［愛情純愛］既然忘記唔到佢，不如試下中意我⋯？: 01. 相似的我們

我地坐喺銅鑼灣海旁，喺行人隧道出口嘅頂上

入夜後變得更涼，坐喺海邊，海風迎面吹嚟，傳嚟淡淡嘅海水味，坐喺呢度可以望到對岸燈火通明，係香港嘅夜景

「嘶⋯！」我嘅右邊臉頰忽然間傳嚟冰凍嘅感覺，我抬起頭望向右邊，「你買完嘢飲番嚟啦？」

岑諾新企喺我身邊，手上拎住兩枝凍飲，臉上帶着淡淡嘅笑容

今日天氣都熱，雖然坐喺海邊感覺會比較涼，但始終都係想飲啲凍嘢冰一下，所以啱啱岑諾新就去咗買嘢飲



「嗱。」佢將啱啱貼到我臉上嘅凍飲遞比我，我嘅臉頰仍然凍凍的

「唔該。」我接過枝嘢飲，用力地將樽蓋擰開，飲咗一啖

嗰種涼氣沿住我嘅喉嚨滑落去，胃裏都變得涼浸浸的，夏天裏嘅透心涼真係好舒服

我望一望坐喺我身旁，同我一樣盤腿坐嘅岑諾新，佢又變番一開始嘅目無表情；佢平時對住我都係咁，佢呢個面無表情、有少許冷淡嘅模樣，大概只有我見到⋯

平日喺學校嘅時候，喺大家面前佢好開朗，但只有喺我面前嘅時候，佢先會收起笑容，擺出一副冷酷嘅模樣



唔係因為佢討厭我所以咁冷淡，而係呢個先係真實嘅佢，一個外熱內冷嘅人⋯

我微微耷低頭，指尖輕輕地掂住樽蓋，心裏隱隱約約地有啲唔開心，有少許刺痛嘅感覺；岑諾新上身微微向後靠，雙手撐着上身，眺望着遠方嘅高樓大廈

「因為今日喺學校嗰件事比佢睇到？」岑諾新忽然開口問道，佢就好似瞬間察覺到一樣

我只係微微耷低頭，佢已經即刻察覺到我唔開心一樣主動問我

我冇出聲回答佢嘅問題，但事實的確如佢所言，我的確，係因為今日放學後發生嘅事而唔開心⋯



⋯

「點呀？」啱啱番到嚟課室嘅岑諾新直接行嚟我嘅面前

5點嘅課室內，除咗我同佢之外，已經冇其他人

我一直坐喺枱上等着岑諾新番嚟，大概都只係喺課室發呆放空，邊放空邊等佢，佢叫我等埋佢先走，所以我就喺課室等佢

「番去？」佢面無表情地望住我，對於佢嘅面無表情，我早就習慣啦

「唔笑嘅你？」 我望住面無表情嘅佢微微一笑

「笑咗一日仲唔夠？」佢淡淡地講道，感覺冰冰冷冷的，「行啦。」

「你對我咁冷淡㗎～對我就唔笑啦⋯」我明知佢唔笑嘅原因但都要調皮地講一下，「明明對其他人就笑得咁開心⋯」



我雙腿輕輕地前後晃着，我坐咗喺枱上之後就同佢差唔多高，視平線一致了

「你咁樣對女朋友㗎咩？對其他人仲好過對我呢個女朋友。」我嘅嘴角微微上揚

「因為得你喺度，我先咁嘅樣。」岑諾新對我淡淡地講道，「明知故問。番去啦，女朋友。」

岑諾新轉身，打算朝自己嘅座位行去拎書包，然後番屋企

「喂⋯」坐喺枱上嘅我一下子拉住佢嘅手，將佢拉番嚟我嘅面前

喺佢面向我嘅時候，我伸手捉住佢嘅校呔向下扯，佢湊近我同時，我直接吻上佢嘅唇

佢一啲都唔意外一樣，我感覺到佢嘅手輕輕地攬住我，我感覺到，口水嘅味道⋯過咗一陣，我先將佢放開；我落地打算拎埋書包同佢一齊走嘅時候，佢輕輕地拍咗我個頭一下



我望向佢，佢亦望住我，喺彼此嘅眼中望到嘅嘢係，係一樣嘅感覺

⋯

「你唔係特登㗎咩？」岑諾新一語中的地問，我都冇話可說

我知道張景彥睇到，我知道佢望到⋯就喺佢同佢嘅新女友孫慧伶經過我地課室嘅時候，我眼尾嘅餘光瞄到佢地經過⋯

我嘅心好難受⋯但我偏偏落唔到嗰一口氣，憑咩我只係一個代替品⋯！

「嗯⋯我係呀⋯係特登⋯」我微微點頭，望住枝嘢飲上嘅水珠沿住樽面滑落，「你見到佢地一齊，你個心唔難受咩⋯」

「難受。」簡單直接嘅回答，突顯咗岑諾新內心嘅難受，「點會唔難受⋯？」

好中意一個人，但嗰個人已經唔屬於你⋯親眼見住佢同第二個一齊，嗰種難受嗰種痛，係冇辦法形容⋯



我嘅手朝岑諾新嘅手伸去，指尖輕輕地掂到岑諾新嘅手心時，岑諾新自動地打開手心

我地緊扣着彼此嘅手，但卻冇為我地帶嚟心動嘅感覺，只有一種同病相憐嘅感覺

你可以話我地係同路人，亦可以話我地係對方嘅水泡⋯我地之間冇嗰種男女之情，只因為大家都係失敗者⋯

我地會一齊嘅原因，大概都只係因為我地都係分咗手後想拍拖嘅人

哈哈，當然唔係⋯我地喺埋一齊，只不過係同病相憐⋯嗰種「我被世界遺棄，卻只有你明白」嘅感覺⋯

望住張景彥同孫慧伶一齊，我嘅心難受，岑諾新嘅心都難受，正所謂「弱者同弱者喺埋一齊先會有安全感」，將呢個道理套番落我同岑諾新身上

「失敗者同失敗者一齊先會覺得有安全感」






IG Link: https://www.instagram.com/nd_cotttoncandy/?hl=zh-tw