念念不忘 都冇迴響: 見面 二下

雖然約得好倉猝，反正我哋就決定咗佢生日嗰日去海洋公園。我記得嗰日因為我哋都覺得海洋公園啲嘢食好貴，好似我哋都會喺出邊間711買麵包入去食，但係生日都食麵包好慘㗎嘛，所以嗰日朝頭早我提早去咗Donki買便當同蛋糕俾佢。

見到面嗰陣佢問我：

「點解你今日咁得閒嘅唔使上堂咩？」

「唔使呀今日咁啱有day-off。」

「真係？」



「梗係真啦如果唔係邊會咁得閒！」

事實上我一早已經托左我身邊啲人幫我掛機，完左成日之後我先發覺有份野2359deadline,本來我以為係第二日，反正全件事真係無限驚險。

反正入到海洋公園，全件事都係一如既往咁自然。一齊周圍玩機動遊戲一齊睇海洋生物，一齊吹水共渡無聊嘅時光。我冇專登隱瞞自己果排有幾唔開心，甚至後來我竟然俾人鬧我有時間去香港公園，佢哋覺得我應該每1分每1秒都用喺支莊度，諗返起都覺得痴線。但係當下同佢一齊嘅時候，全件事真係好自然，果種開心單純嘅感覺，令我忘記咗本來嘅我有幾唔開心。

其實同遊爍嵐相處真係一種好自然嘅感覺，我曾經有同佢講過，喺佢面前我係最真實嘅自己。但係後來我發現，可能喺佢面前嘅我唔係真實，而係我比較鍾意喺佢面前嘅自己。喺佢面前嘅我，老實講有啲戇居，我可以將我好多無謂嘅執着同諗法分享俾佢聽，佢又會好認真咁應我，得閒笑下我，令到我覺得雖然喺佢面前我可以做返一個小朋友。

唔知點解每次同遊爍嵐一齊，佢都會俾我一種好神奇嘅感覺我，真係好難形容，但係一齊嘅每1分每1秒我都覺得好特別。就算佢講廢話講埋啲無謂野，我都覺得呢個人諗嘢真係好特別，同佢一齊好有樂趣。



反正其實我唔係特別記得嗰日我哋講咗啲乜嘢，我只係覺得久違地我覺得好開心好自然。最後我送咗佢去紅磡，因為佢要同佢哋屋企人食晚飯；本來我都要喺附近教補習，不過好彩等等下發現我份功課當日deadline，咁我就急急腳立即返hall做功課。

夜晚嗰陣竟然見到佢post ig,有當日我幫佢影嘅相，嗰種感覺好久違。以前我哋鍾意一齊周圍去嗰陣，我幫佢影咗好多相；但係後來我哋真係一齊好少影相。一方面係因為我哋已經冇去咗啲特別嘅地方；而方面係我覺得好尷尬我唔知點樣突然間同佢集郵，但明明我對住其他friend我係鍾意影無限個story,乜都影一餐。其實我哋兩個都有發覺我哋一齊合照特別少，但係從來出街佢又唔會特別打扮，我又唔會特別提起話要影相，結果見得最多嘅人反而最少相。諗起陳奕迅有句歌詞：

「可不可想不想再次見面，再拍些新的照片」

可唔可以呢？