一個A0毒L和O4女神的故事: 第七章 又唔係第一次被人誤會係變態佬
第七章 又唔係第一次被人誤會係變態佬
某天是平常工作日，朝早下起了滂沱大雨。Rachel沒有帶雨傘，上班時弄濕了上衣和裙子，連內衣也濕透。幸好Rachel之前將一套後備衣服放在公司的儲物櫃，她返回公司後便立刻換衫，以免著涼。
直到午飯過後，Rachel發現她那套濕透的外衣和內衣也不見了。事件驚動了Athena，因Athena之前曾看見阿康走到Rachel的工作枱前，懷疑是阿康偷了，並有非常變態的不軌企圖。
阿康：「冇呀，我冇偷到Rachel件衫呀，冇呀！」
Athena︰「你唔好唔認，我頭先食完飯返嚟，曾經見過你鬼鬼鼠鼠咁走過去Rachel張枱，初時我都以為冇嘢，原來你走去偷Rachel啲衫！估唔到你除咗係纏擾狂、跟踪狂之外，仲要有戀物癖！」
阿康：「我冇呀，我真係冇呀，你信我啦！」
Athena當然不信阿康毫無力量的辯解。Rachel初時也不信是阿康所偷，但看見Athena連番質疑阿康，Rachel也開始懷疑是阿康所為。
當時Johnson和肥媽外出工作，賀叔又不在香港，公司只有Athena﹑Rachel和阿康三人。Athena決定不等Johnson回來，自己親自搜尋阿康的座位，希望找到Rachel的衣服，証明阿康是變態佬，到時便可名正言順地趕阿康離開公司。
不到半分鐘，Athena已從阿康的辦公桌上找到一個紙袋，紙袋裡正是Rachel的衣服。現在是人証物証俱在，阿康百辭莫辯。
阿康不知Rachel的衣服為何會在自己的位置，感到莫名其妙，但所有証據都指向自己有偷女同事的衣服，阿康不知如何辯駁。
「我初時都唔信你會偷我啲衫，點知真係你！你偷我啲衫做咩呀，你真係變態㗎，我信錯咗你！嗚……」Rachel說完此句之後，便哭成淚人。
阿康：「唔係我呀，真係唔係我呀！Rachel你信我啦！」
Athena︰「啲衫喺你個位度搵到，你仲抵賴？你老實認咗佢，我都會覺得你似返個人，我仲可以同Johnson求情，唔報警。」
阿康：「唔好報警呀，啲衫真係唔係我偷㗎，我都唔知邊個擺啲衫喺我個位！」
阿康開始懷疑，是Athena插贓嫁禍。一想到這裡，阿康的心立刻感到很痛，他完全估不到，Athena為了趕走他，竟然要做到這個地步！如果Athena真的這樣做，這會比他被人誤會偷衫，更令他感到傷感和沮喪。
「做咩要報警呀？咩事呀？」Johnson剛剛外出歸來，便聽到Athena和阿康說報警二字。
Athena︰「Johnson，你今次一定要公事公辦，阿康佢偷Rachel今朝落雨整濕咗嗰啲衫，啲衫喺佢個位度搵到，佢仲要唔認。我建議報警！」
Johnson︰「我想攪清楚件事先。我唔係想偏幫邊個，但係偷女同事除低嘅衫係好嚴重嘅指控，我唔想冤枉好人。Rachel，你有冇親眼見到阿康偷衫？」
Rachel搖頭。
Johnson︰「邊個發現啲衫喺阿康個位？」
Athena︰「係我喺Rachel同阿康在場嘅情況底下搵到。」
Johnson︰「點解當初懷疑係阿康偷？」
Athena︰「我食飯返嚟之後曾經見過佢去Rachel個位，仲要鬼鬼鼠鼠。」
Johnson︰「咁你有冇親眼見到阿康喺Rachel個位度偷佢啲衫？」
Athena遲疑了一陣，然後回答沒有。
Johnson︰「我想聽埋肥媽點講，今日佢都喺公司，可能佢知道咩事。佢應該就返，如果問咗肥媽之後都係証明唔到阿康係無辜，我一定會報警，我唔會令我嘅員工受到傷害。」
Athena和Rachel也沒有異議。肥媽whatsapp他們，說自己十分鐘內到達公司。
**********
這十分鐘，對阿康來說，真的度日如年。面對著Athena的指控，他找不到辯駁的理據。如果肥媽也對此不知情，自己便有機會被人告偷竊，同時也失去這份工作。
Athena一直陪伴著Rachel並安慰著她。Johnson也沒有返回自己房間，一直跟他們在一起，以免再有任何爭執。
不久，肥媽返回公司。
肥媽：「你哋聽我講，Rachel啲衫我有攞過出嚟！」
肥媽解釋，自己在午飯前曾在Rachel的座位上拿走了她今早除下的濕衣服，幫她掛在女廁晾乾。但肥媽臨時有要事外出，所以將衣服放在自己的位置，待一會兒返回公司後，再幫Rachel晾起衣服。
Athena︰「肥媽証明到Rachel嘅衫點解會唔喺Rachel自己個位，但無緣無故又點會出現喺阿康個位？分明就係阿康喺肥媽個位偷咗Rachel啲衫！」
肥媽的解釋仍未能令阿康洗脫嫌疑，Athena繼續咄咄逼人地向阿康進迫。
Johnson感到無奈，因肥媽証明不到阿康沒有偷走Rachel的衣服，這下子真的要報警收場。
肥媽：「如果阿康真係偷衫，咁點解佢唔收埋啲衫，仲要擺喺咁當眼嘅地方？」
Athena︰「我哋公司有幾大？冇幾多位置可以收埋啲嘢，佢又冇機會將衫帶走。如果我係阿康，就梗係唔會收埋喺自己locker啦！擺喺枱面就最安全，就好似依家咁，搏大霧扮唔知點解袋衫喺佢度。」
無論大家怎樣找出疑點，Athena都會竭盡所能將責任推在阿康身上。雖然Athena的出發點好像是保護女同事，但眾人也看得出，Athena想置阿康於死地，務求盡快趕走他。
正當Johnson打算報警之際，清潔工芳姐返回公司。大家也忘記了，芳姐每天早上都會到公司清潔，中午午飯時她會返回公司一次，替大家執拾垃圾和做一些小清潔。剛才她遺漏了私人物品在公司，所以現在折返。
Johnson︰「芳姐，你有冇見過呢個袋？」
芳姐：「呢個袋……哦，我見過呀。」
Johnson︰「你喺邊度見到㗎？」
芳姐：「頭時我做嘢嗰陣唔小心整跌咗，之後回頭先見到。我唔知喺邊度整跌，就是旦放返喺其中一張枱。」
大家聽到芳姐的解釋，大約也知事情的由來，應該與阿康無關。
Athena︰「你仲記唔記得放返喺邊？」
「唔……吖，係呀，係呢張枱，因為呢張枱上面都有個一模一樣嘅紙袋，所以我覺得係喺呢張枱上面整跌。」芳姐指向阿康的辦公桌說道。
肥媽：「唉，原來係咁，咁冇嘢喇芳姐，你去做嘢先啦。」
現場的場面有少許尷尬，因為Athena和Rachel冤枉了阿康是偷女同事衣服的變態戀物狂。其實芳姐的說話未能完全解除Athena對阿康的懷疑，因她只說自己將紙袋放在阿康的位置，而証明不到紙袋從哪裡掉下，很可能也是阿康的座位，只不過是阿康夠運，被芳姐弄跌了偷回來的衣服。
Rachel︰「對唔住呀阿康，我怪錯咗你！」
阿康：「唔緊要，攪清楚就冇問題。」
Johnson︰「其實只係一場誤會，好喇，冇事喇，可以繼續做嘢喇大家。」
Athena︰「咁點解你頭先鬼鬼鼠鼠咁走去Rachel個位？」
當事人Rachel已相信阿康沒有偷衣服，阿康也沒有怪責同事們冤枉自己，大家都以為事件已告一段落。誰不知Athena仍然死纏阿康不放，大家也有感Athena不斷針對著阿康。
阿康：「我知，我自己靜靜雞走去佢個位度係唔啱。我見Rachel今朝淋濕咗個身，驚佢冷親，特登食飯嗰陣出咗去買材料，焗咗杯薑茶俾佢驅寒。咁Rachel當時未返，我就放喺佢個位度先，等佢返嚟之後再同佢講，點知之後佢就發現唔見咗啲衫。」
Rachel立即返回自己座位，發現桌面上真的有一個暖水壺，打開蓋後，飄來一股薑味的香氣。Rachel立即喝了一口，因薑茶放在保溫壺內，現在仍然是熱呼呼的。
Rachel︰「多謝你呀阿康！好好飲呀！」
肥媽：「阿仔，你頭先做乜唔講你去Rachel個位係放低壺薑茶呀？」
阿康：「我都唔知我焗薑茶俾女同事飲呢個行為究竟係咪啱，我驚嚇親Rachel，我頭先唔敢講呀！」
Rachel︰「你冇嚇親我呀，我好感動呀！」
Johnson面露笑容地返回自己房間，大家看似也忘記了剛才的失竊事件，各自返回自己座位繼續工作，只有Athena一人不知自己剛才在做甚麼。
**********
晚上，阿康仍然是最晚離開公司的一個。肥媽特意留在公司，想和阿康傾談一下。
阿康：「冇嘢呀肥媽，我冇唔開心呀，你唔使特登留咁夜陪我喎。你返屋企啦！」
肥媽：「你咁樣俾人冤枉係變態佬喎，你連一啲唔開心都冇？」
阿康：「我又唔係第一次被人誤會係變態佬，中學嗰陣都試過兩次，驚動到校長，最後咪又係無嘢。最緊要係今次Rachel最終相信我就得啦，過程並唔重要。」
肥媽：「但係仲有人唔信你呢！」
阿康：「Athena唔信我係好正常，因為我之前真係騷擾過佢，我從來都唔會怪佢。」
肥媽覺得阿康是一個很特別的男生，雖然初時覺得他有點孤僻，不懂說話，非常宅男，而且有騷擾女性的前科。但現在很努力學習與人溝通，而且性格也不錯，不記仇，也不埋怨自己的際遇，更懂得關心人。
阿康自從母親過世後，未試過跟長輩說這麼久的話。他見肥媽不討厭自己，不介意他說話沉悶又長氣，所以毫無保留地向肥媽講出自己的身世、上一份工的不濟和三年內被七位女生拒絕的事跡，肥媽也用心地聽。
肥媽：「日子會過去嘅，人要向前望，老套我都要講。」
阿康：「我最鍾意聽老套嘢。」
肥媽：「既然你鍾意老土嘢，不如你認我做契媽啦！」
阿康：「吓！」
肥媽：「係咪嫌棄阿媽肥呀？」
阿康：「唔係呀契媽！咁我有啲咩要做㗎？係咪要上契㗎？我唔識㗎喎！」
這樣，肥媽收了阿康做契仔。