念念不忘 都冇迴響: 空缺

又一年九月一日，入左英文二班嘅我，努力咁維持笑臉，好怕比人睇得出我唔開心。

好彩上年全個學年有咁多次中文評估就調足咁多次位，同我一齊入英文二班中，有好多個我以前都有D交情，甚至可以話係朋友，所以我一D都唔孤單，只係有啲唔習慣冇遊爍嵐姐。

講番英文二班啦，個班主任係一個好fun嘅人，好快第一日已經同我地打成一片，有講有笑。第一日通常咪要選D一日一職嘅，離開左精英班，我竟然有機會做班會，所以對我來講都係個新嘅經驗都幾有趣。

放學果陣我都係跟翻遊爍嵐，李姿穎同陳珊蕾一齊走，都唔記得咗係我等佢哋定佢哋等我，反正我記得有咁樣嘅一段時間我好努力咁證明自己系二班都好開心。

咁事實上其實係真係幾開心，二班啲人冇一班競爭咁大，上堂氣氛都比較搞笑同輕鬆，再加上二班啲人來自五湖四海，所以都冇精英班咁小圈子，大家都玩得幾埋。嗰陣時全個二班啲女仔都幾團結，我好自然咁都多咗好多朋友。但係每次見返一班嗰啲人，我都莫名其妙咁覺得自己係證明緊自己冇事，當你需要自證明自己過得好好過得好快樂，其實全件事係有啲辛苦嘅。



連我自己都唔知道自己係咪真係咁快樂。