回到過去，破我未婚妻個處: （60）

凌晨嘅巴士乘客不多，我地坐到巴士上層最前排。

平時我地都幾多計傾，但唔知係咪飲大兩杯，個頭暈暈地，上到車我同佢都好靜，無咩點講嘢。

隔左一陣，佢開口問我：「頭先人多唔好意思問你，Veronica個處你破左未？」

我點點頭，「嗯」左一聲。

「哈哈！咁咪好囉，咁結婚嗰陣，你終於唔洗驚自己會死，恭喜你！」



我帶著苦澀，微微一笑。

換係平時，我諗我會同佢講Veronica嘅事，但今日都算係佢開心嘅日子，我無謂講啲唔開心嘢掃佢興。

「但你地點解突然唔擺酒嘅？」佢問。

「突然唔想擺咪唔擺囉，咁你呢，你真係諗清楚啦？你同Eric先拍左一個月拖，你唔覺咁快結太急咩？」

「快唔代表急嘅，係適合，又係鐘意嘅，咁咪結囉。」



「真係咁鐘意？」

小曼點點頭，講左一句「梗係啦」，然後就無出聲，靜靜咁望住前面車外嘅風景。

架巴士駛到西灣河，我陪佢落車行返屋企。

中途佢話飲完酒，個人仲有啲wing，想到海旁吹下海風，清醒一下。

其實今晚都無乜風，天氣仲有啲悶焗。



海水拍打岸邊，發出「嘩啦嘩啦」嘅聲音。

小曼望住個海喺度發呆，然後同我講：「你就好啦，有得時光穿越，返到過去完成一啲之前做唔到嘅事，我都想穿越返到過去，做一啲之前無做到嘅事。」

「例如係咩事？」

佢諗左一陣，講笑咁話：「例如係發育時期食多啲木瓜咁囉，哈哈。」

「哈哈，呢個真係要啦，不過我發現到，我之所以能穿越過去，應該係因為你送俾我嗰道符，我上網check過話你嗰道係叫『穿越咒符』，但聽聞已經失傳左，你記唔記得道符係喺邊度求返嚟？」

「下？呢個…我都唔記得啦…」

「哦，咁算啦。」

我兩個又靜左無出聲。



今日感覺有啲奇怪，我地間多左好多突如其來嘅沉默。

過左一陣，佢又問我：「你仲記唔記得，嗰日阿德就係喺呢度，撞破左我地嘅『姦情』？」

「咩『姦情』咁難聽，講到我同你真係好似姦夫淫婦咁。」
 
小曼口中講嘅「姦情」，講緊嘅係當年喺會考前三個月發生嘅一件事。

亦係我同阿德由好朋友，變得疏遠嘅開始。

當年我地備戰會考，經常約埋一齊返學校自修室溫書。

嗰一日，小曼嚟遲左，大家問佢點解咁遲，佢話就訓晏左。



而我留意到佢眼圈有啲紅，好明顯係喊過嚟。

我地圍埋一齊溫書，小曼成日溫溫下行去廁所。最後仲行開左好耐都唔見人。

阿德佢地掛住討論past paper，投入得滯，無為意小曼離開左個位都幾耐。

我覺得有啲唔妥，於是出去揾下佢，揾到嚟附近呢個海旁，就見到佢一個人對住個海喺度喊。

佢嫲嫲病重入左院，成晚無訓喺醫院陪嫲嫲，對眼紅曬係因為驚佢嫲嫲有事，擔心到係咁喊。

明明好傷心，但偏喺大家面前就扮到無事咁，仲偷偷地嚟到海旁一個人喊。

我走過去安慰佢，行埋到面前嘅時候，佢撲埋嚟我懷抱，攬實我痛哭不停。

溫熱嘅淚水沾濕我嘅衣襟，見到佢咁傷心，我情不自禁咁伸手攬過去。



結果就俾阿德見到呢一幕。

或者係呢一幕令佢誤會左我地，無幾耐佢就同小曼分左手。

至於呢件事亦成為我同阿德之間嘅芥蒂，我覺得自己對唔住佢，後來中學畢業後都唔敢揾對方。

而我同小曼平時好少提起呢件事，今晚佢唔知點解無啦啦拎出嚟講。

「點解嗰日你會出嚟揾我？」

「你唔見左咁耐，以為你俾人拐走左，差啲想call三條九添。」

「哈哈！原來係咁，咁睇嚟你都幾關心我。」



「哈哈，都係架。」

「好啦，走啦，眼訓要返屋企訓教啦。」

小曼打一個喊露，轉身離開：「你唔洗送我啦，我行呢邊。」

「唔洗送？」

「唔洗啦，我行過街口就係，你都早啲返屋企訓啦，bye bye。」

「bye bye。」

講完bye bye，我先醒起有啲嘢應該問下佢。

我想問佢平安夜嗰日，點解無將嗰張貼住大波妹背景嘅聖誕卡送俾我。

算啦，等下次得閒先再問啦。

第二朝唔洗返工，我訓到十一點先起身。

一訓醒，打開電話，彈出幾十條message，全部都叫我節哀順變。

無端端講埋啲咁嘅嘢，嚇到我以為我老豆老母瓜左，拿拿臨打俾佢地問平安，佢地反問返我咩事。

嚇到我呀，幾驚係佢地出事。

既然無人死，咁做咩同我講節哀順變？

原來有事嗰個係Veronica。

琴日下晝有一架遊艇失控，撞到岸邊而沉沒。

船上一行十五人，九死六傷，Veronica就係其中一個。

聽返佢老豆老母講，Veronica知道自己大步攬過唔洗死，開心到約大班朋友出海船p，點不知竟然遇到意外，就咁就一屍兩命。

Kevin都係船上，但佢無死到，只係斷左兩隻腳，聽聞佢好傷心。

至於我聽到呢個消息後，突然間參透左一啲嘢。

原來生死有命係真嘅。

就算我改變左過去，願意同佢結婚救佢一命，但該死嘅始終都係會死。

與任何人無尤。