念念不忘 都冇迴響: 轉機

去到九月一號開學果日，我約左之前同我地釘耳果個同學返學，亦即係佢本來個朋友，其實諗諗吓佢都幾重要所以比翻個名佢，佢叫陳珊蕾。而另一個同我地出去，我本來個朋友就叫李逸桐，佢不幸留左級，所以得翻陳珊蕾同我同班，搵佢一齊返學全件事都好理所當然。

排隊果陣，遊爍嵐主動行埋嚟同我講野，好耐冇見，又無得直接同佢講我好掛住佢，或者怨佢無聯絡我，所以我唯有保持禮貌，講下客氣說話。

早會畢竟都要開始，我等佢翻去佢果班排隊啦，點知佢繼續企我隔離

「喂，早會開示啦，你仲唔行？」

佢只係笑著我，知道早會開始先同我解釋：



「我同寧楷婷一齊搵左校方講，其實全件事都超無公平，我地又冇打算讀理科，講講下叫埋屋企人幫手講，所以咪入翻英文班做你同學咯！」

經過左整整一個八月，我已經接受左我地同唔到班嘅事實，依家佢突然又話聽到班，我最大嘅感受無係開心，而係覺得自己又俾人呃左。如果有當我做朋友，發生咁大件事點解唔早D講？如果比著其他人，理論上都會立即開心到同人分享。所以果陣我極度懷疑到底佢有冇當過我做朋友。

翻到課室因為第一日可以自己揀位，前一晚我應承左同陳珊蕾一齊坐，所以就唯有眼白白望住佢同另一個朋友坐，順帶一提果條女叫李姿穎。我同陳珊蕾分享左我嘅不解，佢作為遊爍嵐另一個好朋友，同時都覺得自己比人呃左。所以果排我同陳珊蕾係熟左好多，就算好多野表面上會同遊爍嵐同李姿穎一齊做都好，我同陳珊蕾始終都有共同嘅心結，始終比較熟小小。甚至我地有時放學會自己走，或者自己食飯，都冇同遊爍嵐食。
其實都幾可笑，當年遊爍嵐話無肯同我食飯係怕阿陳孤單，但轉個頭阿陳同我可以單獨做好多野都無預佢，依家回想起姐係咁講。