《平行軌跡》: Episode 8 - 熊貓

凌晨時份的公園，這夜的鞦韆沒有像平時一樣被風吹得搖曳，而是有一個大男孩站在鞦韆上晃動。另一邊廂不遠處，那個座位只容得下小朋友雙腳的彈簧小馬，今夜卻被另一名大男孩坐在它的頭上，旁邊還有一只彈簧青蛙和彈簧小雞，組成一列小動物。往前方一看，還有兩條滑梯連接與滑梯組成的建築群。兩名大男孩附近有一些空罐子，也有一些未開的啤酒放在地上等待他們灌進口裡。
 
「你副眼鏡呢？」Vincent騎著小馬搖搖盪盪。
 
「唉…衰嘢唔好提。你就開心啦，同Shirley兩個人遠走高飛。」阿杰則是盪鞦韆的那個，他一邊盪一邊不是味兒地向Vincent控訴。
 
「嘿，其實你都唔會想見到我地兩個痴纏啦。」很明顯，Vincent原本就打算過阿杰一棟。
 
「睇見你兩個咁恩愛我就無名火都起想打你一獲。」
 


「你又唔需要太羨慕，其實我有時都唔係咁好受。」
 
「係咩？即係點？唔係愛人哋就唔好阻人咁耐喇。」
 
「你講到咁遠想點呢，唔係唔愛佢呀，有得睇無得食果吓大劑丫嘛。」
 
「係你嘅始終係你嘅，要開餐都唔急於一時姐。」
 
「我無你咁偉大，對你嚟講可能會覺得咀兩嘢都會大肚。」
 


「無啦啦又燒落我度…我而家連餐牌都無得睇呀…嗱…你唔好話我唔提醒你，Shirley呢種女仔係熊貓嚟架，就嚟絕種架喇，你唔珍惜佢你第時自己後悔。」
 
「講呢啲…」Vincent拿起一罐啤酒，走到滑梯旁的樓梯坐下來。
 
「喂，明明今日係講你，做咩變咗你喺度窒我呢？」
 
「我無嘢喎，行得走得食得瞓得。」阿杰繼續在鞦韆上搖晃，幅度漸漸增大。
 
「明嘅，講真，咁多年點會唔明你丫，由細到大你有咩事，有邊次唔係自己搞得掂，喺呢度跌低，再喺前面起身丫？其實我都好佩服你咁堅強。」
 


「講係咁講咋，但今次真係好痛…好痛…每次去到一啲同佢去過嘅地方，都好似突然間斷片咁，自動回帶諗起以前啲情景…每次遇到咁嘅情況都好難過…」
 
「唔駛咁喎，每個人都有佢哋嘅回憶，回憶係有開心同唔開心架啦，你咪俾自己唔開心一陣囉，何況天涯何處無芳草，我帶你去揾過隻熊貓囉。」
 
「唔想諗咁多住喇…簡單等於有福，專心最好…」阿杰從鞦韆上跳下來，也拿起一罐啤酒，也走到滑梯坐下。
 
「專心啲乜嘢呢？」
 
「做嘢囉。疊埋心水…我要做好呢份工，老細睇得起我呀，我諗我好快有得升。」
 
「講起上嚟，你真係甘心咁就一世？」Vincent一口氣灌下整罐啤酒，雙眼直瞪著阿杰，整個氣氛都變得嚴肅起來。
 
「咩…你…講咩呀？」阿杰隱若理解到Vincent的意思，卻有意無意地迴避這個問題。
 
「呢個呢，仲有呢個呀。」Vincent做了一個掃chord的動作和一個寫字的動作。


 
「咩呀…」阿杰很清楚Vincent指的是什麼，只是他不願意去面對。
 
「你而家對住我扮唔知唔緊要，最緊要係你棟高床板諗吓，你係咪真係打算咁就因為佢就放棄你嘅夢想？佢而家個人都唔喺你度啦，你仲有咩顧慮姐？我由中學一直睇住你日練夜練日寫夜寫，你都唔想咁就白費晒架？其實佢講嘅嘢都錯唔晒架，你份工有咩前途姐？唔係，應該話你果行有咩前途姐？橫死掂死不如搏一鋪。」
 
「咁我都要同屋企人交代架…唔通一個屈尾十就話唔撈，靠老豆老母養咩…」
 
「我諗你真係唔記得自己係咩人喎公屋仔，富豪溫床嚟架。我哋呢啲仲係屋企人買落嘅公屋，你根本就已經無得輸，係無嘢可以輸。」
 
「咁你又走去做Sales，你夠唔使養家啦，你夠唔鍾意做呢份工啦，你夠有你嘅夢想啦，你又自己出去租屋住？」阿杰使出絕招，轉移視線，得以讓自己得到喘息。
 
「你條友仔…」Vincent也明白有些事情不能迫，所以也沒有再逼迫下去。
 
「…其實你都無表演過俾Shirley睇，話唔定佢都會好鼓勵你向呢方面發展呢？你駛乜咁快打定輸數姐？」阿杰對Vincent的矛盾感到質疑，乘勝追擊。
 


「…講你都唔會明，總之…做人有時候係有啲原則，有啲嘢亦都要取捨。」Vincent欲言又止，不知是想隱瞞什麼，還是逃避什麼的。
 
「唉…發現愛像熊貓，快樂也像熊貓，越來越難遇到，彷彿國寶…」阿杰大字型躺在公園地墊上，看著萬里無雲的天空，隱若從大廈與大廈之間遙望數顆若隱若現的星星，感嘆起來。
 
「喂，我哋都好耐無踢過波，不如揾日過隔離街球場同班阿叔砌返場。」Vincent也有同樣的感嘆，希望藉著童年回憶，去尋找缺失了的快樂感覺。
 
「好…星期四應該唔使點OT，就星期四囉。」公園中響起兩個罐子碰撞的聲音，像是見証二人的友情，也是二人互相支持的標誌。
 
（Next：Episode 9 - 二人世界盃）