念念不忘 都冇迴響: 外篇：醉

喺Hall嘅日子，有唔少機會飲酒，我亦都醉左無限次。但其實我第一次飲醉酒，係喺中六暑假果年，我同一個叫金賢曼嘅二班朋友上山發生嘅事。

果一日我地兩個去左行一座唔係特別高嘅山，上到山頂嗰陣，我哋拎咗啲燒酒出嚟飲，果次都係我哋第一次飲燒酒。都是純粹係覺得吹下水飲下就好似好chill咁，我完全高估左自己嘅酒量，飲完兩支之後，真係醉倒PK。

沿路下山嗰陣，我完全冇記憶我係點落山嘅，聽翻金賢蔓講，我不斷胡言亂語，扶住佢，差啲跌多幾次。我真係唔太記得我講咗啲乜嘢，但係我知道自此之後佢都知道左我鍾意遊爍嵐，咁其實我都冇乜所謂比佢知，因為呢個都係事實。

好不容易我返到屋企之後就開始嘔，嘔完之後就攤左係張床嗰度，我唔記得點解我會同遊爍嵐講電話，可能係我主動打俾佢?或者佢發現我做咗打黎關心下我? 反正我唔係特別記得我同佢講左乜但係我記得幾句：

「你快啲休息啦。」



「但係我未沖涼喎。」

「咁一係你沖涼先？」

「下點樣沖涼㗎？」

「乜嘢點樣沖涼啊！」

「遊爍嵐，我好掛住你。」



我唔記得咗當時佢點應我，亦都唔肯定我係咪真係講咗呢句話，第二朝我估佢係應我，話我醉左。後來我吧我完全唔記得我講過啲乜嘢，佢都相信我，亦都死都唔肯同我講我講咗乜嘢。但事實係其實我真係記得小小，我記得我衝動之下講咗我掛住佢呢個事實。哈哈，又講多咗個大話。

//

講番系Hall, 有一次我飲醉左已經係凌晨四點，嗰陣我好想打俾遊爍嵐，或者話我後來發覺我每次醉都好想打俾佢同佢講野，但係我用我僅餘嘅意思力阻止左我咁做，費事凌晨四點嘈醒人。反正最後我打咗俾金賢曼，大概內容係：

「遊爍嵐系邊？」

「我好掛住佢。」



當時我冇同Hall嘅任何一個人講我鍾意遊爍嵐，有啲嘢佢哋唔需要知。所以第二朝嗰陣，好彩佢哋全部都醉晒，只係有一個人記得我講過話掛住人，但係佢記得我掛住嗰個人姓鄧，咁就冇所謂啦反正佢記錯。

//

我生日果日我地樓D人都有飲酒慶祝，第二日清醒翻果陣為左解酒，我打左比遊爍嵐講嘢。遊爍嵐大概叫我唔好太掛住佢之類，其實佢中三果陣都好鍾意咁講，或者話佢係全世界最得意之類，我由一開始會反駁到後來竟然無否認間，其實係慢慢鍾意左佢。反正久違地佢突然叫我無好太掛住佢，我應左句

「我親晚醉係因為慶祝，而唔係因為我掛住你。」

唔知道佢聽唔聽得出我根本就冇否認過我話住佢呢個事實。

//

結論就係飲酒傷身，大家都唔應該飲咁多酒。

而家回望，從中四嗰年一罐啤酒都飲唔完，到後來可以飲燒酒，有時會跟hall d 人一齊落飲酒，真係另類嘅長大。順帶一提遊爍嵐反而係完全飲唔到酒，佢一飲酒塊面就會紅到好似跑完9分鐘耐力跑咁，所以我都幾安心，希望佢永遠都唔好飲到我咁癲咁辛苦，不過本身佢都係一個好有分寸嘅人，我諗佢唔使我擔心嘅。