《平行軌跡》: Episode 13 - 海闊天空

鏡頭離開一對痴男怨女，轉而看到徹夜未眠的阿杰，坐在家中大廳的地上，背靠著梳化，把玩著手上的「玩具」。一名睡衣不整的女孩揉著睡眼從房間步出。
 
「阿哥…？做咩夜媽媽坐喺度嘅？」女孩輕聲呼喚阿杰作阿哥，她從背影隱約認出是阿杰。
 
「…」阿杰沒有回應，女孩拍一拍他膊頭，阿杰卻因而被嚇倒。
 
「阿妹？想嚇死人咩妳。」阿杰慌忙拿緊手上的「玩具」，免得它跌在地上。
 
「唓，係你自己喺度發吽哣之嘛。」女孩跳上梳化，把玩在梳化旁坐著的阿杰的頭。
 


「喂，李櫻淇，著好妳件睡衣，穿返好兩隻袖佢呀。」女孩的睡衣只有左手是穿在身上，右邊的袖則是自由飛舞。
 
「喺屋企有咩所謂呢，做咩呀？你怕醜呀？」說畢拿著右邊的袖向著阿杰打轉。
 
「呢個李櫻淇呢，人哋通常會嗌佢Yuki。十六歲，雖然係我阿妹，但佢而家咁樣同平時一樣，都係癲癲哋，完全唔當我呢個阿哥係阿哥，我都無晒佢乎，可能咁樣算係一種情感表現啩。」阿杰在心裡自言自語。
 
「咦咦咦？阿哥！！你終於都肯再拎起支結他啦？！？！？！」此刻，在昏暗的大廳，Yuki雙眼亮得像兩個燈泡。
 
「…阿妹妳知唔知…今日就係佢死忌？」阿杰答非所問，但意有所指：「我細個果陣，其實都係因為佢，令到我接觸結他。」
 


「我都唔知你講乜，你快啲彈俾我聽啦，我好耐無聽過你彈結他啦！你知唔知我有幾掛住你嘅結他？」Yuki將阿杰起勢搖，為求他可以再彈結他。
 
「痴線啦妳，阿媽仲瞓緊架。」阿杰右手一揮，把Yuki雙手撥開，繼續望著他的結他發呆。
 
「咁其實你講緊邊個佢姐？」Yuki躺在梳化，改為用腳把玩阿杰的頭。
 
「雖然曾經有人話過，佢背叛咗搖滾音樂精神，為名為利走去埋沒自己，其實佢嘅孤獨有邊個會知，又有邊個會去理？」不知道阿杰在自言自語還是真的在答Yuki，他一邊說這幾句說話，一邊拿起電腦前的Headphone，再播放歌曲起來。「嗱…你自己聽吓。」
 
音樂徐徐響起…
 


「今天我　寒夜裡看雪飄過　懷著冷卻了的心窩飄遠方…」
 
「呢首歌咪以前你差唔多日日都對住我唱架囉？其實我都唔明你嘅，條八婆唔like你玩姐，而家條八婆都唔要你啦，再講，其實我唔明玩結他有咩問題囉。」甫聽到歌聲，Yuki激動地放下Headphone，大罵阿杰的前女友。
 
「唔准亂咁鬧人呀。不過…妳都覺得我唔應該放棄？」阿杰一臉茫然，對是否再彈結他仍然猶豫。
 
「仲諗乜鬼？我有我心底故事，親手寫上每段得失樂與悲與夢兒，縱有創傷不退避，夢想有日達成找到心底夢想的世界。呢首又係你唱到我識背囉，你果陣真係煩到一個點，唉呀，而家竟然掛住你自彈自唱，我有啲懷疑自己已經患上咗斯德哥爾摩候群症。」Yuki大力拍打阿杰的頭，要他記起自己以前有多熱愛結他。
 
「…係症候群………」除了更正以外，阿杰報以一陣沉默。
 
「事但啦！嗱！聽日我哋去遊行果陣，你一邊行一邊彈一邊唱，當係慶祝你成功爭取俾女飛啦！」沒待阿杰回應，Yuki已經自把自為幫阿杰決定了。
 
「妳唔係下話…」阿杰沒氣沒力倒在地上。
 
「我決定咗架喇，聽日你唔拎我都會幫你拎。呀，仲有呀，你之前咪同你就嚟結婚果個唔知咩朋友講，話喺佢婚宴表演單嘢要考慮吓嘅，早幾日佢打嚟屋企，我幫你應承咗喇。」Yuki若無其事地說出對阿杰來說猶如炸彈的事。


 
「吓？？？！！！？？？！！！妳咁樣玩我呀小姐…」找阿杰的是一位跟他聯絡不多的中學朋友，不知道結他對阿杰來說已成禁品。他當初說考慮，只是不好意思推卻，為了拖延時間才說的話。如今卻被Yuki答應了，變得再沒退路。他就是這樣的一個人，別人有事找幫手不會拒絕，看到不公義的事會挺身而出。
 
「嘿嘿…咁你聽日可以當係練習啦。呀，仲有，不如你以後都唔好戴眼鏡，你無副眼鏡個樣好睇好多。」Yuki滿心歡喜，因為她能夠再次聽到自己阿哥自彈自唱的天籟。
 
「唉…只此兩次，再無例外呀！我都係早啲去訓，再坐喺度唔知妳又再俾啲咩震撼打擊我…」阿杰好好擺放自己的結他之後，沒神沒氣地走回房中。而Yuki則用電腦上社交網絡，打開一個叫「漫畫長路」的對話群組，找出一個叫紫月的用家，傳私訊給她。
 
「紫月姐姐！我好開心呀！我終於可以再聽我阿哥彈結他啦！！」
 
（Next：Episode 14 - 睜開眼）