一個A0毒L和O4女神的故事: 第六十二章 我哋已經當咗你係自己人㗎喇

第六十二章 我哋已經當咗你係自己人㗎喇

今晚，阿康第一次以Athena男朋友身份，去見Athena的父母。阿康已做足事前功夫，預先買了燕窩作見面禮。

雖然之前已見過世伯伯母，但仍難掩阿康緊張之情。始終角色有變，猶其是Athena的母親，似是會留難自己的人。

他們站在門前。

Athena︰「做咩者你，好緊張咩！」





阿康：「唔緊張就假，第一次見家長嘛！」

Athena︰「咩第一次呀，之前你都見過佢哋㗎啦！」

阿康：「點同呢，當時我哋都未拍拖！」

Athena︰「我爹哋媽咪都好nice㗎，唔使驚啦，入去啦！」

進門後，阿康立刻將見面禮送給藍詠珊，而雙方也說了些客套說話。雖然徐宏志和藍詠珊都是笑面迎人，但阿康總流露出戰戰兢兢的神情。





徐宏志：「喂，康仔，做乜粒聲唔出呀？上次你上嚟嗰陣，好多嘢講㗎！」

阿康：「係咩？唔係呀！」

徐宏志：「唔使咁拘謹喎，我又唔係嚴肅嘅人。」

藍詠珊：「咁又難怪嘅，依家身份唔同咗嘛，依家係見家長喎，點都會緊張啲。哈哈，阿康，其實我哋已經當咗你係自己人㗎喇，全靠你，世伯唔使賣間公司，我又醫得好個病。」

「都……都係舉手之勞者，唔使客氣！」阿康仍然一副難為情的樣子。





徐宏志：「咩舉手之勞呀！我知道你為咗籌呢筆錢，做咗好多嘢，犧牲咗好多。嗱，你都要當我哋係自己人㗎，知唔知道？」

阿康：「係，知道！」

阿康知道Athena父母已當他是自己人，之前的顧慮也一掃而空。

藍詠珊一直金睛火眼地望著阿康。

Athena︰「媽咪呀，做咩者，望到阿康實一實。」

藍詠珊：「冇，就咁睇落去，阿康個樣都唔係好差！上次第一次見，覺得你個樣係差咗少少。你唔好怪伯母講得咁直呀！但唔知點解，依家覺得你越睇就越順眼！」

阿康：「係咩，哈哈，如果係順眼就好喇，哈哈！」

徐宏志：「老婆，不如開飯啦，你攪到阿康塊面紅晒喇！」





藍詠珊：「好！好！」

他們在一片歡笑聲中吃完這頓晚飯。

**********

晚飯過後，Athena想起要從自己睡房拿回某些私人物品，阿康陪同她一起進入睡房。

「究竟擺咗喺邊呢？」Athena在大抽屜裡反覆搜尋，但仍未找到想找的物品，心裡有些不耐煩。坐在床上的阿康，一直留意著Athena。阿康覺得，Athena連發小脾氣都很可愛，看得他如痴如醉。

Athena發現阿康正望著自己，但又不幫手找，心裡為之氣結。

Athena︰「做乜又樣衰衰咁望住我！幫手搵下啦，係一個銀色嘅LV鎖頭。」





阿康：「我幫你喺書枱嗰邊搵下啦！」

阿康打開Athena書桌上的抽屜，尋找鎖頭的下落。不過，鎖頭未找到，他又再次看見上次參觀睡房時所看到的東西：貼在書桌上、Athena跟第二任男朋友Thomas的合照。

阿康對於自己女朋友在舊屋睡房的書桌上，仍貼著跟前任男友的合照，並沒有吃醋的感覺。不過，阿康有另一種很強烈的感覺。

Athena與Thomas分手後，已經歷了兩段戀情。現在跟阿康拍拖，已是第三個男朋友，但她仍沒打算將此合照拿走。當然，這只是一件小事，Athena之前也解釋過，她已很久沒有用過這張書桌，裡面很多物件多年來也沒被移動過，她也懶得去移除這張照片。

不過，阿康覺得，如果她有心去移除一張陳年相片，這又有何難？再加上上次他問過Athena關於Thomas的事時，Athena也有少許支吾以對的感覺，並不想正面回答。所以，阿康覺得，直到目前為止，Athena仍未能完全忘記這個Thomas。

究竟Thomas是一個怎樣的人，可以令Athena多年來都放不下他？

抑或是，這只是阿康的多疑，Athena其實已早早忘記這位過客？

阿康也沒打算再深究這問題。沒多久，阿康終於找到了Athena的那個LV鎖頭，任務完成。





除了鎖頭，阿康在抽屜裡，還發現了一本相簿。

阿康：「Athena，我可唔可以睇吓呢本相簿呀？」

Athena︰「可以呀，我哋一齊睇吖！」

那本相簿，放滿了Athena的舊相。由剛出世時所拍下的嬰兒照，以至兒時可愛的照片，再到小學、中學時代拍攝的，都應有盡有，再次看得阿康如痴如醉。Athena的樣貌，確實是由細靚到大，純天然，一定沒加工過。

相簿的最後，是十數張大學時的相片，包括三張單人照、兩張跟女同學的合照、數張跟一大班同學所拍的大合照和數張畢業相。阿康發現，Thomas均出現在那數張大合照之中，而畢業相則沒有他的蹤跡。雖然二人沒有親密的動作，但每張合照當中，Thomas均在Athena身旁。

很明顯，Athena和Thomas是在大學時相識，在大學時開始交往，在大學時分手。

阿康發現，Athena讀大學前的相片，很多時都穿著鮮色衫，和現在的打扮有很大出入。細心一看，她是在讀大學的時候有此轉變，轉為多穿冷色系或者沉色衣服，很間中才穿白色，鮮色已絕跡。





阿康相信，這轉變可能是來自Thomas。當然，女性的喜好可以隨年齡而有轉變，但她轉變得實在太快，除非大學時期發生了甚麼特別事件，否則，一個人的喜好沒可能變得那麼快。所以，阿康深信，Thomas對大學時期的Athena，影響極為深遠。

Athena︰「做乜睇到呆晒？」

阿康：「哦……冇嘢。相入面嘅你實在太靚喇，睇到我呆晒，嘻嘻！」

Athena︰「扮嘢啦你，一定諗緊其他嘢。唔理你，我上網睇吓有咩要買先。」

Athena拿出手機，登入某個購物網站，準備網上購物。阿康靜靜地偷看Athena，發現Athena輸入的密碼，有似曾相識的感覺：

「Lee921014to」

「921014」，很明顯是日期。阿康立刻望向書桌上的那張照片，發現照片上的字句「Happy 20th birthday / 14 Oct 2012 」，証明Thomas是1992年10月14日出世。Athena所使用的密碼，正是Thomas的生日日期，而日期前後，相信是他們二人的英文姓氏。

也許，Athena就是那種長期也不會更改密碼的人，用慣了一組固定的數字做密碼，就不會輕易改變，最多只會加上少許變化，便成為不同戶口的登入密碼，風雨不改。事實上，往後的數個星期，阿康也有留意Athena登入不同網站和APP時，輸入的密碼，都是由Thomas的生日而衍生而成。

其實，這樣也不算出奇，Athena也很難改變得到這種習慣，而阿康也未致於會因此等小事而生氣。但現在阿康以這種方式，多發現一樣Thomas在Athena日常生活中所留下的痕跡，阿康少不免會有一點擔憂。

阿康：「Athena，不如我搬去你屋企同你一齊住吖？」

Athena對阿康這個突如其來的同居要求，顯得有點愕然。

Athena︰「做乜無端端講呢啲？」

阿康：「你呀，都唔識得照顧自己，你自己一個住我唔放心嘛！」

Athena︰「你多啲上嚟搵我咪得囉，唔使一定同居。」

阿康：「我好想好想成日都見到你，每晚可以攬住你一齊瞓，每朝可以一起身就見到你瞓喺我身邊吖嘛！」

Athena︰「你呀，梗係晚晚都想曳曳啦，咸濕呀你！」

阿康：「梗係唔會啦，我只係想好好咁照顧你。你上次咪問過我，有冇諗過我哋嘅將來嘅！我有諗過㗎，我想買樓，去建立我哋嘅愛巢。我計過，最少儲多兩三年錢，應該夠俾首期買到一間普普通通又唔太差嘅私樓。我對你係好認真㗎，唔係玩玩下㗎！」

阿康提出同居要求，和說出對Athena的承諾，目的是想盡快牢固二人之間的關係。雖然他們公開戀情還不到三星期，如果阿康單方面向對方迫得太緊的話，可能會有反效果。但不知為何，阿康很在意那個Thomas，生怕這個最強前度會回來搶走Athena。

雖然Thomas已經移民，可能這輩子也不會回來香港，但阿康總有預感，Thomas可能會出現。所以，阿康不可讓自己鬆懈，一定要有所行動，去鞏固二人的關係。

Athena對於阿康突然提出的承諾，感到有點詫異，但也有窩心的感覺。她的每一段戀情，除了初戀的puppy love之外，都不是玩泥沙，不是只求拍拖、只求有個伴侶便算，而是每次都會認真地看待。

Athena拖著阿康的手，說：「知道你對我認真喇！好啦，一齊住都得，但我瞓房，你瞓廳啦！」

「吓！咁樣呀！唉，都好啦，只要一齊住就得啦！」阿康一副委屈的樣子。

Athena立即大笑，說：「我又點會俾你自己一個瞓廳喎傻佬！」

這樣，他們開始了同居生活。