「即係我哋係8月21嘅08:15飛,搭AC520 …」雲雲攞部電腦出嚟講。
 
暑假嘅時候,我哋親愛嘅香港政府終於搞到個「旅遊氣泡」(TRAVEL BUBBLE) ,可以免14日疫就可以周圍玩。
 
由於淨係有亞洲,所以我哋就決定去泰國布吉。
 
「我要去玩水!」雲雲同我講。
「我要去陽光海灘!」我同雲雲講。
 
我哋已經初步睇哂啲行程(機票、酒店等),而家我同我啊媽就去咗雲雲屋企到傾,同埋…


 
比錢。
 
「…8月25號嘅20:45,我哋就搭返AC594返嚟香港,就係咁啦~」咦,原來雲雲已經講完啦喎!
 
「如果ok嘅話就可以book架啦~」雲雲對住佢啊媽講。
 
「等我哋再睇下先~」我啊媽講。
 



 
過咗陣,兩位啊媽終於詏掂數,過程真係「火花十足」!我同雲雲就喺梳化度打機,周不是就望下兩位「金主」然後苦笑下咁。
 
最後,我哋嘅行程大概係咁:21/0808:15-12:00Hong Kong✈️Phuket, (AC594)13:00-SPLASH JUNGLE PARK22/0809:00-16:00SPLASH JUNGLE PARK 18:00-KARON BEACH & DINO PARK(MINI-GOLF)23/08ALL TIMEOUT ISLANDS & PATONG BEACH24/0810:00-18:00FLYING HANUMAN (ZIPLINE)&PATONG BEACH 17:15-19:30Phuket✈️Hong Kong, (AC520)8月19號,雲雲、細細粒、Ava同我又約咗出嚟玩。
 
等等,想補充嘅係缺席咗好耐嘅Coco,唔知大家仲記唔記得佢呢?
 
Coco已經返翻日本,所以大學之前都唔會返嚟(旅行除外)。
 
記得嗰日送佢機…


-----------------------------------------------------
「其實點解你要返日本嘅?」我問Coco。
 
「冇呀,阿媽話想返翻去日本喎,佢話…」Coco𢯎哂頭咁答我。
 
「哦~ok~」我打斷咗佢。
 
「唔~」
「記得得閒就返下嚟呀!」
「Of course!」
「拜拜~」
 
望住佢行入禁區之後,我就喺度諗:
 
原來身邊嘅人去第二度生活係啲咁失落嘅感受。


 
即係好似你落樓下食嘢,最鐘意食而且去親嗰度就食嘅嗰樣嘢突然消失咗咁。
-----------------------------------------------------
8月19號,12:01
 
「嘩嘩嘩!走咗呀架9號!」我望住架9號嘅車尾。
 
「搞錯呀~」雲雲好歎咗口氣。
 
新巴9號線,唔係九巴嗰架,來往筲箕灣同石澳。
 
之但係我哋4個唔係去石澳,而係去鶴咀。
 
鶴咀,香港島東南端,詳情請參閱維基百科。
 


「你呀細細粒,去咩廁所呀,搞到又要等多三四個字啦!」我攞部電話出嚟睇。
 
「係!係我錯,對唔住,我唔應該去廁所。」細細粒舉高兩雙手。
 
「哈哈~」Ava笑到眼都擘唔開。
 
嘩~好靚…
 
咦等陣!點解我會無啦啦諗埋啲咁嘅嘢嘅!?
 
「做咩呀你!?」雲雲冷不防問我。「你對眼啱啱𥄫住邊個呀?吓!?」
 
死啦死啦,女人發火,非同小可!
 
「冇呀,我…我…我…」我連環救火。


 
「我咩呀我,鵝呀你係!?係咁『我』、『我』、『我』!」雲雲好似仲嬲。
 
唉,救火失敗。所以三十六計,走為上計。
 
不過呢,雲雲而家嗰樣真係好Q好得意。鼓起泡腮紅都面哂咁望住我,真係唔係個個頂得順。
 
「我…我去屙個尿先。」我即刻走嘅原因有二:第一,廢時又激嬲雲雲;第二,我驚佢越嬲個樣就越可愛我就會忍唔住錫佢。
 
「嘩X你吖!有口話人冇口話自己!」細細粒搭住我個膊頭鬧我。
 
「我又要去!」雲雲拉著我隻手行。
 
佢個樣依然係嬲爆爆,不過係可愛嘅嬲爆爆。
 


唉,我都唔知點好。
 
「其實你嬲咩姐吓!?」
「哼~唔理你呀!」
 
好失敗?我都覺得。
 
轉個頭,巴士已經兜到去鶴咀,然後就慢慢行入去lu。
 
「幫我影張吖!」行咗都唔夠500步,雲雲就叫我同佢影相。
 
「吓!?」
 
「唔影啦咁!哼~」雲雲即刻走咗去。
 
死啦,雲雲好似真係有啲嬲喎!
 
嗚嗚,不過最慘嘅,係後面嗰兩條友喺度食花生!
 
「哈,底死!」
「又激嬲返佢!」
 
「我應該點呀Ava?」我用誠懇嘅眼神望住佢。
 
「去呵返佢囉。」Ava仲喺度笑緊我。
 
乜真係有咁笑咩?我就笑唔出啦。
 
「How?」
「Use your mouth. 」
 

 
「幫我影張相先!」Ava已經比咗部手機我。
 
「Okay!Deal!」我拿拿林幫佢影相。
 
「咔嚓~」求其幫佢影咗幾張之後…
 
「A~希希~」雲雲又無啦啦走返過嚟拖住我隻手。「快啲幫我影啦~」
 
吓!?
 
佢上一秒唔係唔理我架咩?點解下一秒就唔同哂嘅?
 
不過算啦,佢唔嬲就好啦!
 
一段時間之後,就落到下面石灘——鶴咀海岸保護區。
 
「咔嚓~」
「咔嚓~」
「咔嚓~」
 
喺石灘影咗唔知幾多張相之後,就嚟到真正嘅「鶴咀」——嚿突出海嘅礁石度。
 
「哦~呢個就係蟹洞呀!」
 
蟹洞,係一個比海水浸蝕嘅海洞。
 
所以話大自然真係犀利,海水竟然可以「蝕」個半圓形出嚟,所以就形成咗一隻「眼」。
 
「嘩!好靚呀!」
「快啲埋去影相啦,而家冇人呀。」
 
「咔嚓~」
「咔嚓~」
「咔嚓~」
 
影完之後,就跟住嚿礁石「行」出去海角…
 
吖,唔係「行」,係「爬」。因為根本無條行倒嘅路,而係得啲唔規則嘅石。
 
「嘩!點行呀呢度!?」
「吖!」
 
細細粒都叫做行倒,但係兩個女仔就比較勉強,都係要我扶。
 
「你將隻右腳踏上嚟呢嚿石度啦,然後再捉住我隻手用力踩上嚟啦。」我同雲雲講。
 
唉,其實好難行咩?搞到好似喺度攀石咁。
 
扶完雲雲同Ava之後,就終於上到最高,然後可以向下行落嚿礁石最督督嗰個位。
 
跟住…唔使講都知靚到無得頂啦,真係天涯海角喎!
 
「嘩!小心跌落水呀!」
 
由於係海邊,所以嗰度勁大浪!我哋都係除咗鞋先企出去影相。
 
企到最出海嗰嚿石度,真係好舒服。不時都會有啲浪濺上你隻腳度,太陽晒落嚟雖然熱到可以煎蛋,但係又有種講唔出嘅温暖。
 
呢種温暖,唔太熱,就好似…
 
雲雲咁。
 
「影完啦,你過嚟睇下。」
「哦,好呀。」
 
但係因為太晒,所以根本睇唔到係影成點。
 
不過唔緊要啦,而家睇飽佢好過睇相。
 
肉眼,總好過相;現場,總好過隔住個mon。
 
今日個天好清,東瞻西望,風光迤邐,一望無際嘅view靚到無得頂!
 
但係,時間總係鐘意喺呢啲要流得慢啲嘅時候先至流得好似山洪暴發咁快。
 
「嘩,原來已經4點幾咯,上埋去睇埋啲塔就要搭翻9號出去啦。」
 
結果,又係要行返到先嗰條「路」出返去,所以即係又要我扶呢個扶嗰個落去。
 
嗱,我唔係喺度嫌棄我要做啲咁嘅嘢,而係…而係…
 
算,無嘢,總之我冇嬲啦。
 
「吖!」
 
不過,今次就冇咁好彩,Ava爬落山嘅時候不慎拗倒腳腕。
 
而我就即刻好似啲跌打司父咁幫佢捽下隻腳。我識捽係因為我都試過咁傷,所以我就認住啲捽法然後copy返落佢到。
 
「嘩!好痛呀!」Ava大嗌。
 
「哎呀唔係嘅話就好難行返出去架啦。」我安慰返佢。「你而家試下起身行下睇下係咪行得好啲冇咁痛?」
 
「嗯,冇咁痛啦。」佢對我微笑。「唔該哂你。」
 
雖然Ava隻腳已經冇咁痛,但係我哋回程嘅速度相比入嚟嘅時候都係減慢咗好多。
 
終於喺6點幾,可以迫到落筲箕灣…
 
冇錯,係迫落筲箕灣,因為架巴士真係迫爆,好彩冇超載咋!
 
落到筲箕灣之後,我哋就各自散去。
 
幾日之後嘅8月21號,香港國際機場。
 
「好嘢!去旅行啦!」雲雲一枝戰咁直衝去禁區入閘嗰個位,想追都追唔住。
 
唔係我唔夠佢跑,係因為我要攞住兩個篋。
 
「唉,你跑還跑呀,自己攞返住自己個篋啦。」我暗暗歎氣。
 
「咁唔怪得佢嘅,香港人最鐘意就去旅行,但係因為嗰個XX肺炎,搞到我哋成年半都淨係可以用困住喺香港度,有得去旅行就梗係興奮啦!」細細粒幫我攞其中一個篋。「你唔係唔想去呀嘛!?」
 
吖係,細細粒同Ava雖然唔跟我哋去,但係都專程嚟送機。
 
「黐線!我梗係想去啦!」我想去旅行想到發夢添呀!
 
相信大家都係!
 
「哎呀,sorry!」我唔小心撞到一個C9。
 
「哈,真係迫爆呀個機場,一陣你哋肯定delay呀!」Ava望住塊航班資訊顯示螢幕(Flight Information Display)。「你睇,今日幾多機!」
 
「咁我哋係咪要將呢個功勞榮歸於林鄭特首呀!?」
 
「多得佢,香港人對佢嘅信望上升咗無限咁多percent呀!」
 
「哈哈哈,又零分變做一分!」
 
唔信係無限咁多percent?咁我哋嚟一齊計下數啦喎。
 
Percentage change(百分比轉變)
=(新➖舊)➗舊✖️100%
=(1➖0)➗0✖️100%
=1➗0✖️100%
=ERROR
 
如果你撳計數機,應該出嚟嘅答案會係[ERROR]、[錯誤]等等,總之係計唔倒。
 
但係數學叻嘅朋友就會知道答案係無限(∞),因為任何數➗0就係無限,∞!
 
不過呢個就題外話啦,好,講返我哋準備搭飛機先。
 
「拜拜,記住玩得開心啲呀!」細細粒向住我同雲雲揮手。
 
說罷,我哋就入咗禁區,行埋e道過關。
 
「777閘口,咦,即係要搭嗰架無人駕駛列車喎!」雲雲住指住我哋班機隔離嘅閘口number。
 
「Yes,行啦。」
 
「前往700-800閘口…請在此下車。」
 
10分鐘之後,我哋終於順利到達777閘口。到嘅同時,已經開始登機!
 
「嘩!我哋真係啱啱好!」雲雲喺我哋行緊登機橋嘅時候感歎。
 
「39A、B,呢度呀。」我指住第39行嘅兩個窗口位。
 
坐低之後,我哋就準備養足精神,即係…
 
聽歌瞓覺。
 
50分鐘之後…
 
冇錯,係50分鐘,你冇睇錯我亦都冇打錯。原因係因為控制塔太繁忙,太多機,所以我哋要喺要喺架飛機度等50分鐘。
 
DELAY NO MORE!
 
嘩,但係呢50分鐘呢,真係地獄!我哋前前後後嘅家庭幫我哋呈現環迴立體聲,相信啲話可以自動降燥嘅耳機都敵唔過啲環迴立體聲。所以搞到我哋想瞓都瞓唔倒。
 
DELAY NO MORE!
 
「救生衣係咁樣著嘅…」
「現在機艙服務員會為你指示逃生出口…」
 

 
「Ready to take off!」
 
好嘢,喺機長講完呢句咁重要嘅嘢之後,架飛機終於又龜速行去跑道變成豹速喺跑道度衝刺然後拋上天空。
 
「好眼瞓呀,瞓覺啦。」雲雲挨咗落我個膊頭度恰埋對眼。
 
「一起長大的約定 那樣清晰 打過勾的我相信 說好要一起旅行 是妳如今 唯一堅持的任性…」
 
「手牽手 一步兩步三步四步 望著天 看星星 一顆兩顆三顆四顆 連成線 背對背默默許下心願 看遠方的星如果聽得見 它一定實現…」
 
「這一秒 喧鬧裡 我摸著你的臉 一起尋找你想尋找的那種堅決 下一秒 我淚決 潰堤在那間書店 太多自以為我以為是 錯覺…」
 

 
「…多謝閣下選乘本航班,我哋好高興再次為您服務。」
 
「哈哈…喊~終於到啦。」雲雲伸咗個懶腰。
 
「唔,跟住仲要慢慢排隊過關!」不過我仲係我睡眼惺忪。
 
事實上,我哋瞓得著已經好犀利。因為再講多次,前前後後嘅小朋友完美咁為我同雲雲呈現環迴立體聲。
 
之但係,我哋依然照瞓得着。
 
所以,我哋兩個都係「瞓教」架!哈哈哈…
 
吓!?唔好笑咩!?
 
「噹噹~呼~」好嘢,飛機終於停好個位,而且安全帶盞燈都熄埋。
 
所以,我哋即刻企起身打開我哋頭頂嗰個櫃攞返我哋個袋。
 
十分鐘之後,我哋終於行出飛機,經過登機橋返入機場。
 
入到機場,第一時間就梗係…
 
去廁所啦!
 
難得地,雲雲話女廁竟然唔使排隊,所以慳返好多時間。
 
再行到海關,幸運地,我哋浪費咗50分鐘嘅青春喺度排隊。
 
當出到去攞返自己行李嗰2條運輸帶嗰度,已經有「有心人」將我哋機嘅所有行李搬哂落地下。
 
出到機場,已經成點幾兩點。我哋即刻叫Grab(Uber啲friend)去Splash Jungle Park。
 
Splash Jungle Park,飛濺叢林水上樂園,係一個布吉嘅水上樂園加度假村。除咗水上樂園,仲有泳池咁。都係嗰句,詳情請參閱google。
 
10分鐘之後(其實根本同機場超近),我哋終於到大堂等check in。
 
Check完in上酒店房擺低啲篋同食埋個lunch之後,我哋已經急不及待跳落啲水度玩。
 
返翻酒店房換好衫同搽完太陽油之後,我哋即刻衝去水上樂園。喺呢一刻,我終於體驗倒咩係分秒必爭。
 
「玩邊條好呀?」入到水上樂園之後,我哋行上一個台度,上面有好多滑水梯玩。
 
個台嘅三樓同四樓都有滑水梯,唔使畫公仔畫出腸都知道,四樓嗰啲肯定激好多。
 
「玩條普普通通嗰啲啦,啱啱食完飯好濟呀!」我指住一條可以坐雙人水泡滑落去而且喺三樓嘅滑水梯。
 
「好呀!由冇咁驚滑起。」 雲雲睇落好期待,但係一秒變臉。「但係我哋都冇水泡!」
 
「咦!係喎!」結果我又要跑返落地下抽個可以坐兩個人嘅水泡上嚟。
 
「嘩!睇你個樣好辛苦咁喎!哈哈!」雲雲根本喺度幸災樂禍。「幫你影張相先。」
 
嘩大佬!個水泡唔係好重,但係好大嚿呀!話攞得好輕鬆都偷笑。
 
「一陣你嚟同我一齊攞呀!」我兇佢。
 
但係佢好似從來都未驚過,只係好可愛咁對我伸一伸脷。
 
好困難咁將水泡搬上滑水梯上面再雲雲坐前面我坐後面之後,我哋就等工作人員指示。
 
「Go!」工作人員叫我哋。
 
「喂!郁下啦你!」我叫雲雲。
 
事關個工作人員叫我哋落去,但係我哋根本就郁都郁唔倒,更何況話瀡落去!
 
由於我哋阻住咗後面,個工作人員終於翻咗下白眼之後就「出手相助」。
 
「哈!好廢呀你!」雲雲仲响度笑。
 
I do think so!哈哈!
 
無幾耐,我哋已經衝到落去。
 
「擦…」好彩我係坐後面!因為我哋一衝到落去嘅時候,真係水花四濺。不過雲雲坐我前面,幫我擋哂啲水花。
 
「吖!」啲水花真係食中佢塊臉豬燈,佢即刻揾手勃返臉上嘅水。
 
「哼!」佢用兇恨嘅眼神望一望我。
 
相反,我就一啲「傷害」都冇。
 
請問我做錯咗啲咩呀?
 
「你個身軀太龐大啦,所以幫我擋哂啲水呀。」
 
佢再用兇恨嘅眼神望我,不過今次係兇恨2.0,升級做兇神惡煞,好得人驚呀呀呀!
 
望完之後,佢就氣沖沖咁一個走咗去。
 
截至現時為之,佢今日已經有兩次自己走咗去嘅記錄啦,不過一次係開心到走咗去(喺香港機場),一次係嬲到走咗去。
 
吖吖吖!唔好諗呢啲嘢住啦,追返佢氹返佢先!
 
我即刻快步追返佢然後從後攬住佢,喺佢耳邊講:「對唔住,我都係想氹返你咋,唔係想激嬲你呀,我…」
 
「乜你覺得我真係有嬲咩?」佢拎轉個頭順便錫咗我一啖。
 
「吓!?」我反應唔切,企咗喺原地唔識郁。
 
「唉,冇救啦~」雲雲無奈拎咗幾下頭。
 
而家諗返我嗰時真係蠢咗,我應該打蛇隨棍上去拖住佢雙手。不過無奈事實係,我當時就真係個腦lake咗機。
 
「行啦希希,我想玩嗰兩條高啲刺激啲嘅滑水梯呀。」雲雲即刻拉返我隻手上頭先個台度。
 
「呢條吖,Super Bowl,睇落幾得意。」我提議。
 
「好,就呢條啦。」
 
Super Bowl係一條滑水梯嘅名。我哋會坐住水泡衝落一個「碗」度,「碗」中間有個窿,即係出口。我哋嘅「目標」就係轉到去個出口度然後到下一個玩。
 
結果我哋又重覆返頭先嘅步驟,首先好困難咁坐上個水泡度,然後工作人員出手相助我哋出發。
 
「嘩!」
 
衝到落個碗之後,出口係太陽,我哋係地球,我哋圍住「太陽」公轉。而公轉梗嘅時候,唔知乜水咁聰明整啲水柱出嚟射落我哋度,好似有人揾水槍對住我哋射咁!
 
不過今次唔好彩嘅係,啲水唔會淨係射前面嗰個,所以今次我都被遭殃!
 
「咦,就嚟落倒去啦喎!」由於我哋公轉咗幾圈之後已經無力再轉,我哋就越轉越埋個出口。
 
「落去啦落去啦!」好嘢,我哋已經可以走lu。
 
「嘩!!!」之但係,事實同想像總係差天共地。我哋啱啱好轉過咗個出口呀!
 
不過呢樣都唔係最慘,最慘係…
 
「我哋點轉返去個窿度呀?」
 
最慘係我哋停咗呀!
 
「哈,好尷尬。」我忍若睄倒有鄙視嘅目光,亦都有嘲笑嘅目光。
 
「Shake啦,shake your body,shake郁個水泡。」雲雲講。
 
「唉,頭先喺上面嘅時候我哋連shake落去都唔得呀,何況呢度呀雲小姐!?」
 
無耐之後,終於有救星出現啦!
 
頭先個工作人員又出手相助,佢赤身瀡落嚟推郁我哋去個出口。真係好偉大呀,佩服佩服!
 
唔嘥時間,我哋即刻搬返頭先個水泡行樓梯上台度玩另一個更刺激嘅滑水梯——Boomerango。
 
Boomerango,我哋會由10幾米坐住水泡直衝落地下,然後衝落嚟嘅位能轉成動能衝上去對面都係差唔多10米高嘅牆(當然冇可能會翻倒牆)。衝上牆衝到冇加嘅時候,即係冇哂動能嘅時候,就會掉返轉頭跌返落出口。
 
簡單嚟講即係類似海盜船咁呀!
 
「哇,好攰呀,help!」好重呀個水泡!
「幫緊你幫緊你。」
 
「吖!」
「OH My God!」
 
Boomerango呢條滑水梯係一開始就入咗隧道然後會轉一個圈,轉完之後就可以重見天日,並且成90o咁直咁直衝落下面。
 
喂,我都驚到腳騰騰震呀!
 
「啩,好似就嚟飛出起咁嘅!?」
 
不過呢,設計Boomerango嘅建築師真係去到好盡
我哋衝上塊牆到真係好似就嚟飛出去咁!埲牆先得嗰最多11米高,但係我哋嘅動能就扐到我哋上9米幾高。
 
攞到好盡呀吓設計師,Respect Respect!
 
但係又真係幾刺激幾好玩…吖唔係「幾」咁簡單,係「勁」。
 
跟住嘅滑水梯就…無咩特別,所以喺度就唔講住啦,廢事變旅遊書呀。
 
玩過哂咁多條滑水梯之後,我哋得閒就係咁loop係咁loop上面嗰兩條滑水梯,因為特別好玩同特別刺激,而且仲特別啱我哋兩個玩,可以坐雙人水泡。
 
得閒就落條「漂流河」到「漂」下。
 
「喂,點解唔郁嘅喂!?」我同雲雲坐咗上水泡到,但係根本「漂」唔郁!
 
「正常吖。」我索性落水,唔再坐喺上面唔知做乜。「我去過嘅所有『漂流河』得一條係真係郁嘅姐,就係新濠影匯嗰條。」
 
「落水游啦~」我㧬雲雲落水。
 
咁當然我知雲雲識游水我先至咁㧬佢啦,唔通真係浸親佢咩!
 
雲雲求其將水泡坺埋一邊之後,我哋就一齊喺呢條「漂流河」度游水。
 
「吖,條漂流河又唔係真係唔識郁架啵,我哋都游得快咗。」雲雲講。
 
我哋游嘅步伐、速度都好一致。游緊嘅時候,就好似周圍有海豚圍住我哋游,圍住我哋伴舞咁。
 
除咗海豚伴舞,仲有交響樂添。
 
唔好話我妄想症,係想像力豐富姐。
 
好彩條「漂流河」唔太多人,可以比我哋兩個平排游。
 
再得閒就去個人工做浪池到拋下醒神下。
 
今次呢個人工做浪池就冇呃人啦,真係喺特定嘅時間有浪。
 
「嘩!」
 
我哋喺特定時間嚟咗呢個人工做浪池,仲要行咗去啲唔係好企倒嘅地方。
 
所以一個大浪冚埋嚟,我同雲雲就成個飛起咗。不過落地就慘啲,落地嘅時候就當然企唔穩。
 
我好彩喺落地前吸咗啖氣,所以冇濁親。但係雲雲就冇我咁聰明,搞到係咁咳。
 
「咳咳咳…咳咳…」
 
「你冇事呀嘛!?」我用我最大力氣抱起雲雲上返岸。
 
救生員顯然係高估咗我,淨係望住我,完全冇諗過幫我。
 
不過我又真係唔使佢幫手都搞得掂呢件事!
 
我放咗雲雲喺一張沙灘凳度,等佢抖返順啖氣。
 
「希希你好型呀你頭先!」雲雲終於講倒返嘢。「不過原來你可以咁樣公主抱起我架。」
 
「咁你輕呀嘛,同埋著得少衫…」
 
「哦,即係我要著得少衫你先抱我啦係咪呀吓?」
 
「呃…」
 
「哈,玩你咋。快啲落去再泡多幾下啦。」雲雲扯住我隻手落去。
 
「唔係呀,我哋應該好似池入面啲人咁穿個水泡落去,咁咪唔驚又濁親又剩囉。」我拉返住雲雲去攞水泡。
 
穿完水泡之後,我哋即刻跑入人工做浪池到。
 
「咦!?浪呢!?」
 
唔幸運地,我哋一落到去人工做浪池度,個做浪嘅特定時間就完結。
 
「哈,落嚟打個吉!」
 
「去玩滑水梯好冇呀咁?」雲雲問我。
 
「唔~好呀。」
 
玩玩下,話咁快就到夜晚。
 
我哋決定求其嬲住條酒店毛巾就行返酒店房沖涼,跟住再去食飯。
 
返房各自,係各自,係各自梳洗完之後,我哋上咗架高爾夫球車去餐廳食嘢。
 
間餐廳喺酒店裏面,食泰國嘢。去到嘅時候,啱啱好係日落嘅時間,風景已經非常靚。加埋餐廳出面有條大概200米嘅路,兩旁種滿椰子樹。右邊椰子樹嘅隔離係一個都幾大嘅水池。
 
入到餐廳之後,由於仲早,我哋有幸坐倒一個喺個水池隔離嘅位。
 
原來喺水池再望出去,係一個沙灘。
 
「哦,出面個沙灘咪就係邁考沙灘囉,打卡熱點嚟架!」雲雲興奮咁講,對眼發哂光。
 
「咁我哋一陣出去睇下先。」我講。
 
「睇下嗌咩食先啦,好肚餓呀。」雲雲拎起個餐牌睇。
 
「嘩,好吸引呀~」
「咁貴架~」
「唔食呀~」
「好似好好味咁~」
 
經過一番熱烈嘅討論之後,我哋得出嘅結論係:菠蘿炒飯、雞串、冬陰功。
 
等緊嘢食嚟嘅同時,我哋兩個坺低哂啲袋走出去出面影相。
 
「咔嚓~」
「咔嚓~」
 
之但係我哋都仲未影夠嘅同時,個天已經黑哂。我哋無奈入翻去等篤下機等嘢食。
 
都唔知係我哋香港人效率太快吖,定係泰國人效率太慢,我哋等咗差唔多成半粒鐘連個雞串都未到。
 
「不如我哋入返去入面坐咯~」雲雲指住間有冷氣嘅房。「好熱呀我~」
 
「好呀~我都大汗揼細汗!」我接住問侍應可唔可以坐入去。「Excuse me, can we…」
 
「Sure.」侍應話好,然後幫我哋搬啲嘢入去。「Let me help you.」
 
搬好哂啲嘢入去同撻著埋部冷氣之際,菠蘿炒飯、雞串隨即熱焫焫嚟到。
 
「哇,啲雞串燒到啱啱好!」
「好味呀,同喺香港食完全唔同級數!」
 
食到一半,辣到你飛起嘅冬陰功終於到咗。我嘗試咗一細啖…
 
「咳咳咳…哇…水…水…water water…please…」我辣到嘢都講唔倒。
 
飲咗我諗200ml水之後,個口終於冇咁辣,可以講返嘢。
 
「唔係呀,唔係太辣咋嘛。」雲雲又飲咗一啖。「係咪你咁啱食倒嚄辣椒咋!?」
 
我唔忿氣再𢳂多羹飲…
 
咦~又真係唔太辣喎,應該係廚師見我哋咁細個應該唔會食得好辣,所以先連譚仔十小辣都辣過呢碗泰國冬陰功。
 
食飽飽,就緊係要郁下消化下架啦。「出起出面沙灘睇下咯~」雲雲講。
 
之但係出面沙灘真係咩都冇,冇燈,冇人,得草,得樹,得海浪聲。
 
「黑鼆鼆冇嘢睇嘅~」雲雲周圍望。
 
「啪啪啪…」
 
雖然冇燈,但係經過瞳孔隔咗陣放大咗之後,隱若見到一個個浪大力衝上岸邊,最後變成白色嘅泡退返落海。轉過頭又湧返上嚟,沒完沒了嘅循環。
 
「算啦,走啦,返去啦~」我淨係想快啲離開呢個咁恐怖連人影都冇隻嘅地方。
 
「唔~」雲雲拖住我隻手返去。
 
皇上不負有心人——居然比我哋諗住返去嘅時候揾到新大陸!
 
「好靚呀呢個無邊際泳池~」雲雲大嗌。
 
我哋揾到嘅新大陸,係一個橢圓形泳池。雖然唔係好大,但係勝咗而家冇人,可以包場玩!
 
「嗯,仲要有燈添。」泳池嘅周邊仲要綁咗啲可以變色嘅LED燈,成為一片漆黑中嘅色彩。
 
「咦,我哋而家唔係著緊泳衣架喎。」我哋件泳衣喺袋裏面。
 
「咁咪換咗佢囉~」雲雲一講完再除咗身上面件短袖衫!
 
「吓!?你唔驚…」
「你睇下周圍,人影都冇隻呀!」
「咁不如…唔好著啦,直接游咪得囉。」
「黐線,而家冇咋嘛,點知一陣有冇人嚟呀!?」
「吖,你又啱喎。」
 
用咦幾分鐘著返件濕𣲷𣲷嘅泳衣之後,我哋就開始喺呢個無人嘅泳池暢泳。
 
到到十點幾,我哋決定返酒店房聽日再嚟過。
 
沖完涼吹乾埋個頭之後,我哋就熄燈瞓覺。
 
根據我嘅習慣,瞓覺之前我都會諗一大堆無聊嘢。根據統計,人最多時候,就係喺瞓着之前同沖緊涼嘅諗嘢。
 
而家嘅我仲係輾轉反則,我就喺度諗:
 
究竟我點同雲雲一齊去旅行嘅呢?我唔係唔想同佢去,而係我哋竟然真係發夢咁去得成!多謝天父,多謝上帝!
 
最要多謝嘅係:啊媽!如果唔係佢贊助,我哋根本無可能有錢去!
 
好,多謝完畢。廢事變咤叱。
 
「我要多謝fans!多謝花姐!多謝MIRROR!多謝ViuTv!多謝903…」
 
「吓~要唱歌啦,唔係仲有5秒咩!?」…
 
吖,唔係唔係唔係,呢句唔係!copy錯嘢對唔住!
 
唉算啦,今日舟車勞頓,好攰,好攰,好…
 
「唰唰唰唰…唰唰唰唰…咕嚕咕嚕…吐…」
 
嗯?咩事呀?
 
「咦,你醒啦?」雲雲喺廁所出嚟。「快啲洗面刷牙啦,唔係嘅話趕唔切落去食早餐架啦!」
 
「吓!?哦。」我緩緩落床,行去去廁所。
 
「Be quick please!」雲雲厭我太慢,直接推我入廁所閂埋度門。
 
廿分鐘之後,我哋攞埋篋離開呢間瞓咗一晚嘅房去酒店大堂check out,然後再去食早餐。
 
早餐係酒店自助餐,其實都係食嗰啲嘢,咩腸仔蛋呀,冇人食嘅炒飯呀,冇郁過嘅炒麵呀等等。
 
唯獨有樣超新奇,令我大開眼界嘅嘢出現咗!
 
唔知大家有冇去過灣景國際(The Harbourview) 食自助餐,如果有去過嘅話應該會記得嗰度有部「pancake機」,一撳掣就會自動幫你現場整一塊pancake出嚟。
 
而呢部嘢竟然喺呢間酒店嘅自助餐出現咗!
 
「嘩!部機上面啲字仲係寫繁體中文嘅添!」雲雲一見到部機就話。
 
食完呢場咁「驚訝」嘅早餐之後,我哋當然繼續喺水上樂園到玩爆佢啦!
 
玩到晏晝5點,係時候要離開呢個渡假村,去布吉最最最熱鬧嘅地方——芭東!
 
我哋再一次叫Grab走,唔知呢度啲司機係咪都鐘意揸長途架呢。明明冇比tips但係都近乎我哋一call就即刻有時司肯接單。
 
「其實呢,我哋而家唔係去芭東呀,我哋係去卡隆呀。」雲雲揶揄我。
 
「OH~乜係咩~」我𢯎一𢯎自己個後腦。「A~是但啦,咪一樣,都係隔離咋嘛~」
 
卡隆同芭東中間隔咗座山,所以我話佢哋喺隔離。就好似淺水灣同深水灣咁,又係喺隔離又係隔咗座山…
 
吖唔係喎,隔咗座山咪即係喺隔離囉!廢話太多,對唔住。
 
咦!?但係喺隔離又唔一定係隔咗座山架啵!所以…
 
隔咗座山,等於,喺隔離;
喺隔離,未必等於,隔咗座山。
 
好似落雨同地濕嘅關係。
 
落雨,地就一定濕;
地濕,唔一定落過雨。
 
呢個,就係命題邏輯(propositional logic)。
 
「嘩~好深奧呀,好攰呀,好眼瞓呀,哈~喊~」雲雲聽到一頭霧水。
 
「正宗港女一名…」我細細聲講。
 
「咩話!?你話咩話!?」但係原來雲雲聽力好好。「你試下講多次!」佢仲哄個頭埋我度。
 
「瞓你呀瞓啦~」我一手推開雲雲個頭。
 
「你咁嘈人哋點瞓呀。」雲雲不慌不忙疾我一句,雖然唔知咁樣叫唔叫「疾」。「但係玩滑水梯真係好攰!」
 
佢挨咗落我度瞓,我又順便挨返住佢。唔知個司機會唔會覺得我哋太殘眼而要帶返個太陽眼鏡呢~
 
「梗係啦~」我摸一摸佢個頭。「我哋差唔多每一次玩都行成四層樓梯,不時呀行都行都你攰啦!不過我哋有得玩所以咪唔察覺囉。」
 
「你又對耶~」雲雲無啦啦講咗國語。「水啊(型呀)~」
 
哈,佢仲要變埋台語添,咁唔爭在講埋韓文日文泰文法文德文葡萄牙文俄羅斯文印度文西班牙文啦~
 
「謝謝謝謝。」我又用國語回應。
 
「其實呢,」雲雲又轉返做廣東話,而且突然變得感性喺嚟。「好似真係發夢咁,可以同你一齊去旅行。」
 
「係咩,我發夢都嚟唔切呀。」
「咁我哋跟住就要再繼續去埋下一個地方旅行,就聖誕節去北海道啦,我想睇雪呀。」
「咁快就諗定下一次!?今日係第二日,過咗2/5個旅程咋喎。」
「哎呀唔好理啦,如果我哋可以聖誕去到北海道,就可以一年內都去魂陽光海灘、冰天雪地啦!」
「又陽光海灘,又冰天雪地,哈哈~」
 
「一起長大的約定 那樣清晰 打過勾的我相信 說好要一起旅行 是妳如今 唯一堅持的任性…」
 
瞓醒之後,我哋已經到達我哋嘅目的地。
 
「Wake up!」司機叫我哋。
 
經過個幾兩個鐘嘅遙遠車程,我哋嚟到卡隆。
 
望出去一大片沙,仲有一棵棵椰子樹。有啲椰子樹仲吊咗個千秋添。
 
我哋check in完放啲行李之後,就行出沙灘隔離食夜晚飯。
 
嗰度有大概5、6間餐廳,但係我哋懷疑根本係同一個老細,啲menu完全一模一樣!
 
「都係google translate。」我望住一個叫做「菠蘿裏的海鮮炒飯」嘅菠蘿炒飯。
 
「是但啦,咁求其揀一間啦。」雲雲好肚餓。
 
食完之後,我哋返酒店瞓覺,準備聽日嘅行程。
 
「咦!?8點幾咋啵!去游下水呢不如!」我提議。
 
我哋即刻換件泳衣落去游水,好彩……好彩……
 
「好彩我哋落咗嚟游咋!」雲雲望住前面個酒店泳池大嗌。
 
呢間酒店有幾個泳池,而且每一個泳池都好大!啱哂我哋兩個游水!
 
游到10點幾,我哋無啦啦走咗出去出面沙灘坐喺度。
 
我哋平排坐喺沙度,仰望住片繁星滿天嘅星空。
 
「嘩,我哋未見過咁多星星!你睇下,好似仲有條銀河添!」我指住上面條「光帶」。
 
今晚月色好靚,月光如水,皎如日星,好啱我哋走出嚟。
 
「好靚呀,喺香港一定見唔到。」雲雲用將手放喺望住星空嘅雙眼前。
 
「影低佢囉。」我攞部電話出嚟。「咁光,應該影到嘅。」
 
「與其用部電話嚟影低佢,我會用我對眼嚟影低。」雲雲仲好專注咁望住星空。「我本生俱來對眼,一定好過部唔會跟實我成世嘅電話。」
 
睇多陣睇到我哋條頸都痛之後,我哋返翻酒店房沖涼、瞓覺。
 
「聽日,就終於真係可以『陽光海灘』啦!」我瞓喺床望住天花板講。
 
「起身啦!」雲雲一嘢跳咗上我度。由於我嗰時其實仲未瞓醒,所以真係比佢嚇咗一跳。
 
「你睇下,今日個天幾靚幾清!」雲雲順便打開窗廉。
 
我一開始望唔倒,瞳孔仲係好大。慢慢等佢縮返細之後,我遁眼望出去…
 
嘩!真係天公做美!藍天白雲,海天一色!簡直望出去就好似喺度睇緊動漫畫嗰啲景咁!
 
我哋立即用九秒九速度刷牙、洗臉、換衫、搽太陽油……終於比我哋喺十點幾,出到去卡隆沙灘。
 
「嘩!!!」我兩行鼻血差啲湧咗出嚟。
 
雲雲雖然出面著咗件T-shirt,但係都忍若見到T-shirt裏面,係一件純白色嘅三點式泳衣!
 
「好靚呀!」雲雲對海大叫。
 
軟綿綿嘅細沙,清澈嘅海水,一坺坺白泡,形成一個令人心曠神怡嘅沙灘。
 
我哋行出海邊,任由海浪冚落我哋嘅小腿度。有啲「勁」嘅浪,就冚到上我哋嘅膝頭;「弱」啲嘅浪,就只係掂一掂到我哋隻腳板。
 
但係,無論個浪有幾「勁」有幾「弱」,都總會退。就算一個勁浪冚到上我條褲度都好,都總會退返落海,再等下一個浪冚上嚟,唔可以持續落去。
 
「好慘呀啲浪,永遠衝到上岸都只係嗰一剎那。就算好大力咁衝上嚟,大力到衝到我差啲跌低都好,都擺脫唔倒要走嘅命運。」我望住啲浪除除咁講。「衝到上嚟想摸索下,但係咩都揾唔到就要返翻屋企。」
 
「所以我哋唔要做浪,唔可以只係嗰一剎那,要係持續落去。」雲雲堅定咁講。
 
「唔!」我滿意咁點一點頭。「嚟吖影張相吖,好靚呀呢度!」
 
我哋慢慢坐喺海邊,伸長隻腳浸住海水,再攞枝自拍神棍出嚟影相。
 
我哋臉貼臉甜蜜一笑。咁啱喺手機倒數完影相嘅一刻,一個浪又冚咗上嚟。
 
「咁識睇時間嘅個浪~」我指住個浪。
 
我哋一路沿住沙灘行,去我哋嘅目的地——DINO PARK。
 
呢度係一個以恐龍為主題嘅mini-golf公園,所以入面都有好多1:1(大概係)嘅模型。
 
攞完桿同波,我哋一路直入。入面好多樹,一眼就知好多蚊。
 
「咦!?點解已經part3嘅?」我望住一塊寫住mini-golf嘅牌問。
 
「我哋已經行過咗啦。」佢比我更快洞悉到事實,調返轉頭行。
 
去到part1,我將個波擺喺一塊黑色板上面,即係起點,然後揮桿。
 
前面嗰啲都好簡單,最多都係有個坡仔,有個彎要轉,有個隧道要穿過等等。唔撻Q嘅話可以兩三桿就搞掂。
 
但係我同雲雲都係第一次打,所以撻Q根本成日都發生,家常便飯。
 
但係去到part7,就有條1米倒嘅斜坡要上,大概1:3。
 
咁好正常,我第一下揮桿上唔倒斜坡,掉返轉頭轆返落嚟。
 
打第二桿,我用多咗力去揮。但係由於有啲揮咩咗,結果就…
 
「噗通~」
 
結果,我將個波「法」咗落水。
 
喺條斜坡嘅隔離,就係一條人工嘅溪仔,我就將個波打咗落條河到。
 
「嘩哈哈哈……哈哈哈哈……」雲雲直程笑到腰都彎埋。
 
「哈哈……」我只好苦笑。
 
好彩條溪唔深,我伸手落去就攞到。但係成件事真係好糗,好糗!
 
執完個波再翻越斜坡,終於去到佢嘅終點。之後嗰啲都唔算太難,起碼冇又跌落水!
 
打完都就嚟五點,我哋又要返酒店攞行李走,叫grab去芭東。
 
我哋求其叫咗架篤篤車返酒店,然後又去芭東。
 
去到芭東,終於比較城市!有商場,有BigC,有曼谷包,有酒吧,仲有冷氣。
 
我哋當然快快手check-in,然後去BigC瘋狂購物。
 
薯片、杯麵、零食等等都喺我哋嘅戰利品廣泛出現,目標係塞爆個篋佢。
 
返酒店瞓過靚覺,聽日就係我哋嘅重點行程,出外島!
 
我哋跟咗個一日tour,包去PP島同蛋島。
 
早上8點,我哋準時喺酒店大堂等個tour嚟車我哋去碼頭,然後搭船出島。
 
但係搭船出島嗰50分鐘,真係黐線,泡到𠺘到黐線!
 
呢度布吉個海係同我哋香港十號風球嘅維港一樣,成個海都係白頭浪,之但係而家嘅布吉係天浪氣清。
 
「嘩,而家就真係海天一色!不過天上面嘅白色係雲;海上面嘅白色係白頭浪。」雲雲笑言。
 
好不容易捱過50分鐘之後,我哋終於「到達」PP島。
 
所謂嘅「到達」唔係上PP島。我哋停咗喺近岸,埋邊係一個綠油油嘅峭壁,另一面就係大海。
 
我哋就咁行落船浮潛。好嘢!終於都可以落船啦!
 
天助我也!今日啲水超清,驟眼睇落呢度水深都有五六米,但係都清澈見底。
 
「好靚呀!」雲雲係咁攞部電話出嚟不停影相。
 
水底有好多唔同顏色嘅珊瑚,黃色、藍色都有。
 
唔講已為睇緊《海底奇兵》,多莉(擬刺尾鯛)、MO仔(小丑魚)我都搵得到。
 
至於比利(白鯨)、阿亨(七爪魚)同沙沙妹(鯨鯊)就未見得到啦。
 
見識完呢個咁美麗嘅海底世界之後,我哋就真係上岸去PP島食lunch同行一陣。
 
搞掂完我PP島我哋又出發去蛋島。去蛋島果然係呃錢,首先登島要比錢,然後浮潛啲水又好鬼濁,都唔知去嚟做咩!
 
五點幾黃昏時份,我哋返到芭東。第一時間去睇沙灘到玩下,比浪衝下。
 
但係呢個沙灘同卡隆沙灘差得遠,可能因為呢度太多人,太多污染,好鬼污糟,周圍都係垃圾,水質又唔靚。卡隆沙灘就完全調轉,冇垃圾,水質靚。
 
25/8,09:00。
 
「醒啦!」雲雲又化身成人肉鬧鐘,不斷催我起身。「今日最後一日啦!醒呀!」
 
「Yes! Yes! Yes! 」我即刻就算幾眼瞓都好都要起身。
 
我哋又跟住一個玩飛索嘅tour,所以又係要喺酒店大堂等車接我哋。
 
去到FLYING HANUMAN,即係玩飛索嗰到度,我哋當然要聽咗個安全講解先,然後再著咗啲安全裝備加個頭盔。
 
著完之後我哋就行去第一個checkpoint,係飛索。
 
「嘩咁長嘅喂!」雲雲捉住我。
 
「咩呀,唔係好長咋嘛,好好玩架。」我嘗試鼓勵佢。
 
斷估條繩長100米,即係我哋要飛100米。恐怖嘅係,中間係條河,我哋會飛過條河。
 
「唔會有鱷魚跳上嚟掛。」我望住中間條河。
 
當然,呢句嘢雲雲梗係聽唔到啦,嚇死佢咩。
 
好彩,條河係冇鱷魚。玩緊飛索嘅時候聰明嘅我當然攞部電話出嚟拍低佢啦,仲有selfie。
 
「其實唔驚吖,係咪。海洋公園啲機動遊戲你都夠膽玩咯,呢啲濕濕碎啦。」我同雲雲講。
 
「嗯,又好似真係唔驚。」
 
跟住嗰啲都係咁,只不過有啲係垂直降落,有啲係玩滑板(滑板喺條繩索上面行),去到最後一個checkpoint,就係戲肉。
 
最後一條雖然都係飛索,但係長成500米,而且可以兩個人一齊飛,叫做「蜜月飛索」。
 
我會趴喺度咁飛,雲雲就騎喺我上面坐喺度。
 
飛出去嘅時候,好jeng,終於有雲雲同我一齊,相信雲雲都係咁諗。
 
我把握時間一齊selfie,今次唔同第一次,有雲雲一齊已經天差地遠。
 
「呢張相要做wallpaper!」張相好靚,雲雲太可愛啦!
 
玩完食完水果之後,我哋就落返芭東,跟住,就要返香港啦。
 
我哋沙灘度求其搵咗個位坐,望住夕陽,心裏面肯定唔捨得。
 
「呢四日,過得好快,仲快過自己眨眼,好唔捨得呢度呀。」雲雲望住我講。「唔知我哋下一次係幾時可以再一齊咁去旅行呢?」
 
「你話冬天吖嘛。」我仲記得雲雲喺搭緊車去卡隆嘅時候講過。「冬天我哋一齊去北海道,就可以一年之內又陽光海灘,又冰天雪地。」
 
「但係,我驚,實現唔到。」雲雲拎轉頭冇望我。
 
「咁呢啲嘢我哋控制唔到嘅就唔使理啦,理嚟都冇用架啦。但係我哋要珍惜我哋有,我哋控制到嘅嘢吖嘛。」
 
「唔~」雲雲將頭輕放落我個膊頭度。
 
好温馨,好有愛。
 
其實問心嗰句,我又唔驚咩。但係真係學我話齋,珍惜眼前嘅嘢,永遠冇錯。
 
喺就嚟見唔到太陽嘅時候,我哋終於要走啦。夕陽嘅下垂,終於標示住我哋今次陽光海灘旅程嘅完結。
 
上到飛機,我哋當然又瞓着咗。一醒返,已經降落香港國際機場。