《平行軌跡》: Episode 10 - 細街盃

「大力交波啦喂！全場靠我哋架喇！」叫喊的是在七人足球場內正在奔跑走位的阿杰。
 
「直射遠柱啦喂！」Vincent一記直線傳向阿杰前方兩碼處的空位，並叫阿杰不作控球直接向龍門射球。
 
皮球準確地到達空位，阿杰作勢射球！然而，他的右後方出現了一架無情的衝鋒車，一記剷球將他連人帶波剷跌，這個顯然是犯規動作。
 
「喂！打波定打人呀！」Vincent毫不猶疑衝向那個有著地中海髮型的男人。
 
「你講咩呀！」地中海男也順勢要與Vincent開火。
 


阿杰見狀立刻起身，將二人分開，其他波友也走過來「勸交」。
 
「喂，無事呀，踢波係咁架啦。」阿杰拍拍Vincent膊頭，走回自己的位置。
 
擾攘一陣子後球賽再度展開，這次由對方組織攻勢，二撇雞男帶球指揮，將球傳給地中海男盤球進攻。
 
「落力封波啦喂！」看到阿杰呆若目雞地被扭過，Vincent大叫提醒他。阿杰從後追上，眼看快要追上之際，Vincent再度大叫：「大力掃腳啦喂！」
 
阿杰沒有聽從指示，結果跟甩了對方，對方繼續向前推進，Vincent使出超技術撞跌地中海男，兩名惹火男子再度短兵相接。
 


「細路又係你！打波定打人呀！」接下來是粗口橫飛。
 
阿杰將Vincent拉出球場，並向場內的波友示意兩人將要離開。
 
「我係咁架喇！點呀！」餘波未了，Vincent仍然火冒三丈。
 
「打波姐，唔使咁嘅…」阿杰只得好言相勸。
 
Vincent甩開阿杰，怒氣衝衝地去沖身。阿杰則坐在場邊繼續觀看比賽，在二人離場後，球場的波友重新組隊，地中海男順利射入兩球。
 


「巴西…西班牙…西班牙…德國…荷蘭…巴西…阿根廷…英格蘭…葡萄牙…比利時…烏拉圭…英格蘭…咦？清一色係國家隊波衫？」阿杰看著看著，發現場中波友都穿著不同國家的球衣。
 
「梗係啦，世界盃開鑼啦嘛，咪個個著晒自己撐果隊囉。」Vincent沖完身出來，已經穿回他的上班衣服，然後他把毛巾照頭放在阿杰頭上。
 
「頂你咩，濕架條毛巾。」阿杰把毛巾掟向Vincent。
 
「行得未呀，肚餓呀。」Vincent摸著其肚皮說。
 
兩個大男人，即使在大牌檔食豆腐火腩飯也是津津有味。
 
「喂，頭先做乜咁燥姐？」阿杰咬著火腩地問。
 
「…踢波係咁架啦，唔通搶波都要講聲唔該先喇喎。」Vincent露出一絲幾乎沒有洩露的遲疑，阿杰當然不會發覺，但得出這樣的答覆，他也接不上咀，唯有低頭扒飯，然後又想起一件事。
 
「我都話我老細睇我架啦，佢今日話加我人工。」


 
「掂喎，你有更加多機會睇日出。」Vincent暗示阿杰將來OT的情況會更加嚴重。
 
「要出頭就要挨吓架喇…我係咁樣說服自己。」
 
「戇居。」Vincent似是不滿阿杰將自己的提議拋諸腦後。
 
「唔好咁，當係同我慶祝，嚟！」大牌檔當然少不了樽裝啤酒。
 
二人吃過晚飯後，打算步行回家順便當作飯後運動，中途經過一間馬會，聚集的人群多得要站在門口。
 
「嘩…有無咁多人睇波呀…」阿杰驚歎世界盃是如此受注目。
 
「邊隊對邊隊呀…睇過…」Vincent則比較在意正在播放的賽事。
 


電視畫面播放的是黃衫對綠衫的賽事，仔細一看，是哥倫比亞對科特迪瓦，賽事開始不久，兩隊仍然在僵持狀態。
 
「你睇好邊隊？」阿杰金晴火眼望著螢幕。
 
「科特迪瓦啦，哥倫比亞無咗法卡奧真係打正氣。」Vincent滿懷信心地支持科特迪瓦。
 
「我都係咁話，你睇佢哋撳住嚟攻。」
 
二人著了魔般站在馬會門口觀看賽事。科特迪瓦隊進攻多次之後，終於找到致命機會，入球！科特迪瓦隊先開紀錄！
 
二人前面的觀眾紛紛稱讚該入球，有的豎起姆指，有的大聲呼喊：「杜奧巴好波！」
 
「杜奧巴真係好嘢！仲咁有氣有力。」阿杰也跟隨讚歎。
 
仔細一看，原來剛才從中場千里走單騎，一個扭四個再射門的不是杜奧巴，而是另一位球員，耶耶托尼。


 
「醒少少啦！耶耶托尼嚟架！成隊波得杜奧巴咩。」Vincent用力敲阿杰的頭，情況像蠟筆小新中，美冴懲罰小新的動作。
 
「嘩痛架大佬，個個咁似樣睇錯有咩出奇呢，前面班木咀咪又講錯。」無辜的阿杰飽受痛擊。
 
實際上，要認出場上的足球員是誰的確不是一件說做就做得來的事，就像阿杰本身其實就不是足球迷，所以他的歡呼也只是跟隨其他觀眾瞎扯，只是，他也被一大班人一齊睇波的氣氛感染，專注在電視的螢光幕上，反觀Vincent，他卻自顧自的，雙手插袋，懶有型地獨自離去。
 
(Next：Episode 11 - 黃金入球)