第二十章 暖男最近有市場嘛!

今天是星期六,ACES女子組又有聚會。她們選擇在中環一商場的著名Cafe食afternoon tea。

Athena向好姊妹坦承說出,跟George的感情變淡之事。

Athena︰「我依家好似搵唔返當初喺埋一齊時嘅感覺。」

Sophie︰「男人就係咁,生活耐咗,對得多,就會開始厭。就算面前係一個咁正嘅女朋友,都唔會再去珍惜。」



Chloe︰「咁又唔好諗得咁灰!」

Sophie︰「我不嬲都係咁諗㗎啦,合則來不合則去,大不了咪分手。以Athena嘅質素,大把市場,唔愁搵唔到更好嘅。」

Esther︰「攪錯呀你,佢哋小小問題就叫人分手,唔通真係『感情問題一律建議分手』咩?早排仲話George攪過啲浪漫嘢,氹返Athena,証明佢唔會冇Athena心吖!」

Athena︰「佢製造過驚喜,但都係做錯事之後先會做,之後又好似變返平淡。好似一個循環咁,嗌交、驚喜、平淡、嗌交、驚喜、平淡,但平淡係佔大多數時間,嗌交就越嚟越多。」

Chloe︰「不如你同George坦承啲,同佢講你有咩感覺啦!咁樣先可以繼續咁一齊行落去。」



Esther︰「同埋拍拖拍耐咗,點都唔會好似熱戀期咁,樣樣嘢都好sweet啦!最緊要係溝通嘛!」

Athena也覺得可能是自己太執著,對George要求也太高。但在她內心深處,依然認為感情是冷卻了。

**********

接下來的一個周末,Athena突然收到其中一位客戶的要求,要改動某些細節。她要跟阿康處理一些文件上的修改,於是打電話找阿康幫手。

阿康:「可唔可以等我食埋個tea先過嚟搵你?你俾20分鐘時間我。」



Athena︰「你喺邊度食緊嘢?」

阿康:「屋企樓下盛發茶餐廳。」

Athena︰「咁得啦,我嚟搵你,我喺屋企。」

說真的,Athena也是第一次來這種屋邨舊式茶餐廳。她雖不是富家女,但後父是做鐘錶生意,公司規模不算大但家住九龍塘,生活算是富裕;她的生父也是做生意的,Athena由細到大,都是生活無憂,所以從未去過公屋的舊式茶餐應,猶其是這種外表老舊、感覺又不乾淨的茶餐廳。

可是,對於阿康來說,這間茶餐廳真的別具意義。從小開始,他的母親經常帶他來這間茶餐廳用餐,已經光顧了超過二十年,有很多美好回憶,餐廳很多員工都和他熟稔。

處理完文件上的改動後,Athena準備離開,阿康邀請Athena留在茶餐廳吃下午茶。其實Athena嫌這間茶餐廳骯髒,打算完成公事後便立即離開,奈何阿康誠意邀請,Athena只好奉陪一下。

Athena︰「你都仲係咁鍾意一個人喺餐廳食嘢!」

阿康:「係呀,都咁多年,慣咗。」



Athena︰「我總係覺得一個人食飯,感覺好怪。」

阿康:「咁睇吓係咩餐廳啦!如果我自己一個去五星級酒店食法國菜,咁就真係怪喇。你望吓周圍啲食客!」

Athena環顧四周,都是單身的中年男人和長者,大多是自己一個來用餐。而且Athena發現,很多男人都用色迷迷的眼光望著自己。

阿康:「大把人自己食飯啦,有幾怪!」

Athena︰「如果係我,我會叫外賣囉!」

阿康:「試吓唔好理其他人嘅目光啦!」

Athena︰「點唔理呀,你睇幾多人望住我哋!」



阿康:「咁唔關事啦,係因為間茶記突然嚟咗個靚女,所以先望者!」

Athena︰「哼,俾人色迷迷𥄫住晒嗰個唔係你,你就講得輕鬆啦!同埋,我都係形住呢度啲嘢食唔乾淨。唔,我都係走先喇,錢我星期一見面時先俾返你,拜拜!」

Athena離開茶餐廳後,兩位和阿康相熟的侍應立即走過去,問阿康這位靚女是誰。阿康回答是同事之後,大家都很羡慕他有一個那麼漂亮的同事。

阿康望著Athena吃剩的半隻蛋撻,呆想了很久。他從這半隻蛋撻當中,看到了他與Athena之間的距離感。

如果將這隻蛋撻縮細一半,然後將其置於五星級酒店afternoon tea的tea set架之上,周遭只有俊男美女望著Athena,而與Athena用餐的是一位樣貌俊朗的男士,Athena肯定會慢慢享受面前的美食。

阿康苦笑兼搖頭。明知他們是兩個世界的人,為何還要痴心妄想?

**********

回家後,阿康換上運動服,準備外出和Dylan一起打泰拳。



Jessie經WhatsApp傳送信息,想約阿康一起做gym。Jessie已不是首次主動約阿康,之前也試過兩次,反而阿康沒有主動約過Jessie。

阿康:
「唔好意思呀
我陣間約咗朋友去打拳呀」

Jessie︰
「唔緊要啦 睇吓陣間喺gym撞唔撞到你🤭」

阿康跟Dylan沒有去獨立的拳館練泰拳,只是在健身中心開辦的泰拳班學拳,和健身室是連在一起,所以Jessie才這樣說。

打完拳後,阿康跟Dylan坐在練習室休息。Jessie再次send whatsapp給阿康:

「今次見唔到你tim


我走喇 下次再約啦😄」

Dylan偷看阿康電話,得知Jessie想約阿康做gym。

Dylan︰「嘩嘩嘩,康哥你一係唔發市,一發就打孖嚟!」

阿康:「你講咩呀?咩打孖呀?」

Dylan︰「我覺得嗰個Jessie冧你。」

阿康:「痴線㗎你,冇可能!」

Dylan︰「咩冇可能,瘦田耕開就有人爭㗎啦!」

阿康:「點會有可能,三個月前佢仲係好憎我,仲鬧我死毒男,點會有可能鍾意我!我同佢做得返friend已經好好!」

Dylan︰「世事嘅嘢就係咁㗎啦!嗱,你之前三年裡面俾七條女拒絕,但依家三個月就令到兩條女鍾意你。康哥最近啲桃花運真係好旺盛!」

阿康:「冇可能,我根本唔會有人鍾意。」

Dylan︰「你個妹妹咪係囉!」

阿康:「呢個唔算啦,係我對佢好似妹妹咁樣錫,佢先覺得我好暖男,先唔小心對我有好感。過多一排佢就知呢啲唔係愛啦!」

Dylan︰「哈哈,暖男最近有市場嘛!你留意下Jessie啦,你feel到佢真係對你有好感,你就去馬啦,唔好諗咁多。咁你就唔使再A0啦,破處指日可待。」

阿康一笑置之。
已有 0 人追稿