是咁的，我係一個保險agent: （1）

「咁入醫院做完手術唔住院有無得賠㗎？」
「整親去睇物理治療有無得Claim呀？」
「喂？...」

死啦，個客問嘅嘢我無一條識答喎！

「起身啦、起身啦、夠鐘起身屌西啦！」

嘩！好彩係發夢！
用發夢嚟做一個故事嘅開頭好似好老土咁，但的確入行前我真係發過一個一模一樣嘅夢。係夢入面約咗個客人見面，結果比個客問到一句都唔識答。其實真係一啲保險嘅嘢都唔識㗎喎，而且入行好似要好多人脈先搵到生意，咁點算呢？





咦唔講住，睇一睇個電話鬧鐘，成十一點幾啦已經，再唔起身返學又要搵人幫手take attendance. 是咁的，雖然標題寫住我係一個保險agent，但同時我都係一個在學嘅大學生，打算一邊讀書一邊parttime 做住agent搵錢，而呢一刻嘅我，連保險入職個兩份試卷都未溫，唔知溫完書考完試係咪就會識答客人嘅問題呢。

返到學校，Lecturer教書其實真係幾鬼悶，其實有時都唔明點解大學要讀咁多非本科嘅課程，咩嘢<<宗教、哲學與神學>>，應付完功課同論文之後其實餘生都未必有機會用得著。與其學啲用唔著嘅嘢，不如準備下黎緊嘅保險考試好過啦。我將原本睇緊lecture notes 嘅iPad 轉去睇保險past paper 試題，經理話過其實個考試好容易，操下試題到時考試就會撞返哂啲熟面口嘅題目，即管試試先。

其實望下身邊咁多位同學，有睇緊NBA嘅，有打緊機嘅，有玩緊交友apps嘅，雖然大家都唔係專心聽緊書，但係我都叫做溫緊書努力緊吖哈哈哈。啱啱打完鋪機嘅Gavin見到我埋頭苦幹咁望住部iPad, 就忍唔住貼個頭埋黎問

「轉死性呀？咁勤力搞緊乜嘢？」

「嚟緊考保險牌操緊pastpaper吖」





「無啦啦做乜考保險牌吖？諗住做保險咩？做還做，唔好hard sell我吖」

「講呢啲，話唔定係你搵我呢」

話說點解無啦啦會諗住入行做保險呢？

無可否認地我個經理Alan真係幾sell得，好快就比佢感染到而入行。過去依年一直做住補習其實都幾易做，不過要搵錢的話真係要靠時間換錢，將啲補習學生排到密密麻麻都好，成個月加埋先講緊搵一萬蚊唔夠。當然錢都係其次，最打動到我嘅重點係累積嘅力量。Alan 用分析嘅口吻同我講，同樣係用大學呢段時間做野搵錢，補習總唔可能補一世吖，儲埋嘅經驗畢業投身社會之後都未必用得著。再者，啲補習學生都會長大，唔通升到大學都繼續搵我補咩。相反，保險係累積嘅行業，Alan開始分享佢嘅入行經過。

「好坦白咁講，保險其實唔容易做㗎，嚴格黎講新人時期係多勞少得，去到後期先係少勞多得嘅收成期。咁最辛苦嘅過程留係最有拼勁嘅後生階段去做，以後條路就會變得易行好多，不要在該吃苦的年紀選擇安逸嘛！」





老老豆豆當時都唔係好聽得明，不過又好似幾有道理咁，潮流話贏在射精前嘛，咁我老豆幾時射精我都控制唔到，但襯讀u 依段時間儲下自己嘅身價都好吖，反正又無野輸嘅。

「但我唔想sell親朋戚友喎」

Alan 開部手機打開佢啲WhatsApp 對話比我睇，佢啲客又真係好乖咁樣自己搵佢買保險。

「邊有人買保險㗎？你啲客又會自己搵你咁奇怪嘅？」

「我用緊嘅係最老土最踏實嘅方法，做好服務同口碑，無論陌生人定係親朋戚友都會自己搵上門」

我半信半疑咁就問佢拎咗份溫書材料，乖乖地save 落部iPad到。