回到過去，破我未婚妻個處: （52）

佢地七個人加埋我八個人圍住火爐，一邊吹水一邊燒嘢食。

「小曼，你隻雞翼燒燶曬啦，不如食我呢隻。」阿德幫叉上燒好嘅雞翼塗上蜜糖。

「唔好啦，你燒左咁耐，留俾你自己食啦。」小曼有啲唔好意思接受。

「唔洗同我客氣，俾你食試下我啲手勢。」阿德將自己舊雞翼，讓俾坐喺隔離嘅小曼。

「喂喂喂阿輝，你條腸仔燶曬啦。」馬騮提醒十六歲嘅我。



「係喎...燒太耐添。」

十六歲嘅我望住小曼同阿德坐到咁近，又有傾有講，個心酸溜溜，全晚都心不在焉。

「燶左嗰啲唔好食，會生cancer架。」小曼對十六歲嘅我講。

「係咩？其實都唔係好燶啫，無所謂啦。」十六歲嘅我無聽小曼講，連埋啲燶位都食埋。

「話時話，點解阿德你燒得咁靚，但我燒到燶曬嘅。」森仔隻雞翼燶到黑曬。



「因為你廢囉。」Kelly窒森仔。

「收皮啦，你睇你粒墨魚丸，咪一樣燶曬邊！」

「我鐘意食燶邊呀，你吹咩？」

呢兩條友又試喺度吵鬧。

至於我呢個成年人就顯得格格不入，加上心情又唔好，幾乎都無出過聲。



亦都係因為心情唔好，所以燒到中途，諗住去沙灘出面間七仔，買兩罐啤酒飲下。
 
「你去邊？」十六歲嘅我問。

「去買啲嘢飲。」

「係喎，我地啲嘢飲都差唔多無曬，阿輝堂大佬，不如順便幫我地買啲返嚟？」馬騮呢條友使人唔使本。

「得嘅，你地飲咩呀？」我問。

「可樂！」「雪碧！」「忌廉，加多樽礦泉水，加多排朱古力……」

班友要買咁多嘢，我一個人點拎得曬，決定拉埋十六歲嘅我去買。

我地兩個嚟到七仔，佢就買汽水嗰啲，我就買我嘅啤酒。



埋單嘅時候，見到小曼行入鋪頭。

「咦，點解你又過左嚟嘅？」十六歲嘅我問。

「無，我突然間想食燒賣，咁咪過嚟買，你地唔好走住，等埋我呀。」

小曼拎住盒燒賣，十六歲嘅我拎住一袋汽水，二人並肩一齊行。

我就飲住啤酒，慢慢行喺後面。

「燒賣熱辣辣，你食唔食呀？」小曼督住一粒燒賣問。

十六歲嘅我擰一擰頭。



「你唔食咁我就自私食。」

「都唔明你嘅，明明燒緊嘢食，無啦啦走嚟食燒賣都有。」

「突然間想食咪食囉。」

小曼行行下，突然掹一掹十六歲嘅我件衫，並指向夜空：「哇！你快啲睇下，嗰粒係咪流星？」

「邊係呢，飛機嚟嘅啫。」十六歲嘅我抬頭望上天空。

「唔係喎，真係似流星喎，人地話對住流星雨許願，個願望就會實現。」

「下？係咩？」

「係呀，你快啲一齊許返個願望啦。」小曼瞇埋眼。



十六歲嘅我跟住對方合埋眼許願。

夜空上嘅光點消失，二人慢慢睜返開雙眼。

「你許左個咩願望？」十六歲嘅我問。

「哈哈，唔話你知」

「你唔講我都估到啦，肯定係希望可以同阿德一齊。」

小曼無正面回答，反問：「咁你呢？」

「我都唔話你知，到時願望成真左，先再話你聽。」



「哈哈，好呀！」

我當時許下個願望，係希望自己可以同小曼一齊。

佢地慢慢行返落沙灘，十六歲嘅我準備左好耐嘅嗰張聖誕卡，一直收埋喺後面褲袋。

呢一刻，佢想趁人少少送俾對方。

偏偏就係呢個時候，阿德同其他人朝住二人行過嚟。

十六歲嘅我即將目睹自己鐘意嘅人被表白。