只屬於我們的獨特戀愛關係: ZZ. 作者的話（1）

大家好～話咁快故事就到咗尾聲！

首先多謝願意睇到尾嘅你！

《只》無書生或大學故咁多甜位，唔知有無悶親大家呢？

唔算Happy Ending，希望無人掟拖鞋話唔好睇嗌回水啦。

今個故相對無咁Eye catching，好似好少人睇咁～



但自問寫得唔差，有成熟咗，翻睇都仲投入到感覺（笑）

寫之前有做下功課，唔少觀點係出自身邊嘅朋友，相信九十頭嘅讀者對裡面嘅諗法或經歷會特別有共鳴。

輕輕解釋下故事入面出現嘅三種嘅關係，共通Keyword係 #唔夠愛、#藉口、#逃避責任，基本上比較少喺讀書時期遇到，但畢業後容易會遇到。


1）Eugene同前男友

當初因為Eugene條件唔出眾，而且對另一半揀擇要求高，喺無乜選擇之下，而好草率咁同前男友一齊，仲拍咗五年拖。



初時兩人有過好短暫嘅新鮮感，亦都有少量嘅照顧（例如，見到Eugene 整親腳，正常人會問候吓啦），但懶得去溝通維繫（唔會有拍拖活動，去超市買嘢煮糖水都係各自各），佢地嘅關係離愛或情侶遠得很。

雖然前男友主動提出結婚，但呢個行為並唔係出於愛，而係為咗完成人生嘅結婚任務。

佢地嘅關係都可以從Eugene嘅反應睇到。

呢五年與其形容為拍拖，兩人嘅相處更加似係生活嘅Parner，任務導向——即係咩？一齊Share責任、房租、閒時有人陪下食飯嘅同屋主。

但大多數時間，都係各自各嘅生活，無乜共同嘅生活、興趣、朋友。愛猜測而唔去溝通，係好唔健康嘅關係。



『拍咗咁耐拖，唔結婚喺社會責任上好似講唔通。』

『拍得耐，同對方相處又唔係好差；再搵過個好煩㗎，咁咪結婚囉。』

好多時結婚嘅理由，唔一定係出於愛。

但拒絕結婚，多數都係唔夠愛。

因為當你愛一個人，一定會好有信念，變得勇敢，令自己進步，未來嘅藍圖會有對方嘅存在。

而唔係好似Eugene 咁有萬千藉口逃避責任，猶疑說穿了只係唔夠愛，唔想夾硬同對方人渡過餘生，後悔終生。

所以分手對大家嚟講係解脫。



前男友特登不設定角色名，因為對Eugene嚟講根本唔重要，依個人可以代入任何符合條件嘅名字。


2）Miki同Alex

我諗道理無需多解釋，文章入面已經有好多金句，只要你能夠抽離自己，從外人角度去睇呢件事，就會知道問題喺邊度。

當一個人愛你，你一定會感受到，而唔係不停陷入永無止境嘅懷疑與失落。

文章關注嘅中心唔係Alex出軌或Miki做第三者對與錯嘅道德，而係Miki以為自己係第三者，其實只係被當作一個SP嘅苦戀關係。

感性唔相信對方唔愛自己，無問題嘅，咪繼續撞板，真相最終都會令你狠狠跌一跤，面對現實。

可幸嘅係，人生唔會因為失戀而完結。至多咪轟轟烈烈咁愛一次，可能有奇蹟出現，會成功呢，就係Miki嘅僥倖心理。



認識多啲理智嘅朋友，如果佢地嘅意見都一致，聽佢地講多數無死，因為佢地會從你角度諗。

係有好多灰色地帶，但講到愛唔愛，好黑白分明，唔會有人叫自己朋友留喺一個會家暴人啲身邊㗎嘛。但當你愛上一個錯嘅人又唔離開，就等於不停俾機會人地精神暴力自己。

雖然愛情應該由自己落決定，但好多時候我地都會被愛情嘅濾鏡沖昏咗頭腦。不彷叫朋友幫你分析下種種利弊，可能有你未諗過嘅觀點，先再做決定。

有好多人真係好冷血，所以你絕對唔會夠呢啲基因裡少咗感覺嘅人鬥，唔需要對自己咁差。

見到對方有心去玩泥漿摔角，我諗你勸喻佢上水沖涼會好過自己一個衝埋去用愛去感化佢，然後一齊變污糟。

你話自己心靈夠強大，可以扭曲自己三五七年去遷就對方。好似Miki咁，永遠被擺喺最後，間中被關注一下嘅生活。你真係想要一段咁嘅關係？你到底想要啲乜？對方又俾唔俾到你？

每次分手都好似戒毒咁好辛苦；但到最後當你搵到更好嘅人，一定會慶幸自己當初咁勇敢選擇離開錯的人。

盡早止蝕，唔好再浪費時間喺錯嘅人身上了！