一個A0毒L和O4女神的故事: 第二十二章 我唔會痴心妄想去得到佢
第二十二章 我唔會痴心妄想去得到佢
某個晚上，George約了阿康出來講數。
George︰「你條仆街唔好扮嘢，我知你仲係鍾意Athena。」
阿康：「冇呀！你聽我講啦，我真係冇再鍾意佢。」
George︰「冇鍾意佢？你做foodpanda㗎，你做deliveroo㗎，送餐送上門，仲要係自己煮！同事呀可？喺我面前你就唔好扮嘢啦，你呃到Athena但係呃我唔到！」
阿康：「冇呀，你信我吖，我對Athena真係冇嘢！」
George︰「扮晒嘢，扮好人，令到Athena放低晒以前對你嘅戒心，再離間我同佢嘅感情？我呸！冇咁易。就憑你副尊容？定係你間豆腐潤公屋呀？收皮啦死窮撚！」
二人在George所住的屋苑樓下，一直在言語上相持不下，還越講越大聲，開始吸引途人的注意，包括跟George相熟的那個保安。
阿康：「唉，我冇呀，我根本冇諗過要破壞你哋嘅感情……」
George未等阿康說完，便雙手抽起阿康的衣領，用極兇惡的眼神瞪著阿康。
George︰「係咪嫌我兩年前嗰次打得你少呀？係嘅話我隨時奉陪呀，依家打多你幾獲。」
阿康：「你放開我先啦！」
相熟保安見George想出手打人，於是偷偷拍下他們對峙的情況。
George︰「我同你講，唔好再做埋啲多餘嘅嘢，乖乖地做返Athena嘅同事，唔好再對佢有任何非份之想。」
阿康：「我都話冇咯，我要點講你先肯信。我唔會鍾意Athena，亦都唔會同佢咁close，keep住正常同事關係，咁樣好未？你放開我先啦！」
George放開阿康的衣領，阿康退後了幾步，幸好最終踏順步韻，沒有仆倒在地。
George︰「如果你反口，我就唔會好似上次咁，淨係打傷你尾龍骨，我會打到你入廠為止！」
說罷，George逕自離開，返回寓所。
事實上，阿康尾龍骨的舊患，並不是他不小心滑倒而造成。兩年半前，當時的阿康對Athena死纏爛打，Athena不勝其煩。直至Athena和George開始拍拖，身為男朋友的George，看見阿康仍喋喋不休地死纏著Athena，George當然要護花。
當時他相約阿康出來，就像今晚一樣，不過約在更僻靜的地方。他先勸阿康，叫阿康收手，但阿康屢勸不聽，更請求George放棄Athena，多次提及自己真的很喜歡Athena。
George忍無可忍，終於出手，不停對阿康拳打腳踢，阿康只有捱打。George覺得，要對阿康起阻嚇作用，想阿康完全放棄再追求Athena，他一定要下重手，不可點到即止。於是，當阿康已倒在地上，George仍不停手，繼續起腳踢阿康的尾龍骨位置，直至阿康示意不要再打為止。
當時的阿康，要數星期才恢復過來，但留下了尾龍骨的舊患。而自此之後，阿康再也不敢追求Athena，正式放棄。
今晚，阿康被George質問，被懷疑仍喜歡Athena。沒錯，George說得對，阿康真的很喜歡Athena。他對著George說已不喜歡Athena，根本就是說謊。
他覺得自己真的做得太多。為何要煮粥給病了的Athena？這樣子只會影響他們二人之間的關係。他從來沒有想過要破壞他們的關係，只想默默地對Athena好，而今次真的做得過了火。
**********
同一個晚上，Athena仍然寄宿於Sophie家中。Sophie是一名空姐，暫時單身，自己租樓獨居。每次好姊妹有心事，要暫時逃離現實，都會去Sophie家暫住。
Sophie︰「點呀呢幾日，冇見Geroge咁耐，有冇好掛住人呀？」
Athena︰「冇！」
Sophie︰「真定假？」
Athena︰「真！」
Sophie︰「唉，咁分手啦！冇見幾日都唔掛住！」
Athena︰「你唔好郁啲就叫人分手啦！」
Sophie︰「咁係吖嘛，你唔掛住佢，佢又唔掛住你，咁一齊仲有咩意思？唔好再拖喇！」
Athena︰「我唔知呀！啊，真係好煩呀，我又唔係對佢冇晒感情，但感情淡咗係事實。」
Sophie︰「你同佢一齊兩年幾喳，幾時去到老呀？有時啲嘢就係咁㗎啦，呢件事只係一個催化劑，等你早啲認清呢段關係，要結束就趁早，唔好拖！」
Athena︰「等我再諗下先啦！」
Sophie︰「仲有呀！」
Athena︰「仲有啲咩呀！」
Sophie︰「嗰個阿康都唔係啲咩好東西。我由始至終都覺得，佢係有野心想親近你。我唔知佢係咪真係想破壞你同George之間嘅感情，但佢一定有啲嘢。依家講緊嘅係送粥送到去你門口喎！」
Athena︰「係我叫佢上嚟㗎！」
Sophie︰「唔係呢樣嘢！如果我有個男同事病咗，我唔會親自煮粥，同埋唔會送粥送到佢屋企囉！咩事者，同事喳嘛，要咁close嘅咩！」
Athena︰「你覺得，阿康佢仲係鍾意我？」
Sophie︰「係！」
Athena︰「但係佢對個個同事都咁好！唔係淨係對我好。」
Sophie︰「我感覺就係咁。就算係定唔係，你都應該避忌下啦，你仲係同George拍緊拖㗎！要同嗰個阿康保持距離㗎！」
Athena︰「係喇！」
和Sophie傾訴之後，心情雖然沒有那麼忐忑不安，但令她對阿康多了一份戒心。
**********
接下來的一個晚上，Johnson、Athena和阿康一起留在公司，討論接下來的那個泰國客戶的計畫書事宜。
他們離開公司時，就在公司的地下大堂碰見George。很明顯，George來找Athena。
Johnson正準備跟George打招呼，但Athena在George面前「掂行掂過」，完全沒理會Geroge，就知他們吵架，便立即收口。
George︰「Athena！」
Athena聽到George叫她，立即停下來，但沒回頭望。
Johnson︰「我哋走先喇，聽日見，拜！」
Johnson拉著阿康離開。
George︰「Sorry呀，我懷疑你係我唔啱！」
Athena︰「我都有責任，唔係你錯晒。」
George︰「咁你返返嚟屋企啦！」
Athena︰「唔係呢樣嘢，我覺得我哋之間好似爭咗啲嘢，好似好容易就動搖到我哋之間嘅感情咁。我感覺唔到我哋最初喺埋一齊時，你對我嘅關心。」
George︰「我會改㗎，我呢一年因為公司太忙，我承認係忽略咗你。我應承你，我會喺嚟緊嘅日子，用多啲時間去陪你，好冇？」
Athena︰「唔係時間長短嘅問題。你公司有嘢做，唔通我唔俾你做咩？公事要緊，你唔需要刻意用多啲時間去陪我，只要你關心我多啲就夠。其實我自己都有問題，我仲想要啲時間冷靜一下……」
George︰「OK，冇問題，我唔想你煩到Sophie，一係你搬返嚟住啦，我暫時返我屋企住住先，你ready嘅話你再同我講，好冇？」
Athena點頭。
他們二人之間的問題，隨著二人肯坦承跟對方講出自己的感受，得以暫時降溫。Athena還需要時間想清楚，二人日後怎樣行下去。
**********
阿康看見Athena跟George吵架，知道是受自己影響，顯得非常內疚。他想關心Athena，但知道這是不恰當，更何況他答應了George，不能再跟Athena那麼親近，所以他沒有對Athena多做公事以外的事。
同時，Athena也很在意Sophie的說話，開始懷疑阿康對自己有意思，所以二人在公司相處時，顯得有些避忌。
由於阿康和Athena之間突然變得客氣，肥媽和Rachel也覺得他們二人有古怪。肥媽質問阿康所為何事，阿康也堅稱沒有特別事情，令肥媽他們更覺懷疑。
某天晚上，Dylan和阿康在盛發茶餐廳吃晚飯兼閒聊。
Dylan︰「照咁睇落去，Athena同佢條仔遲早散！」
阿康：「唔會掛，嗌吓交者，應該冇嘢掛！如果真係散，咁我咪變咗罪魁禍首！」
Dylan︰「我唔清楚佢哋嘅嘢啦！如果佢哋係真心相愛，一定冇可能因為你嘅出現而鬧交，你又唔係有錢靚仔，你完全係冇威脅嘅人！但依家佢哋面左左喎，嗌交喎，佢條仔仲特登嚟搵你，想郁手打你，好明顯依家係少少嘢就動搖到佢哋。咁你話喇，會唔會散喇！」
阿康：「咁我應該點做？」
Dylan︰「嗱，計我話，你同Athena維持返正常同事關係，唔好同佢太過close，無謂俾人當成係破壞別人幸福嘅賤男。等佢哋分手之後，再慢慢出擊都未遲。」
阿康：「痴線啦，我根本唔想佢哋分手，我更加唔會痴心妄想去得到Athena。」
Dylan︰「你唔好扮嘢啦，你轉工冇幾耐已經話鍾意Athena啦，之後Rachel咁主動你又當人係妹妹，我話Jessie冧你你又唔理，根本你個心就喺Athena度，冇心機再去諗其他女仔。如果佢真係分手，你同佢有同事關係，日對夜對，溝佢都容易啲啦！」
阿康：「鍾意佢我認，但我唔一定要擁有佢。我再去追返佢，只係會再次令佢憎我，而且再返唔到轉頭。」
Dylan︰「點呀，你一世都A0啦，晚晚攬住啲figure瞓覺，長期維持聖人模式啦！」
阿康雖然很喜歡Athena，但他深知自己沒可能得到Athena，他只想待在Athena身邊，一直維持朋友關係，總比表白反令關係決裂好。