念念不忘 都冇迴響: 儀式 一

咪講過畢業其實係個四部曲嘅，作為班會成員嘅我，考完DSE都係時候要準備惜別會同grad din。

唔知係咪每間學校都有搞惜別會嘅傳統，反正就係每一班拍一段片之後上台多謝下老師咁。而我哋學校一向都鍾意惡搞風，會拎老師啲上堂精粹重演一次，低年級學生睇得開心之餘，畢業嘅我哋其實笑中帶淚，無限懷緬。

遊爍嵐份人對學校冇乜特別大嘅感情，佢自從中五開始就掛住讀書，日日又覺得好辛苦咁，佢最後連校友會都冇參加到，惜別會呢啲選擇性活動佢自然都冇參加。何況精英班其實來來去去都係得班每班人會投入班會活動，小圈子去到最後依然都係小圈子。

反正我哋嗰班都叫成功拍咗段片出嚟，因為我哋嗰班太癲所以有好多素材，最後段片我覺得幾好睇嘅。

到惜別會嗰日喺個禮堂，我諗起以前每次入禮堂我都會睇吓遊爍嵐坐系邊，但係如今已經冇咗佢嘅身形。精英班拍果段片，好主觀我會話冇我哋嗰班咁好睇，但係個精華係喺佢開始感謝老師嘅時候，投影咗好多相出嚟。目不轉睛咁樣望住大螢幕裡面嘅遊爍嵐，當初覺得冇得同班個世界好似冧咗咁，原來咁就兩年，我畢竟捱過咗中學生涯連DSE都考埋，其實都幾感觸。



以前係低年班嘅時候，其實都真係幾鍾意睇惜別會。嗰種感覺就係有專業嘅拍攝團隊記錄咗你喺學校嘅日常，因為嗰啲片好有親切感，所以分分鐘好睇過YouTube啲片或者劇集甚至戲。唔係講緊個拍攝手法嗰啲，而係講緊佢個內容，平凡之中就係記錄左我哋校園生活嘅點點滴滴。六年嚟覺得好平凡嘅日子，你擁有無限細細碎碎嘅回憶，但係呢啲回憶最尾都唔可以拼返一個完整嘅中學生涯出嚟。但係每次諗返起，平凡先係最大嘅幸福，以前覺得唔會完嘅日子，畢竟去到最後，時光已經不再了。