一個A0毒L和O4女神的故事: 第二十五章 我想當你係我嘅好朋友
第二十五章 我想當你係我嘅好朋友
Athena收下了阿康送給她的御守，將來的愛情運會怎樣，大家都不知道。但三天後，心情仍未平復的Athena，要承受多一次打擊。
George將Facebook的感情狀況，刪除了Athena的名字。以為他只會將狀況轉為單身，但實情是標籤與另一位女生正在戀愛中。
分手不到三天，George便與另一位女生拍拖，簡直是無縫接軌。
說穿了，就是分手前的事。
多得George父親的穿針引線，George在冷靜期的這段時間，曾與數位年輕女生約會，每位的質素也不俗。其中一個是在George父親任職酒店的中層員工，知道George是酒店高層的兒子，便顯得相當進取，極速取得George的歡心。
George跟Athena分手當晚，該女生得知分手消息後，便主動相約飲酒。當然，二人順利成章地發生了關係，George也認定了她為新任女朋友。
Athena分手的消息一出，傳遍了她整個朋友圈。很多朋友得知Athena分手，舊愛更立刻另結新歡，紛紛替她不值。霎時間，Athena多了朋友致電或者WhatsApp問候。而過了第二日，更開始有單身男約會Athena吃飯。
由於舊愛極速另結新歡，ACES女子組在短時間內再次舉行聚會。三位好姊妹輪流痛斥Geroge是賤男，根本早早已經變心，無縫接軌証明未分手前已跟其他女生過從甚密。罵完一輪，便連番安慰Athena，和他分手是對自己最好的事。
好姊妹的開解和安慰，令Athena心情得以舒緩。
用餐期間，Esther發現Athena手袋掛著一個御守。
Esther︰「咦，呢個御守都幾靚，幾襯你呢個袋。之前都冇見過，幾時買㗎？」
Athena︰「哦，係阿康送俾我㗎！」
Esther︰「嘩，呢個阿康都幾高效率喎，你分手都冇一個禮拜，就送嘢俾你。」
Chloe︰「最重要係你又肯收喎，冇拒絕人喎！」
Athena︰「一個御守者，你哋諗咗去邊！」
Sophie︰「一個御守者！你咁樣會俾到暗示佢，令佢以為自己有機會㗎！上次就係你唔拒絕，攪到嗰個阿康誤會，以為自己有機會，先引發之後發生嘅事。」
Chloe︰「不過講真，依家嘅阿康都唔太差，冇咗啲變態騷擾特質，個look又執正咗。當然啦，同Athena都係相差太遠，完全唔襯。」
Sophie︰「唔係完全唔襯，係一朵鮮花插在牛糞上呀！嗰個阿康最好唔好亂諗啦，我哋嘅Athena咁高質！」
Sophie說罷，便與Athena擁抱。
Sophie︰「不過你真係要小心，嗰個阿康可能會好似兩年前咁，發動強烈攻勢。佢依家可以話係佔盡地利，同你同一間公司做嘢，日對夜對，佢一定唔會放過任何機會。」
Athena︰「你啲妄想症又發作喇。唔好講佢喇，我哋飲杯先啦！」
**********
經Sophie一說，Athena又再次對阿康起了戒心。在公司裡，她刻意和阿康繼續保持距離，當然，阿康也留意到Athena故意將心神貫注在公事裡，所以也沒有再跟Athena談起私事。
Athena暫時沒有將分手一事向父母說起，但徐宏志從其他渠道得知消息，於是立即打電話給Athena，詢問她與George分手一事。
Athena︰「冇嘢，係散咗，唔想你哋擔心先冇講，我冇嘢。」
徐宏志：「你今晚返唔返嚟食飯呀，我同媽咪都好緊張你㗎！」
Athena︰「我唔使你關心，唔使你緊張，你只要同媽咪講我冇事就可以。我依排要忙公司project嘅嘢，冇時間上嚟食飯住。係咁先啦，拜拜！」
Athena如常地冷待後父。在旁聽到Athena講電話的阿康，顯得非常無奈，因他很重親情，覺得Athena跟後父關係不好，非常可惜。
**********
還有數天，Johnson、Athena和阿康便會前往泰國，與泰國客戶見面。由於此經銷商在泰國有一定規模，如果談得成，訂單一定會非常吸引，而且長做長有，Smartoys可更上一層樓，所以大家都很用心準備。
Athena顯出專業，完全沒有受失戀影響。事實上，她用工作麻醉自己，沒有時間想太多，心情反而更好。而打從心底裡，她想Smartoys傾得成這單生意，她在Smartoys的工作便完成，可以完滿離開公司。
臨出發前兩晚，計畫書和所有資料都預備好，玩具樣板也預先速遞到曼谷，基本上所有事情都預備好。但阿康仍一如以往，繼續自己加班，主要也是練好英文，方便跟對方溝通。
Johnson因為要處理公司某些文件，也沒有離開公司。他見阿康仍在，便找他談話。
Johnson︰「咁夜仲未走？啲嘢應該預備好晒，早啲返屋企休息啦！」
阿康：「鬼叫我英文太差，要臨急再抱佛腳！」
Johnson︰「喂，問你一樣嘢吖！Athena甩拖你知㗎可！」
阿康：「知。」
Johnson︰「表面上佢冇乜嘢，但我由細睇到佢大，佢其實好重情。失戀對佢嚟講好大件事，猶其今次好似係不歡而散，佢係為咗公司而死撐住。你同佢熟啲，你記住要睇實佢呀！」
阿康：「點睇實佢呀，佢都咁大個啦，又唔係第一次拍拖，唔係第一次甩拖，我反而冇呢方面嘅經驗，都安慰唔到佢。」
Johnson︰「其實我有樣嘢想拜託你。」
Johnson拜託阿康的事情，是關於泰國的那個客戶。對方公司的太子爺是今次project的負責人，他在這行出晒名，但不是出名有生意頭腦，而是出名咸濕。
如無意外，那位太子爺一見到Athena這種高質美女，一定會藉著自己的身份，向她大獻殷勤，還有機會借勢搏懵。Johnson原本不想帶Athena去泰國傾生意，但Athena英文好，而且交際手段較為熟練，公司沒有一人能及她，所以最終打消這個念頭。
阿康：「咁Athena知唔知對方太子爺咸濕？」
Johnson︰「唔知！」
阿康：「我覺得要俾佢知，等佢有防範。」
Johnson︰「係我自私，我曾經擔心過Athena一知對方嘅人唔友善，有可能會拒絕去，到時傾得成嘅機會就會細好多，所以一直都冇講。」
阿康：「Johnson，你俾得我知，我唔會袖手旁觀。我同Athena講啦，我一定會話比佢知。」
Johnson︰「唔該晒你阿康！」
阿康：「我仲想知，嗰個太子爺喺公司最忌邊個？」
Johnson︰「佢阿媽囉，董事會嘅人，股份又多，太子爺會忌佢三分。做咩事呀？」
阿康：「冇，我諗下點樣克制住個咸濕太子爺。我走先喇，拜拜！」
Johnson想借阿康開口，深知阿康不會坐視不理。阿康也不會讓自己心愛的人受傷害。
**********
當晚，阿康打電話給Athena，打算約Athena吃糖水，順便跟她交代泰國客戶一事。Athena聽到阿康想約自己出來見面，立即顯得避忌。
Athena︰「阿康呀，其實呢，你係咪有啲咩誤會咗？我……我唔知點講呀，但係……」
阿康：「唔使但係喇，根本唔係你諗嘅咁。我對你冇嘢，只係Johnson託我想同你講啲嘢。我強調多次，我對你係冇嘢㗎！」
Athena︰「嘻嘻，係喇！咁好啦！」
他們相約在上次那間糖水鋪吃糖水。
阿康跟Athena有尷尬的感覺。明明之前是一對關係很要好的同事、朋友，但現在又增添了一份不自然的感覺。
阿康：「我想澄清！」
Athena︰「澄清啲咩？」
阿康：「我對你係冇嘢，亦都唔存在任何嘅幻想。請你對住我嗰陣，唔好有尷尬，當我係你朋友，好冇？」
Athena︰「唔好！」
阿康︰「吓！點解？」
Athena︰「哈哈，我想當你係我嘅好朋友嘛！」
二人立即笑得合不攏嘴。
阿康雖然喜歡Athena，但他知道二人根本沒可能拍拖，為免令Athena長期懷疑自己對她有意思，不如老早跟Athena說清楚，自行friend zone自己。他只想在Athena身邊照顧她、保護她，就算做她的一隻兵，也在所不惜。
Athena對阿康的觀感是正面的，但完全沒有愛的感覺。她知道阿康對自己很好，如果確認這份好是來自朋友的好，她會豁出去跟這位異性交朋友。
Athena︰「好朋友，Johnson有咩想同我講呀？佢又唔直接搵我嘅！」
阿康如實將泰國負責人好色的特點向Athena一一說起。
Athena︰「哦，就係咁喳吓，我仲以為有咩特別。」
阿康：「咩唔特別呀，我唔會俾佢抽你水㗎，絕對唔可以。如果你覺得唔舒服，你可以選擇唔去，我一定會盡我百分之二百嘅努力，去攞到呢份訂單。」
Athena望著阿康，看到他堅定嘅眼神。
「合桃露，芝麻糊！」侍應端來二人所點的糖水。
Athena︰「食咗糖水先再慢慢講啦！」
阿康：「唔食住，你答咗我先啦！」
Athena︰「知你緊張我喇！你當我三歲細路哥咩，我唔會俾到佢任何機會搏我懵。我一定會去曼谷！」
阿康：「你點樣唔俾機會佢？如果俾我見到佢搏你懵，我一定忍唔住會fuck fuck聲咁鬧佢，到時又連累Johnson冇咗單生意。如果要我為咗單生意，而見到你受傷害，我又做唔出！」
Athena︰「你同Johnson會睇住我㗎嘛！我信你哋兩個，只要我唔會同嗰個咸濕佬單獨相處，就冇問題啦！」
阿康沒有回應，慢慢咀嚼Athena所講的對策。
Athena看著阿康認真思考的樣子。她心裡在想，如果阿康真的沒有追求她的意思，又對她這麼好，又那麼緊張她，她一定會很珍惜這位朋友。
阿康：「放心啦，我同Johnson一定會睇實你，如果俾我見到佢有啲唔尋常嘅舉動，我一定會過嚟幫你解圍。」
Athena︰「知道喇好朋友！喂，我又想食芝麻糊呀，不如同你兩溝吖！」
阿康：「好呀！」
經過今晚二人彼此之間的對話，鞏固了二人的朋友關係。但如此一來，阿康日後想由朋友再昇華至戀人關係，難度便會大增。