回到過去，破我未婚妻個處: （28）

第二日朝早唔夠八點，十六歲嘅我就嘈醒我。

「喂喂喂！唔好訓！快啲起身！」

我睜開睡眼，望一望客廳個鐘：「都未夠八點半，俾我訓多陣先啦。」

「訓你個死人頭咩！快啲起身啦！」對方夾硬扯我起身。

「搞咩呀你，想訓多陣都唔得。」



「陣間有人上嚟，你快啲閃人，唔好又好似琴日咁阻住曬。」

「邊個咁一大早上嚟？」我揉揉睡眼問。

「你唔好問咁多，快讓個位嚟…」

「叮噹！叮噹！叮噹！」

門鐘響起。



「拿，我依家去開門，你刷完牙好快啲閃人！」

我俾「自己」推入廁所。

洗完個臉，個人清醒左啲先諗起，上嚟嗰個應該係小曼。

佢嚟同我補英文。

中學嗰陣我啲英文好差，小曼義務幫我補習，作為交換條件，我就幫佢諗辦法追阿德。



我咬住牙刷，行出廁所望下。

十六歲嘅我摷亂自己個頭，打開度門：「乜係你？神咁早響人門鐘嘈住曬，咩事呀？」

「你唔係呀嘛，仲未起身？琴日咪講左八點上嚟同你補習囉。」

十六歲嘅我伸伸懶腰，打一個喊露，扮曬嘢咁話：「係喎，唔記得約左你添，但你都唔洗響咁多次鈴架，想嘈死人咩…」

「邊個叫你咁耐都唔開門。」

小曼入屋見到我，點頭對我打一聲招呼，我亦點點頭講左聲早晨。

佢地兩個坐喺廳度補英文。

「早幾日我俾你嗰份past paper，你有無拎嚟做？」



「有，不過reading有啲難，做左幾題就放棄左。」

「篇嘢唔係好多生字，應該唔難架，你分明係懶先唔做。」

「你識就梗係唔難，我唔識咪覺得難…」十六歲嘅我漫不經心咁反駁。

此情此景勾起左我好多埋藏喺心底嘅回憶。

眼前呢個我擺出一副懶係唔專心嘅樣，實際不知幾留心對方嘅每一言，每一語。

雖然知道小曼唔鐘意自己，但能夠有機會同對方獨處，心入面已經好開心。

十六嘅我望過嚟，做口型叫我走，而我亦無謂做「電燈膽」，刷完牙就離開住所。



對我嚟講，十六歲嘅事已成過去，做人要向前望，依家嘅我有更重要嘅任務。
 
經過琴日仔細思考，我又諗出一個方法嚟破Veronica處。

我搭車過黃埔，喺車上先打電話俾Veronica。

電話響左一陣，對方先接聽：「喂，邊位？」

「請問你係咪陳嘉玲？」

「我係，你係邊個？」

「我叫鐘耀輝，係琴日喺土瓜灣球場，撩Kevin鬥波但輸左嗰個人，我知你背住Kevin，依家同緊佢嗰個金毛仔隊友偷情。」

「你…你點知架…」佢語帶驚訝。



「我仲知道，Kevin依家帶住兩個friend，準備嚟捉姦。」

「Kevin佢知道我啲嘢？無可能…」

「如果我係你，就會即刻叫個金毛仔走，費事俾人捉到正。」

「點解我要信你？」

「你可以唔信我，不過到時唔好後悔。」

講完我就cut左佢線，心入面祈求Veronica聽我講，趕走個金毛仔，唔好俾Kevin發現。

一落左車我就趕過嚟碼頭。



Kevin幾乎同我同一時間出現。

「Kevin，你喺度嘅？」Veronica身邊不見金毛仔嘅身影。

「得你自己一個？個…個姦夫呢？」Kevin東張西望。

「咩姦夫？你講緊咩？」

「你兩個又話見到佢同個金毛一齊嘅？」Kevin反問身邊兩個friend。

「Er…唔通睇錯…」

「可能係我地搞錯左…」

Veronica「下」左一聲：「Kevin，你講緊邊個金毛？」

「無嘢，佢兩個話見到你同第個男仔一齊，照咁睇嚟應該只係一場誤會。」Kevin對Veronica講。

「搞錯呀，人地對你一條心，點會做啲對唔住你嘅事？」

「我知你對我好，今次係我唔啱，咁都誤會你，一係我請你食lunch補數？」Kevin話。

「哈哈！算你啦！」

「你想食乜，俾你話事…」

二人拖住手慢慢離開碼頭。

計劃暫時進展得好順利。

佢地兩個食完飯，Kevin送Veronica返屋企，而我一早就嚟到家維邨度等。

等到Kevin離開，我行上前拍一拍Veronica膊頭。

對方回頭一望問：「你係邊個？」

「我係咪無講錯，Kevin真係去左捉你姦？」

「哦，原來啱先通風報訊嗰個就係你。」

「你係咪爭我一句多謝？」

「點解你會知Kevin會嚟捉姦？唔通你識Kevin？」對方問。

「我唔識佢，我知係因為我有預知未來嘅超能力。」

「哈哈哈！」Veronica大笑出聲，「你當我Kai子？你係咪睇戲睇上腦，呢個世界邊度有超能力？」

「你笑即係唔信我？好，依家係下午一點五十八分，」我拎部Nokia出嚟睇一眼時間，「兩分鐘之後，運輸署就會打俾你。」

「哈哈，無端端運輸署點會打俾我？」

結果踏正兩點，Veronica嘅電話並無響起。