回到過去，破我未婚妻個處: （36）
趁對方唔喺度，一於霸返間房嚟恰一恰。
入到房，第一眼我望見書檯上有一張自製聖誕卡。
呢個係嗰種立體聖誕卡，即係一打開就會有棵聖誕樹豎起嚟嗰種。
我整嘅呢張上面有聖誕老人、有馴鹿、有雪花、有屋仔，仲有一個人。
個人樣黐左小曼張相，係我喺班相剪落嚟貼上去，另外胸前貼左兩粒木瓜，諗住用嚟潤下無乜身材嘅小曼。
原本我係諗住送俾佢，但最後都無送到。
至於喺眼前檯面上呢張都仲係半完成品。
或者我應該提一提十六歲嘅我，唔洗曬心機捱眼訓整，因為最後都唔會送出去。
我訓上床諗住恰半粒鐘，點不知一訓就訓到夜晚十點。
十六歲嘅我返到嚟，大聲叫醒我。
「頂你咩，問都唔問就入人間房，仲訓人張床！」
「洗唔洗咁惡，呢張床我訓二十幾年，訓得仲耐過你。」
「你有無搞過我間房啲嘢？」佢即刻檢查檯面上嗰張自製聖誕卡。
「鬼得閒搞你啲嘢，仲有我要提提你，今晚唔好再三更半夜放CD播歌。」
「講咩呀你？我幾時三更半夜播歌嘈住你？」
「我提醒定你先啫。」
「都唔知你講乜，快返出去啦。」
條友無大無細，趕我出房都有。
「流星可信麼，怎相信因果，可知我偏偏想太多…」
唉！我提左佢都係咁，條友又三更半夜播CD。
「想得太多，想得太多，可知我瑟縮在被窩…」
「大佬呀，咪叫左你唔好播歌囉。」
「Sorry囉，無下次。」
佢播左一陣就熄左，跟住返入房繼續傾電話。
然而佢播嘅Mr.同名專輯入面嘅《想太多》，呢首算係我中學成日聽嘅一首歌。
小曼鐘意嘅係阿德，而唔係自己，首歌用嚟提醒自己唔諗咁多。
而我呢刻都唔好想太多，拿拿臨訓返教，費事搞到聽日無精神。
2009年12月24日，我已經第五次過同一個平安夜。
手臂貼上左青龍右白虎紋身貼紙，臉上黐條三吋刀疤，再擸起短鐵通，我地一行人浩浩蕩蕩出發到何文田。
陣間Veronica就會帶住𠝹刀喺Kevin面前割手，而佢必定會經過一條細巷，我地就會喺度落手。
「啲啦啲噠，啲啦啲噠，啲啦啲噠噔~」懷舊嘅Nokia鈴聲響起。
負責睇水嘅高佬威打嚟，我聽電話問：「點？咩環境？」
「目標人物出現，正朝目的位置行近，距離大約唔夠一百米。」
「好，收到！」
我叫其他人圍埋嚟：「目標人物嚟緊，大家打醒十二分精神，準備好未？」
「準備好！」眾人齊聲回答。
兩分鐘之後，Veronica獨自一人行入巷仔。
十六歲嘅我、阿德、森仔、馬騮行動快速，分別喺前後包抄。
我負責殿後，未蒲頭住。
「你地係咩人？想點呀？」Veronica嚇左一跳，想走但被包圍住，所以走唔到。
「我大佬睇中左你，想你跟佢返去做佢條女。」
十六歲嘅我講得無嚟神氣，我心諗快俾啲氣勢啦。
「你…你大佬係邊個…你地想點？」Veronica慌張咁問。
「精嘅就乖乖地跟我地返去，如果唔係就…就…就…」
森仔講到一半唔記得對白，好彩佢識執生，大力用鐵通打落幅墻度兇人。
「做咩呀？紋曬身以為係黑社會我就驚你，我都有武器架！」Veronica終於攞把𠝹刀出嚟。
「仲同佢講咁多做咩！一於夾佢返去啦！」馬騮按照我嘅計劃一撲而上。
佢件衫裡面攝左一排裝住番茄汁溝水嘅「血袋」，最底一層就墊住護墊，只要Veronica把刀輕輕一掂，咁啲紅色番茄汁就會巴巴聲流出嚟。
問題係對方把𠝹刀塊刀片都未伸曬出嚟，做咩咁快就撲上去...
出到嚟嘅畫面變左，Veronica攞住把突左少少刀片頭出嚟嘅𠝹刀，插到馬騮流血倒地。
「仆街！你個八婆！竟然隊我！我做鬼都唔會放過你！兄弟，你地一定幫我報仇！要幫我攞返個公道！我唔得啦，有緣我地來世再見...」馬騮自己幫自己加對白，講完一大輪先肯「死」。
佢身上啲「血」巴巴聲咁流個不停，嚇到Veronica幾乎出唔到聲咁滯。
「唔…唔…關我事架…係…係…係呢條友自己仆埋嚟…」
雖然計劃同我想象有些少落差，但都唔理咁多照上。
我舉住鐵通，大搖大擺咁出場，聲大大咁講：「發生咩事！」
「大佬，呢個女人隊死左馬騮！」阿德接我嘅對白。
我碌大眼望馬騮條屍，假裝驚愕中帶點傷心：「你…你個八婆居然光天化日之下，殺死我條𡃁？」
「係你條𡃁自己撲埋嚟，而且我塊刀片又未伸出嚟，所以唔關我事架！」
「仆你個臭街！你仲想抵賴？你望下你把刀仲有你雙手，上面沾滿曬我條𡃁嘅血！咁都話唔關你事！」我哄近埋去，用兇狠嘅眼神睥恆佢。
佢神經反應式丟把刀落地：「咁…咁你想點？」
「我俾三個選擇你！一係就報警，二我就隊冧你，三就係你同我訓一晚。」
「有無...第四個選擇？」
「咳咳！」突然間傳來咳嗽聲。
「咦！你手下好似未死，佢啱先咳左一聲。」Veronica指住攤緊屍嘅馬騮講。
「流咁多血都未死？你想甩身都唔好作個咁嘅大話！點呀，三個選擇你揀邊一樣？」
「我無心殺佢，俾次機會…」
「我俾你老母！既然你唔識揀，咁我幫你嚟幫你揀！我要你同我上床！」
我捉住佢隻手想拉佢走，對方想反抗，我再兇佢：「你唔跟我嚟，我就call三條九，你知殺人好大罪！」
Veronica儘管心裡萬個不願意，但都不得不屈服。
我連同其他人一齊帶佢到旺角一間酒店。
計劃進行得好順利，下一步我就係食佢隻豬。