只屬於我們的獨特戀愛關係: 16. 沒事發生（2）
喇叭一下轉到熟悉的九十年代音樂。
（寂寞也揮發著餘香 原來情動正是這樣）
「張國榮！」我大叫：「歌名叫咩呢？」
（曾忘掉這種遐想 這麼超乎我想像）
「玻璃之情！」我說。
（但願我可以沒成長 完全憑直覺覓對象）
「唔係。」
（模糊地迷戀你一場 就當風雨下潮漲）
「左右手。」
「錯。」
「有心人！！」
「啱啦。」
「一時三刻醒唔起呢首歌個名。」我說：「有Taste！」
「你認得出張國榮已經好叻。我車啲後生果陣會直接飛呢首歌。」
「即係曲線話緊我老啦。」
「唔係，讚緊你係同一個年代嘅知音人。」
「真係Feel到種Generation Gap，我問後生嘅啲直頭連名都無聽過。」藍天說。
我說：「以前嘅歌手表達感情嘅方式比較隱晦。好似呢首有心人咁，成首歌一個愛字都無講過，亦無任何描述嘅畫面，但字裡行間都會深深咁感受到種愛意。」
我繼續說：「新一代好有創意，感情嘅表達相對率真、感情無咁玻璃心。」
「唔係唔識比較近代嘅歌手，但始終都係細個聽嘅歌最Touch到我嘅心，部分甚至係大咗先識得體會歌詞裡面嘅感情。」藍天說。
「哈哈，你係好念舊嘅人？」我問。
「都算係。以前每一個moment都建構緊而家嘅我。」
「你覺得細個同而家最大嘅分別係咩？」我問。
「……」藍天沉思了十多秒：「我覺得心入面嘅我變唔多。但行為上個人理智行頭。」
「我明你講咩。就係即使內心係幾咁情緒化，行為上都會控制自己。例如今日有個客好無禮貌，細個一有位就會疾返佢轉頭，而家要搵食，我會吞咗啖氣，同自己講轉頭就會唔記得，時間好快過。」我說。
「類似啦。例如細個遇到鐘意嘅女仔會好執著一定要追到佢，點樣死Lur都要佢同我一齊。但而家多咗考慮，亦都放低咗呢份執著，就算鐘意都唔會強求。因為我明白兩個人嘅緣份都包含好多現實嘅考慮，唔係話一句愛、一句鐘意就可以無視所有困難一齊。」
「有啲咩困難？講到尾都係大家唔夠鐘意大家。」我最近的確是如此想我和前男友之間的問題。
「初初出嚟做嘢，有好多錢銀上嘅壓力，覺得自己無能力同埋時間去俾到一個好嘅生活自己鐘意嘅女朋友，亦都控制唔到自己嘅職業。OT完已經好攰，無咩時間陪佢，佢感受唔到我嘅愛、亦都體諒唔到我嘅攰。
後來搵到啲錢，Handle到生活同居嘅時候，又發現兩個人嘅相處隨住時間增加變得愈來愈少火花，感情淡到有同無對方都好似無分別，返到屋企寧願對住電腦都唔願意同女朋友溝通。我甚至會更加享受一個人嘅時光。放假寧願自己一個都唔想陪女朋友去玩。
再識到新嘅女仔，互相有Feel但深知大家性格不合，我地嘅喜好、想法南轅北轍，佢放假好動鐘意周圍去，我相對文靜鐘意留喺屋企。總有一方要遷就得好辛苦。
到終於遇到個性格好，相處到，互相信任，大家對未來搵唔到共識，佢要移民而我又唔想。」
「移民就係你上次同Miki講仲有兩個月就走嘅果個女仔？」我說。心裡想著他的女朋友還真不少，大學畢業後最少有四個。
「係呀。」
「你有幾愛佢？」
藍天逃避問題：「愛唔一定會一齊嘅，個世界就係咁殘酷。」
「我只有一次拍長拖嘅經驗，啲嘢揀咗就唔想變嚟變去。」我說：「所以我覺得感情其實得揀，現實並唔係咁殘酷，只係我地都選擇放棄對方。」
「我愛自己多啲。我唔適合發展一段關係。」
「仲有兩個月，你仲好似咁得閒嘅？唔係應該用多啲時間去陪佢，留返個美好回憶？」
我實在很笨，試圖給予最客觀的意見，把喜歡的人推向別人。
「回憶已經有，再做就多咗。」
「但我相信佢一定會想咁。」
「今日留底嘅美好回憶，他日會變成令自己痛苦嘅毒藥，每次諗返起個心都會好痛好痛。」
「係佢先令你諗唔去定義關係？」這不是一個好問題，知道是誰又如何？沒有任何意義。
藍天沒有回答我。
「你係咪唔打算再拍拖？」我問。
「大家都係人生嘅過客，無謂執著強去追求，勉強無幸福。無任何期望嘅相處反而更加自在。」
他一副看透世事的語氣，言詞間卻透露出他對美好愛情幻想給予無數的失望與消極。
大概不去定義關係是他令自己內心好過一點的自我催眠。
他分明是在逃避。
「我唔識點同人維持長久嘅關係。溝通好攰。」他說。
「永遠唔拖手，咁永遠就唔會分手。」我在陳述他的想法。
「永遠唔拖手，咁永遠就唔會分手。」藍天喃喃自語重覆我的說話。
「夜啦，我係時候返去。」我說。
「嗯。好呀。」藍天說。
我穿好鞋子，藍天送我到大門口。
「多謝你個麵，好好味。」我說。
「多啲上嚟，我煮俾你食。」
「拜拜。」他說。
大門關上。
我到底期待了什麼 。
作為一個異性，單獨到了對方的家卻甚麼都沒有發生。
該興幸還是羞恥？
完全被Friend zone了。
（如果真的太好 如錯看了都好 不想證實有沒有過傾慕）
（是無力或有心 像謎 像戲 誰又會似我演得更好）
（從眉梢中感覺到 從眼角看不到 彷彿已是最直接的裸露）
（是無力但有心 暗來明往 誰說這算是情愫）