話咁快就終於去到畢業儀式最後一環,畢業禮。老實講我哋學校比較地區少少,所以話畢業禮係簡單而隆重,絕對冇言過其實。簡單嚟講成件事都好普通,只不過係上堂影張相落返嚟咁樣。我懷疑我小學個畢業禮仲隆重過中學,我間小學好鍾意做啲有的沒的嘅事,單單係綵排已經有三日,所以總好過真係比普通更加普通,真係冇乜特別。

果日經過咗grad din嘅磨練之後,我都已經唔夠膽素顏上陣咁返學,化個仿自然妝噴埋香水,先夠膽出門口。返學搭車果陣見到游爍嵐,我一如往常咁冇特別同佢講嘢。直到後來有一次無聊傾偈,先知原來佢一早已經認得我香水陣味,我一上車佢已經知道。

呢樣嘢令我諗返起,幾年嚟我無數次喺佢身後行路,唔知點解我係習慣咗咁做,有一次lunchtime行緊出去食嘢,嗰陣我哋身邊已經有各自嘅新朋友,行行吓佢突然間回頭,話感受到我係佢身後,冇純粹講吓成事少神奇。

講返先,如我所言畢業禮真係好普通,最特別嗰個環節係唔知點解學校勁有心,佢突然間整咗段片show返我哋中一個樣出嚟,係每個人都有show。雖然呢啲嘢真係世紀黑歷史,不過都幾好嘅,當初青蔥嘅我地,已經成長成為今日嘅我地。六年嚟髮型都換過幾次,臉龐都逐漸成形,我哋可能會唔記得咗當初嘅自己,所以睇返以前啲相真係好神奇。

總之完咗個無聊嘅儀式之後,啲人開始拎住啲畢業公仔喺個操場影相。老實講影咗咁多次相之後我都冇乜心情再特別影,不過都最後一次啦捱埋佢。我影影下相果陣,依然受到遊爍嵐打比我嘅電話,佢叫我去搵佢影相。當下其實真係好開心嘅,最少佢仲記得我,會想同我影相。



反正喺畢業禮影嘅相遠遠比唔上之前嗰幾個活動,嗰一日我都唔係特別開心。最後一次離開學校拎住個畢業公仔同屋企人一齊,咁樣離開學校係第一次都係最後一次。呢個回憶唔會特別深刻,因為得一次。如果要回望,我比較會記得一路拎住個撈麵一路行,同啲friend沿路嘻嘻哈哈行去個港鐵站,或者因為趕住去補習喺度跑果D日子。

不過畢竟呢個都係我最後一次好有印象咁離開學校,雖然唔係好值得記得,但係回望返都諗得翻起。

果晚同兩個朋友無聊去左公園吹水飲酒,畢業,原來係一件咁平實嘅事而已。到咗嗰日應該講嘅嘢已經講完,唔會有Last day果分激動、唔會有惜別會果份念舊,都唔會有grad din嗰種刻意。畢業,畢竟畢業,原來不過如此。
已有 0 人追稿