回到過去，破我未婚妻個處: （11）
等左約莫大半粒鐘，終於等到佢出嚟。
佢翹住Kevin隻手行出體育館。
天寒地凍，Kevin著住背心波衫同短褲行出嚟，條友個樣一睇就知嬲到震同凍到震，心入面肯定屌緊偷佢衫褲嗰條友（即係我）嘅祖宗十八代。
Veronica口噏噏似係安慰緊佢，兼且主動攬埋去，用身體幫條友取暖。
見到呢啲畫面，我個心難免un 住un住。
啲人話真心鐘意一個人，係唔會介意對方嘅過去，自問自己一直都做得到，因為我明白每個人都有過去，亦正正係有過去，先會成就到現在。
只但係如今親眼見證對方嘅過去喺面前發生，原來係唔太好受。
所以話咩唔介意過去某程度上只係眼不見為淨，無親眼見過就當故事純屬虛構。
二人一邊行一邊攬攬錫錫，我就靜靜雞一路喺後面跟住。
佢地離開體育館，到附近茶餐廳食嘢，食完都未肯返屋企，又去到一個公園仔，搵左個暗暗地又隱蔽嘅位置坐低，繼續卿卿我我。
我踎喺大約五十米外嘅一張長櫈背後，偷望住兩條友攬埋一舊喺度咿唈。
本來Veronica個頭挨左喺Kevin個膊頭，但無幾耐之後，佢個頭慢慢dup落去，幾乎落到去對方個下腹位置。
我行近多幾步，換個角度望，睇到Veronica伏Kevin兩腿之間不停「點頭」。
點頭只係動作，實際佢地做緊咩，我諗唔洗講都知。
此刻嘅我係內心崩潰，完全無諗到Veronica唔單止用身體幫Kevin暖身，而且仲用埋個口幫人暖jer。
原來Kevin條粉腸無講大話，Veronica真係肯幫佢含，咁就弊傢伙，照咁推斷落去，佢話24號晚book酒店「開罐頭」，都好大機會係真。
究竟呢個係咪我識嘅Veronica，居然會幫人含撚，點解佢肯幫條mk仔含，卻又唔肯幫我含？
我無法理解。
「喂！你做咩霸我個位！快死開啦！」
突然間，一個衣衫襤褸嘅露宿者大叔行過嚟，話我霸佢張櫈，大聲趕我走。
為左唔俾人發現，我「shh」左個大叔一聲，示意佢唔好咁大聲。
「Shh乜春！拿拿聲死開，俾返位我啦！」大叔把聲大到幾乎全公園都聽到。
遠處嘅Kevin聽到聲，即刻休返條褲，擰轉頭向呢邊望過嚟，睄左我一眼。
我轉身走人，立即行遠開去，希望無俾對方發現。
快步行左幾百米，見後面無人追嚟，先再放慢返腳步，
行到公園某個路口，正當以為危機解除之時，下一秒卻迎面撞見Kevin同Veronica。
呢鋪撞到正一正，想避得無得避。
Kevin由下而上掃視我一眼，見到我著住佢啲衫，嬲到出煙：「屌啦星！原來係你個死仆街偷我啲衫同鞋！」
三十六計，走為上著！
我立即逃跑。
無奈作為一個平時甚少運動嘅人，試問點跑得過一個身高腳長嘅籃球員，結果我跑唔夠三十米，就俾佢捉到。
Kevin用力捉住我：「我認得你！你個冚家剷偷完我女朋友張學生證，依家仲偷埋我啲衫？」
「哦！唔怪得啱先我見你啲衫咁熟口面，原來你係賊仔偷人嘢。」Veronica跟住Kevin後面走上前。
「阿Ling，呢條友啱先又搞你？」Kevin問。
「係呀，條友short架，頭先當街當巷拉住我唔俾我走，仲講埋啲九五搭八嘅廢話。」
唔知係咪眼花，我見到Veronica嘴角黐左條毛。
剛剛佢幫Kevin含完，睇怕呢條係鳩毛。
「呼~」三秒後，一陣風吹埋嚟，條毛就無左。
Kevin雙手掹起我嘅衫領，用兇狠嘅眼神居高臨下咁睥住我：「我屌你老母！偷嘢不得止，仲搞我條女！」
條友非常大力，我想掙脫都掙脫唔到：「喂？你想點？唔好諗住郁手呀，你一郁手我就即刻還…」
個「拖」字未講出口，Kevin就一拳「盅」落嚟我個肚：跟手再踢一腳，打到我仆左喺地。
趁我仲痛緊未有還擊力，佢強行剝走我身上嘅衣物，搶返曬屬於佢自己嘅衫褲鞋襪，連我嗰問人借返黎10蚊都搶埋。
呢一刻，我身上又得返一條短褲同T-shirt，啲風吹埋嚟凍到打冷震。
Kevin本身未想收手，只係附近有差佬經過，先急急腳拖Veronica走。
我心有不甘，心諗唔可以喺同一日內，喺自己女人面前輸俾同一條mk仔兩次。
「你個死mk，咪走…」
我起返身，諗住追上前還拖，殊不知兩條差佬過嚟截停我查身份證。
兩條差佬，一個高一個矮。
「先生，唔該身份證。」高嗰個問我。
我著住訓教衫時空穿越返黎，何來有身份證，答話：「唔好意思，漏左喺屋企，唔記得帶出街。」
「咁你係咪住呢附近？邊一棟樓？」矮嗰個問。
「Er…我住…乞嚏！」衣衫單薄嘅我俾冷風吹到打乞黐。
「阿sir問你住邊呀，快啲答！」高嗰個差佬語氣惡劣。
「我住喺港島，筲箕…」
我說話未講完，矮嗰差佬埋嚟搜我身，然後就好惡咁話：「屌你老母！你當阿sir kai子呀？夜媽媽你一條友，鞋又無著，個身連銀包都無，話自己喺港島過嚟，揾鬼信呀？你分明就係『ii』！」
「咩…咩係ii？」我問。
「即係非法入境者，依家我地要『塔』你返去。」高嗰個差佬一講完，就將我扣上手扣。
「你地搞錯曬，我香港人嚟，我住筲箕灣耀東邨，唔係ii…」
「收嗲啦，有咩事返差館先講！」
兩條死差佬完全唔聽我解釋，夾硬拉我返差館。
事實證明無論係2021年定係2009年，差佬都係咁仆街。