第二十七章 開始口花花喇喎

三人到達目標餐廳。由於早前已訂枱,餐廳侍應立即為他們安排座位。

點了食物後,Athena立即問阿康究竟在出發前做了甚麼,令那位太后突然出現在會議室。

阿康:「冇呀,Johnson同我講個咸濕太子爺最怕係佢阿媽,我從某啲途徑搵到佢email,於是扮send錯email俾佢,forward咗啲產品資料。我只係想佢對我哋產品產生興趣,我哋email互相覆咗兩三次,之後再邀請佢嚟親身睇。我都冇諗住佢真係會出現。」

Johnson︰「你對付呢啲年紀嘅女人係有一手㗎喎!」



阿康:「我同年紀比較大嘅女人係容易溝通啲,唔知點解,哈哈!但Athena根本唔使我幫,佢都係迎刃有餘啦!」

Athena︰「唔係㗎,撐得好辛苦㗎,好彩太后拉咗太子爺返屋企食飯喳!我做得咁辛苦,又差啲俾對方嘅人搏懵,Johnson你要計多啲bonus俾我呀!」

Johnson︰「好好好,加多啲bonus俾你哋兩個啦!」

Athena︰「Yeah!咁飲杯先啦!」

三人高舉酒杯,互相碰杯慶祝。



由於阿康的腳趾被人踏傷,有腫脹,所以不宜喝太多酒。Johnson也沒有特別喝太多,都是普通正常份量。唯獨是Athena,席間喝了很多酒,不停自斟自飲,從不間斷。

Johnson和阿康也覺得,Athena有心事。

雖然表面沒事,但她剛與拍拖兩年多的男朋友分手,心情難免沉重。她用工作來麻醉自己,暫時忘卻了感情事,但今天完成了工作,放下了近期的心頭大石後,又再次喚起她的傷感。

雖然今次出差只有她一個女生,理應不適宜喝太多,但她覺得Johnson和阿康是信得過的人,所以沒有理會那麼多,一下子將開了的酒喝光。

結果,Athena真的喝醉了。



**********

Johnson和阿康合力扶起Athena,將她由餐廳一直護送回酒店房間。過程非常艱辛,因為Johnson也有些醉意,阿康腳趾又有傷,Athena又不是嬌小玲瓏的女生,所以二人感到十分吃力。

他們將Athena放在床上,任務完成。

Johnson︰「嘩,睇落Athena唔似有咁重㗎喎!唉,我都老喇,冇晒力。喂,我哋走喇,唔好阻住Athena休息。」

阿康:「你留多五分鐘啦,我想幫Athena打點啲嘢,你留喺度會好啲,我唔想孤男寡女。」

Johnson︰「唔留喇,我都有啲wing wing哋,我要返房休息。Athena佢之所以敢飲到咁醉,就係信得過我哋。佢信得過你,我又信得過你,咁我就唔理喇!聽朝見!」

說罷,Johnson返回自己的房間,留下阿康和Athena二人在Athena的房間內。

他們二人共處一室,令阿康覺得又有些似曾相識的感覺。上次Rachel借醉行兇,也是他跟年輕女生獨處於一房間內。但今次感覺完全不同,因為跟他獨處的是他非常喜歡的Athena,而且是喝醉了、沒有反應的Athena。



阿康不敢有其他想法,立刻幫Athena脫鞋,然後到浴室弄濕面巾,幫她抹臉和額頭,最後為她蓋好被子。

此時,他看見Athena衣領的鈕扣壓著她的頸項,想幫她解開。由於位置比較敏感,所以他想跟Athena示意一下。

阿康:「Athena,我想幫你解開頸位嘅衫鈕,唔想勒住你條頸。」

當然,喝醉的Athena給不到任何反應。

阿康:「Athena,我冇惡意㗎,我只係鬆你一粒衫鈕。」

經兩次示意之後,阿康幫Athena衣領解開了一粒鈕扣。

完成任務後,阿康打算離開房間。臨走前,他望了Athena一眼。合上眼睛的Athena,仍然能深深的吸引著阿康,令阿康打消了離開房間的念頭。



他坐在床邊的椅子上,默默地望著Athena,想起了很多往事。他們的第一次相見,阿康已被Athena深深的所吸引著。當時可能是被她的美貌所吸引,但阿康現在非常肯定,現在的他,正喜歡著Athena的一切,她的全部,不論外與內。

沒多久,Athena發出了少許鼻寒聲,看來她由喝醉,變為熟睡。

阿康望著Athena可愛的一面,終於忍不住,將自己的嘴巴移近Athena臉上,想有親她的衝動。但他立刻想到,如果Athena突然睡醒,看見自己被他親咀,一定會像兩年前一樣,反面收場。

阿康不想破壞彼此之間的友誼,不想破壞Athena對他的信任,所以最終抑壓了自己的情感,停止了任何企圖想做的不軌舉動。他閉起雙眼,不再讓自己看見Athena的模樣,之後狠狠轉身,快步離開Athena的房間。

**********

翌日早上八時,Johnson按阿康房間的門鐘,急著要找阿康。

Johnson︰「喂,我頭先收到我老婆message,話我個仔今朝喺屋企跌親,傷到前臂,可能斷咗骨。我張機票可以改早,我會早啲返香港,依家就走。」

阿康:「吓,咁急!」



Johnson︰「唔急喇,我老婆好似好擔心,唔返唔得。你唔使擔心,你同Athena可以照原本個plan,喺曼谷stay behind,好好咁玩返日啦!唔講喇,你陣間幫我同Athena講返啦,拜拜!」

其實,他們原本打算今天三人行,在曼谷慢活一日,明天中午才離開曼谷。現在Johnson有急事早走,造就了阿康和Athena今天獨處的機會。

阿康最初以為,Athena一定會很介意與自己二人同遊,可能寧願留在酒店。誰不知Athena一覺醒來,知道Johnson有急事先離開曼谷,除了為他擔心兒子的傷勢外,她的反應竟然是正面。

Athena︰「冇老細喺度阻住,鍾意去邊就去邊,仲好啦!」

阿康:「吓!其實如果你介意,我哋可以分開玩嘅。」

Athena︰「吓,你係咪嫌棄陪我一齊玩呀?」

阿康:「梗係唔會啦,我開心都嚟唔切啦!」



Athena︰「唔會就得啦。等我沖埋涼,換埋衫,補埋個妝,就可以行得㗎喇!」

阿康:「咁係咪要兩個鐘?」

Athena︰「你越嚟越了解女性喇,兩個鐘差唔多啦!我琴晚又冇沖涼,又冇落妝,又著得斯文。今日出去玩,會著causal啲,又要換過個妝,嘥好多時間㗎!咁你等唔等我吖!」

阿康:「等等等,一定等!」

Athena︰「乖喇,等我啦!」

Athena向阿康報以一個非常甜美的笑容,便返回自己房間梳洗。

Athena今早給阿康的感覺,很特別。有少許扭擰,有少許嬌嗲,很有GFable的感覺,和她平時在公司比較嚴肅的舉止完全不同。阿康心想,今天他可以跟一個GFable的女神逛街,真的短幾年命也值得。

**********

不多不少,兩小時後,Athena終於預備好,可以隨時出發。

阿康一直望著Athena。

昨天,Athena穿得比較保守,可能是好色太子爺的關係,就算曼谷天氣熱,也照穿短袖及領裇衫,並扣上所有衫鈕,加上及膝裙,是不會令人有遐想的裝束 (制服癖除外)。

今天,她穿了藍色的小背心,露出了纖腰;下身則是白色熱褲,露出了白滑長腿。再配上淡雅的妝容,以及沒有被束起的深啡長直髮,整副裝束都是阿康心目中女神的最高規格,看得阿康如癡如醉。

「啊!」Athena忽然大聲呼叫。

阿康:「做咩呀?」

Athena︰「你隻腳趾呀!」

由於昨天阿康被太子爺踏傷腳趾,又沒有好好處理問題,長時間被窄身皮鞋夾著,再加上昨晚扶Athena回酒店時過分地用力,以致患處加劇腫脹,現在脹大了起碼一倍有多。今天阿康換上拖鞋,Athena立即留意到阿康的傷勢。

阿康:「冇嘢,係腫咗啲,冇事。只要今日唔著皮鞋就可以,唔會迫住就冇問題。」

Athena︰「你成日都唔關心自己嘅身體,尾龍骨嗰度係咁,依家隻腳趾腫成咁又話冇嘢。唔好喇,今日唔好周圍去喇!」

阿康:「我又唔制呀,難得有全日喺曼谷,我唔會留喺酒店囉。只要著拖鞋,唔壓住佢就唔痛。同埋有你陪我行吖嘛,咩痛都冇晒啦!」

Athena︰「開始口花花喇喎,唔講老土嘢喇喎,有進步喎!」

阿康:「行啦,攪攪吓都就嚟十一點喇,快啲出發啦!」

「怪我化妝化得耐喇吓話?」Athena扁著嘴回應。

這是阿康十分期待的一日……
已有 0 人追稿