一個A0毒L和O4女神的故事: 番外篇 - 感受三十七度的體溫 (2)
番外篇 - 感受三十七度的體溫 (2)
Edan的女朋友，正是Rachel。
Rachel差點被Edan強行硬上得手，顯得非常悲傷，獨自坐在地上，抱著膝頭痛哭，久久未能平復情緒。
Edan眼前的畫面，完全不是自己心中所想。原本以為是二人的纏綿初夜，現在差點變成了性侵女友。
Edan︰「Sorry呀Rachel，我……我都唔知點解會變成咁！我以為你叫我上嚟，係暗示想同我發生關係！Sorry呀，我真係冇心㗎，你原諒我啦！」
Rachel︰「丁俊森，你淨係識得諗呢啲嘢！你頭先話有嘢想同我講，我見屋企冇人，我又唔想再落街，咪叫你上嚟傾囉。可能我呢個決定令你有誤會，但你可以上嚟慢慢同我講，攪清楚件事先㗎嘛，而唔係好似你依家咁樣對我！」
Rachel由當初的傷感，變為現在的憤怒。
Edan︰「我……我都唔知點解會攪成咁，我……對唔住呀Rachel，我真係冇心㗎！你原諒我啦！」
Rachel︰「你走呀，今晚唔想再見到你！」
Edan︰「Rachel……」
Rachel提高聲線︰「我叫你走呀！」
Edan無奈地離開。
**********
Rachel坐在沙發上放空。幸好，她慢慢平復了情緒。
她隨即想起很多與Edan之間相處的往事。
Edan雖是一個不善於表達的人，而且有時會粗心大意，但他對Rachel很好，事事照顧周到，對Rachel愛護有加，Rachel在他身上找到以前拍拖所欠缺的感覺。
可是，跟Edan相處愈久，Rachel便愈感害怕。她很喜歡Edan，所以很怕Edan會像以前的男友一樣，對其付出所有之後，便會捨她而去。
Rachel自知不能承受失去Edan的痛，她愈害怕，對Edan便愈有保留。她生怕對這段感情付出太多，對方不懂珍惜，便會重蹈之前數次戀情的覆轍。
Rachel很想找人傾訴。她有一位好朋友Elise，由中學便認識對方，每次她有心事，也會與Elise傾訴。不過，自從跟Edan拍拖之後，她已很少找Elise傾心事，因為Elise的身份比較特殊。
Rachel最終也決定打電話給Elise。
Elise︰「陸凱兒，做咩咁夜打俾我呀？你好耐都未試過咁夜打俾我囉喎！我知喇，梗係阿哥激嬲你，同佢嗌咗交啦！」
其實，Elise是Edan的親妹。
自從Rachel跟第三任男友分手後，她一直未有拍拖。她確實有一段時間喜歡了阿康，但她知道阿康喜歡的人是Athena，她自知沒有機會，便努力去忘記阿康。但過了好一段時間，她仍未能好好消除對阿康的思念。
直至一個機緣巧合的情況下，她在與好姊妹Elise的約會中，認識了她的哥哥Edan。
Rachel對Edan的第一個感覺是，他很像阿康。這不是說Edan的容貌很像阿康，因Edan的樣貌比阿康好。Rachel覺得，Edan不論在性格、嗜好和行為舉止上，都很像阿康。
Edan很喜歡收藏figure和砌模型，性格比較內向，和新相識的人很難打開話題，也不喜歡人多的地方。但相識一段日子後，發覺他很懂得照顧身邊的人，是一名暖男。Rachel從Edan的身上，找到溫暖的感覺。
當然，二人最終也順利成章成為情侶。
Rachel︰「我唔知點講呀！我一直都好少同你講我同佢嘅嘢，因為你係佢個妹，你同佢又太熟。但我同佢之間嘅嘢，我唔知可以搵邊個傾！」
Elise︰「你唔好當我係佢個妹，你只要當我係你嘅best friend就得喇！佢係咪做咗啲對唔住你嘅嘢？」
Rachel︰「佢今晚有啲監硬嚟，我有啲唔開心。」
Rachel將今晚所發生的事，跟Elise一一說起。
Rachel︰「其實我一直唔俾佢，係咪我嘅問題？」
Elise︰「阿哥梗係同嗰個Justin player玩得太埋，學晒佢啲衰嘢啦！邊個話拍拖就一定要攪嘢㗎，我估唔到阿哥會係咁囉，一啲都唔care你嘅感受！」
Rachel︰「你阿哥佢一直都好care我嘅感受，好錫我，對我好好。佢可能真係忍咗好耐，今晚佢先至問都唔問就撲埋嚟。我係咪應該要俾佢，等佢開心一啲呢！」
Elise︰「陸凱兒，你以前拍拖就係太在意令對方開心，太在意要滿足對方，先至令到佢哋咁唔珍惜你。你要令對方在乎你、珍惜你，你首先就要愛惜自己。如果你係唔想，任何人都唔可以迫你，就算嗰個係我阿哥都係咁話！」
其實，Elise這個觀點，跟阿康以前對Rachel說過的話如出一轍。阿康曾經講過，要Rachel好好愛惜自己的身體，並不能用其吸引男人，不能只求滿足對方的需要，以勉強留住對方。她要找一個真正愛她、而不是只愛她身體的人。
這個觀點，Rachel一直牢記於心，而且她真的找到了這樣子的人。可是，今晚她卻差點被這個人硬上，幸好最終沒有發生更難堪的事。
Rachel︰「丁心然，多謝你呀！好多謝你企喺我嗰邊去諗！」
Elise︰「梗係啦，我哋係好姊妹嚟㗎嘛！阿哥真係忽上腦，佢陣間返到嚟，我要幫你鬧爆佢！」
Rachel︰「喂，嗰個係你阿哥嚟㗎，況且佢除咗今晚呢件事之外，每樣嘢都對我好好，你都要同我錫住佢㗎！」
Elise︰「仲幫住佢！」
**********
沒多久，Edan返家。Elise見哥哥回來，立即開動罵人模式。
Elise︰「痴線㗎你，你頭先想點呀？唔通你真係想監硬嚟，強迫Rachel同你做？」
Edan聽見Elise此番責備，被嚇了一跳，立即拉了Elise入自己睡房。
Edan︰「痴線嗰個係你呀，做乜咁大聲呀，俾阿媽聽到㗎！」
Elise︰「聽到咪聽到囉，阿媽不嬲都唔妥你㗎啦！依家講緊嘅係你差啲老強你女朋友呀，嗰個仲要係我好姊妹呀，你叫我點樣唔大聲呀！」
Edan︰「你唔好咁啦，我以為Rachel暗示我可以上佢屋企咩咩吖嘛，我知自己攪錯咗我已經即刻停啦！」
Elise︰「你呀，我仲以為你係宅男一個，性格又溫純，又識照顧人，估唔到你都係精蟲上腦，用下體諗嘢！你一啲都唔尊重Rachel呀，總之係咁，當初我就唔撮合你哋兩個啦！」
其實，Edan和Elise兩兄妹感情相當要好，猶其他們在單親家庭長大，母親又經常外出工作，兩兄妹相依為命多年，二人之間建立了一份深厚的兄妹情。
他們一向都是無所不談，但當二人一言不合，性格較為火爆的Elise，面對著性格溫純的兄長，往往都會毫不留情地斥責對方，今次也不例外。Edan顯得十分無奈。
Edan︰「喂，俾吓面好喎，話晒都係你阿哥！我對Rachel好嗰陣又唔見你讚我好！本來我買咗你最鍾意食嘅creme brulee俾你，但你依家咁唔滿意我，睇嚟我都係自己食算喇！」
Edan自幼也十分痛錫這位性格有點兒任性的妹妹。之前Elise曾跟他說過，今天在公司遇到不快事，所以無論Edan現在心中有多煩惱，也沒忘記要哄這位他最痛錫的妹妹開心。
每次Edan將Paul Lafayet的Crème Brûlée交在Elise手中，就算她的心情有多壞，都會立即平復心情。
Elise︰「你就想喇！如果你俾我食，我都尚且可以幫你喺Rachel面前幫你講好說話，唔俾嘅話，我即刻叫佢同你分手。俾唔俾？」
Edan︰「俾俾俾，一定俾！咁一齊食啦！」
Elise︰「我食咗唔代表我原諒你㗎，你要好好咁氹返Rachel呀，唔好再用下體諗嘢，知唔知？」
Edan︰「知喇，食啦！」
Edan和Elise兩兄妹沒有被Rachel的事所影響，一起品嚐Crème Brûlée。
至於Rachel，自從跟好姊妹傾訴之後，心情已無大礙。她已選擇了原諒Edan，只要Edan肯氹回自己，她一定可以忘記Edan今晚對她所做的事。
她步入浴室，準備刷牙就寢。她望著掛在架上的銀色Dyson風筒，一副若有所思的樣子，似乎想起了某個人……