派一條仔一條女出嚟Present我哋係呢幾日做咗啲乜啦，再搵幾個人嗌自己嗰班嘅口號，跟住再播片睇下我哋喺呢幾日做咗啲乜咁囉。不過條片冇我出場，正常。因為我呢幾日根本就冇做過任何嘢。

講完即刻成班友沖咗落地下直接通過校門走出去，我都係其中一個，仲喊埋出嚟，因為...

我仲未撚做曬暑期作業呀屌你老母!!!!!