《我強姦咗個女同學》(十四)
因為宛兒,我有張新嘅床同床褥被鋪。

好彩佢揀中瞓落去嘅款係一般普通款,唔係奇奇怪怪或者細路床,否則都唔知買嚟做咩。

不過如果可以,佢揀去瞓梳化或者書檯會好啲,因為我比較想換呢兩樣嘢。

媽媽問我做咩無端端換過張床,我話太耐無用,驚發霉咪換張新嘅,當有一個新開始。

呢個理由真係好合理。



而且過多排,我都搵到工,係做一間實驗室嘅助理。

做咩其實都無所謂,咩都試下,幾好。
入職之後,主管安排我跟一個女同事學下基本嘢先,佢叫斑,話唔好叫「阿斑」或者「斑斑」,就咁叫「斑」就可以。佢係個目測同我差不多年紀嘅女仔,做落同傾開,透過對話内容慢慢會察覺佢應該比我大三至五年,係個幾照顧新人同親切嘅師姐。

佢個位喺我位前面,有塊藍色板間隔住每個位置。檯櫈全部一式一樣,企喺度睇,會覺得個辦公室有啲似兒童樂園裡面嘅迷宮。

斑搵我做嘢時,直接企起身擰轉面就可以叫我,但我搵佢問嘢會選擇打電話,因為我唔太鍾意大聲講嘢,搞到好似好嘈咁。
「嚟緊接咗啲新嘢做,可能會忙少少,你......加班有無問題?」



斑企起身喺位度問我。

我當然話:「哦,無問題。」

「講聲先啫,都唔一定嘅,如果你有嘢做或者約咗人都可以準時走。」

「無問題啊,可以學下安排自己時間。」
就係咁,四號嘅聚會,我有好大個理由支持我兩個月都無出席。



都好,宛兒都未必想見到我。

因為佢真係、已經、連少少都唔再鍾意我喇。

……………….