回到過去，破我未婚妻個處: （25）

十六歲嘅我拎住電話，乾咳兩聲，清清喉嚨嘅痰，跟小心翼翼咁按下數字鍵，撥通左小曼屋企電話。

「喂！你啱先打過嚟咩？揾我咩事呀！」

佢打通電話後，粗聲粗氣，扮曬唔耐煩咁同對方講。

心入面明明好在乎，但就硬係要扮到唔在乎，呢一個自己真係令人懷念。

「頂，嗰個都唔係我，係我個堂大佬，條友玩嘢隨便聽人電話，你唔洗理佢。」



因為我同阿德係好朋友，所以小曼就揾我教路點去接近阿德。

嗰陣時我地成日都傾電話，不過多數都係佢揾我，我就唔敢主動揾佢。

「阿德部電話我陪佢整返好，佢未唔覆你應該係未得閒。」

講樣，阿德真心靚仔，當陣時真係有好多女仔主動追佢，同form嘅又有，低form嘅都有，喺學校入面都稱得上係風頭躉。

我記得自己都幫阿德，收過唔少女同學轉達俾佢嘅情信。



見十六歲嗰我講個不停，我就同佢講：「你唔好傾咁耐啦，我仲等緊你幫手度『橋』。」

對方對住我做一個叫我收皮嘅口型，然後揸住電話行入房傾。

哎呀，我竟然咁樣俾「自己」無視，呢條友真係無大無細！



「叮噹！」



過左一陣，門外傳來按鈴聲，我幫手去開門。

門一開，眼前出現一個我好耐都無見過嘅人，我阿叔。

佢手上提住一個工具箱。

我拿拿臨請佢入屋：「阿叔，見返你真係太好啦！你知唔知你死左呀！」

「我啋過你把死人口！你邊位呀！點解你喺我阿哥屋企嘅？」阿叔睥住我問。

「我係你個侄阿輝。」

「你都short short地，我個侄鬼有你咁大個！你快講你係邊個啦喎！」

「我真係你個侄，我有啲好緊要嘅嘢要同你講，阿叔你一定要清楚！」



我吞一啖口水繼續講：「2011年5月2號，即係兩年之後你會同你依家嘅女朋友Shirley結婚，你記住，你真係要記住，你千其千其唔可以同佢結婚，因為你一同佢結婚就會死！係真係會死！」

「咩料呀你，三唔識七入嚟人地間屋不得止，仲講埋啲九唔搭八嘅說話咒我死，你係咪嬲打呀？」阿叔放低工具箱，拉高手袖。

「阿叔，我句句都係真話，你一定要聽我講，絕對唔可以Shirley結婚！」我努力勸說。

「咦，阿叔，你嚟左啦。」十六歲嘅我打完電話，從房行出客廳。

「阿輝，呢條友乜水？你啲個riend呀？」阿叔口中嘅「呢條友」代表嘅係我。

「佢話自己從2021年穿越到2009年，係未來嘅我。」

阿叔哄近埋嚟，仔細打量我：「唔係講笑，望真啲，呢條友又真係有啲似你喎。」



「直頭係一模一樣，我的確係從2021年穿越返嚟嘅鐘耀輝。」我對阿叔講。

「好，你話你係未來人，咁就等我考下你，下期六合彩開咩冧巴？」阿叔問。

「Er…唔知...」

「乜你咁渣架，六合彩咩號碼都唔知，仲話自己未來人，問多你一條，下年英超邊隊冠軍？」

「我唔知喎，我都唔睇英超嘅。」

「頂，乜都話唔知，收皮啦你！」阿叔提起工具箱，行入廚房整水喉。

我跟埋入去，繼續苦口婆心咁勸佢：「我地家族個詛咒係真架，阿叔你要聽我講，快啲同個Shirley分手，你唔能夠同佢結婚。」

「講笑咩，個詛咒點睇都唔係真，仲有就係，我點會同Shirley結婚，我同佢玩玩下渣嘛，好似我呢種無腳嘅雀仔，先唔會綁死喺一棵樹上！」阿叔一邊講一邊用士巴拿擰個水喉。



「唔係喎，兩年後你的確係同左Shirley結婚，唔係你所講嘅玩玩下。」

「都話我係唔會結婚，出返去啦你，唔好喺度阻手阻腳。」

「阿叔，你信我，你真係會結婚，我無講大話......」我繼續解釋，但阿叔卻充耳不聞。

幾下功夫，好快佢就整返好條喉。

佢將士巴拿同螺絲批放返入工具箱，行返出廳同十六歲嘅我講：「阿輝，水喉整返好啦，無乜嘢我走先。」

「好呀，唔該曬阿叔。」十六歲嘅我同阿叔道別。

至於我呢個從2021年嚟嘅鐘耀輝，阿叔就懶得理。



佢拎住工具箱行出門口，而我就照跟住佢，總之一定要講掂對方。