回到過去，破我未婚妻個處: （19）
我拎住禮物行去家維邨，等左好耐都唔見Veronica出現，然之後行去電話亭，撥通佢個電話。
「Hello，我係…」
「Kevin？係咪Kevin呀？Sorry，係我唔啱，係我一時貪玩，先會做出對你唔住嘅事，其實我心入面，我最鐘意嗰個一直都係你，求你唔好同我分手…」
Veronica接通電話，一輪嘴咁講。
「Sorry ，我唔係Kevin，我係鐘耀輝，即係琴日借左你兩蚊嗰個男人…」
「頂！我無心情！你唔好煩住我！」
「嘟…嘟…」對方講完就cut左線。
遇到咁嘅情況就難搞，連人都見唔到，基本上係無從入手。
然而，我仍然感到好奇嘅係，Kevin落左啖氣之後，係咪會心軟主動搵返並原諒Veronica，跟手喺平安夜嗰晚，雙方和好如初兼上床？
難得佢地之間出現缺口，就算暫時我未有機會乘虛而入到，都唔可以俾佢地走返埋一齊。
睇嚟我就要做一次小人先得。
時間係黃昏時分，我到土瓜灣體育館隔籬個籃球場，睇下撞唔撞到Kevin。
果然，佢真係喺度，同緊街場嘅人鬥緊波。
等佢坐低喺場邊休息時，我拎住兩樽水，坐埋去佢隔籬請佢飲。
今次同上一次穿越唔同，上一次我同佢好早見過面，今次就直到依家我地先第一次見。
「Hello ，請問你係咪Kevin？」我遞支水俾佢。
佢望我一眼，問：「你邊位？」
「我係陳嘉玲嘅朋友嘅朋友，我聽佢地講你打波勁，所以特登過嚟望下。」我答。
「你都識阿Ling？」
「見過一兩次咁囉…」
「多少往事甜在心頭，夜雨觸發這景致，令我憂愁…」突然有老土鈴聲響起。
Kevin接聽電話：「頂！都叫左你唔好再打過嚟，好煩呀你！收皮啦！」
一鬧完佢就收線。
「同女朋友鬧交？」我詐詐帝問。
「條女俾綠帽我戴，嬲嬲地咪飛左佢！係啦，你話你見過阿Ling一兩次，佢有無撩過你？」
「咁又無，不過我朋友以前同佢好熟，都話佢份人好有問題，所以你飛得佢啱，同埋千其唔好心軟，更加唔好原諒佢！」我開始作故仔、「打毒針」。
「多少往事甜在心頭，夜雨觸發這景致，令我憂愁…」老土鈴聲再次響起。
「好啦喎，你唔好再打嚟！我都話左我最憎人俾綠帽我戴，我係點都唔會原諒你！」
本來我以為Kevin會心軟，但見到佢咁決絕，似乎又唔似會原諒Veronica。
「頂！煩q住曬！」Kevin放返好電話，落場繼續打波。
見到Kevin咁樣，我一心相信佢同Veronica嘅關係已完，但萬萬估唔到，接下來嘅劇情卻出現驚天轉變。
轉變嘅關鍵同一個好mk嘅字有關——𠝹手。
離開球場，返酒店訓完一覺（因為仲係擔心會俾老豆老母當賊，所以唔敢返屋企）。
24號平安夜，一大早我又去屋邨樓下捕Veronica。
不得不承認，要博取呢個時期佢嘅歡心，的而且確非常有難度。
其中一個最大原因係，呢一個Veronica同我所認識嘅嗰一個非常唔同。
或者，呢啲就係青春期同成年後嘅分別。
到中午都唔見佢，我出去食完個下午茶再返嚟，剛好就遇見對方行出屋邨，上左一架小巴。
我就繼續好似跟踪狂咁，截架的士跟過去。
佢去到何文田某座私人屋宇。
「Kevin，我依家喺你樓下，我就證明俾你睇，我係真心鍾意你！」 佢打通電話，另一隻手攞出一把𠝹刀。
Kevin樓上探頭望落嚟，嚇左一跳，大嗌：「阿Ling，唔好做傻事！」
唔單止佢嚇左跳，我都嚇親。
Veronica放低電話，拉高衫袖，揸住𠝹刀想喺手腕割落去。
我二話不說，衝埋去阻止佢。
「你傻左咩！」我捉住佢揸刀嘅手，阻止佢割落去。
「你邊位？唔好阻頭阻勢！」Veronica嘗試推開我。
就喺糾纏期間，佢把𠝹刀一下唔小心𠝹落我手背，現出一條血痕。
「唔關我事架，係你自己衝埋嚟。」
Veronica望住大廈門口，佢用刀輕輕喺手腕表面𠝹左一下，條傷痕仲細過被貓抓傷。
幾乎同一時候，Kevin從樓上落到嚟。
「阿Ling，點解你咁傻𠝹手？」
「Kevin，對唔住，係我一時貪玩先會做出對唔住你嘅事。」Veronica伏Kevin胸膛懺悔。
「求你原諒我，因為我真係好鐘意你，無左你我寧願去死！」
「你快啲俾我睇下我個傷口，無事呀嘛？」Kevin睇Veronica手腕上嘅傷口，「陰功！損曬流曬血！你痛唔痛？」
「若然你唔肯原諒我，我就再𠝹一刀，證明俾你睇我…」
「唔好！你嘅心意我明白架，我原諒你，求你唔好再傷害自己！」Kevin將Veronica緊抱入懷。
呢兩條友只顧「上演」mk式愛情嘅戲碼，完全無視我呢個傷者。
「你地…可唔可以call白車…」我忍唔住開口問。
「係喎！阿Ling你傷得咁重，一定要去睇醫院，否則隨時傷口發炎或者會破傷風架！」
Kevin打電話call救護車。
唔洗五分鐘，白車就趕到，將我地三條友送去醫院。
Kevin佢地兩個全程喺車上，旁若無人咁親熱，睇到我打曬冷震。
估唔到mk仔嘅愛情世界係咁兒戲，上一秒都講緊以後唔好再見，下一秒就咁快重修舊好，感情仲好似比以前好左。
對此我真心不能理解，一嚟我無做過mk，二嚟讀書嗰陣都無拍過拖，對於呢種十幾歲嘅mk愛情觀念幾乎一無所知。
值得慶幸嘅係，我遇到嗰一個唔係眼前呢一個腦筍未生埋嘅mk妹，而係一個體貼溫柔嘅好女仔。