《平行軌跡》: Episode 3 - 黑眼圈

「我叫馬建鋒，英文名Vincent，唔好睇我啱啱出嚟做個樣好似唔係幾信得過咁，我認真起嚟效率真係快到嚇親你。嗱，返去正題先，呀陳生，你都唔想第日有咩事嘅時候會無嘢留俾你啲家爺仔乸啦，咁嘅話你就要好好考慮呢個寰宇最強基金組合喇，有咩好處呀？回報高、彈性高，手續又簡單，最緊要係咩呀，我食你都食得少呀嘛。你話你份工都有幫你供？齋靠佢養老真係危危乎，所以呢，計我話，識買一定係跟我買呢啲。」 

「………」電話對頭有一把女聲企圖忍笑：「…丫哈哈哈哈！喂，你唔好話俾我知呢個係你嘅開場白喎？」

「有咩問題姐，慘得過我sell到佢每個月掟三千蚊落嚟。」 

「嘩！好大隻水魚丫，好彩我未敷mask姐，如果唔係肯定笑到我有皺紋！」 

「唔緊要喎，今個月話咁快就嚟meet到quota，最多下個月買多～啲護膚品俾妳玩喇。」 



「鬼稀罕你丫，我星期日就約埋我個好姐妹Tiffany一齊去掃貨，Lady's Day 無你份。」 

「去去去，咁我又可以恢復自由，重獲新生，好嘢，搵李櫻杰慶祝。」 

「你仲好講，今日無啦啦又叫咗佢出嚟，明知佢開通頂就唔好打攪人啦嘛，你走咗之後我都叫佢快啲返屋企瞓，唔係一陣佢出意外我仲唔知點算。」 

「係咩？哈哈哈哈…」 

「喂，你等我一陣先，拎塊mask敷住同你講。」 



「好。」 

電腦的喇叭傳來一聲「Your turret has been destroyed」。 

「頂，廢柴開大啦嘛，用坦又唔頂住點鬼樣輸出呀！」同時間，Vincent不斷敲打滑鼠右鍵，傳來答答答答答聲。 

「咦？咩聲呀？你果邊做咩答答答答咁嘅聲嘅？」芊芊回到電話旁邊。 

「無，出面唔係落雨咩，應該係雨聲嚟啩。」的而且確，窗外雨聲滴答滴答，跟滑鼠按鍵聲有幾分相似。 



「古古怪怪，喂，我敷緊mask丫，你講嘢丫。」 

「講開李櫻杰呢，記唔記得我哋話下個禮拜陪佢散心呀？」 

「記得。」 

「我同佢講咗喇，約咗係最代表到我哋嘅主題公園嘅過山車度等架喇。」 

「咁鬼翹口嘅，佢係咪真係明架？」 

「唏，男人嘅嘢妳識條春咩。」 

「神神化化，唔鬼理你。係喇，你估吓我今日帶咗班鴨仔去邊？」 

「好難估喎，俾啲貼士呢。」 



「咁果個公園就有啲人野餐啦，佢哋話呢…果度附近嘅幾棟嘢…其實就有一個叫門常開嘅概念啦，仲有個地方…啲人叫佢做咩公民廣場咁架喎。」 

「我知啦，果度有好多草好靚嘅景，仲有個狗公園俾人放狗添。」 

「嘩…你講晒啦。」 

「總之我知啦，附近咪就係碼頭囉，仲有軍隊基地添呀，好在妳無帶班鴨仔亂咁走，如果唔係隨時俾人就地正法。不過…妳唔知果度係邊度就應該要反省吓咁樣樣。」 

「咩喎你邊隻耳仔聽到我話我唔知果度係邊度呢請問？」 

「係係係，妳咩都知啦公主大人。」 

「你不如都係俾我講吓班鴨仔。」 



「咁樣…兩點幾喇喎，妳肯俾我瞓未？我啲黑眼圈再大啲就放得落袋鼠喇。」 

「唉呀，我數緊羊喇，但係數數吓…數到二零六對…突然間你又彈鬼咗出嚟嚇到我彈起丫。」 

「痴線，邊有人數羊一對對咁數架。」 

「梗係有啦，我有特別嘅數羊方法…」 

「所以妳咪瞓唔到，仲要唔俾我瞓，就係咁解喇。」 

「咁談戀愛…就變得極難進睡，係咁架啦～貪戀你視為樂趣丫嘛，好明顯係你執到。」 

「施捨我咁話喇喎，其實我就唔係太care。」 

「咁我講得班鴨仔未呢？」 



「好…講講講…」 

「…」 

「…」 

「…」 

「呼…呼…嚕…嚕…呼嚕…」 

「喂？仲有無人呀？似乎個傻瓜講講吓瞓咗喇喎…」Vincent 伸一伸懶腰：「好！繼續！」 

「Unstoppable！Dominating！Godlike！Legendary！Penta-kill！Ace！…Victory！」從電腦發出的聲音此起彼落，當然少不了滑鼠發出的答答聲。 



「Yes！搞掂！食碗麵！」興奮大叫之後，Vincent倒在床上呼呼大睡，晨光打在他的身上。 

（Next：Episode 4 - 港女的幸福星期日）