［愛情純愛］既然忘記唔到佢，不如試下中意我⋯？: 27. 我真的決定了

「我琴日番到屋企之後，將成盒嘢掉咗⋯」我微笑着望向車窗外，伸手捉住扶手

「嗯。」岑諾新依舊望住窗外

「係以前keep起嘅單嚟⋯」我諗起琴日嘅自己，嗰個拎起每一張回憶放入碎紙機嘅自己，「我琴日將佢地都用碎紙機碎晒～」

雖然有啲唔捨得，但係我決定咗啦已經！既然決定好要放低，咁就要鼓起勇氣踏出第一步呀～

可能過程真係好難，但係決定咗，就唔可以放棄啦嘛～



「既然講好咗，就要勇往直前呀～」我笑着講道，然後望向岑諾新

「知就好，今次唔會突然間又話做唔到之類？」岑諾新望向我

「唔會唔會～」我堅定地搖搖頭，「我地係好戰友嚟㗎嘛～我又點會掉低戰友自己一個人喺愛情場上？」

「咦～聽住先啦～」岑諾新企好起嚟，一下子就變高咗，「陣間又喺唔知邊日又話唔得要放棄。」

「唔會囉今次⋯！」我有啲心虛地講道，「我地講好咗㗎嘛～而且，你都想快啲重獲自由㗎嘛～」



「都係。」岑諾新毫不猶疑地回答

我伸手㩒一下鐘，因為下一站落車

車門打開，呢個站都多人落車，因為呢架車基本上一定會經過學校，亦好多我地學校嘅人搭呢架車番學，車一經過我地學校，乘客頓時都落咗一大堆

一落車，岑諾新行咗兩步後停低落嚟等埋我，好似已經習以為常一樣，拉起我嘅手就向前行

「喂喂～」忽然有人拍我膊頭，我回頭望向左邊，「早晨～」



原來係希童，希童佢好似係住呢度附近，唔洗搭車番學真係好呀～行兩步就番到嚟學校，放lunch仲可以番屋企食飯

「早晨！」我對希童微微一笑講道

「哦～好閃喔一大清早就～」希童望到我同岑諾新拖住手便倜侃起嚟

「咩呀⋯」我無奈一笑，「你今日咁早嘅？你平時都冇咁早番嚟㗎？」

「今日早會我要上台分享呀～」希童笑笑口地講道，「Miss叫我早啲番嚟。」

「哦～咁你陣間加油啦～我一定會打起十二分精神聽你分享！」我替希童加油，因為感覺佢好似有啲緊張

「多謝你喎～」希童開心地笑了笑，「我行先啦～唔做電燈膽啦～」

希童細細聲地對我講道，然後望咗岑諾新一眼之後望向我，朝我單一單眼



「真係呀⋯」我望住希童一個人小急步行喺我前面，沒好笑地笑道

「你要放低嘅人喺前面。」岑諾新忽然間講道

我望一望岑諾新，然後望向正前方，果然見到張景彥嘅身影

「哦⋯」我嘗試令自己平靜落嚟

就算係望住佢嘅背影都唔會有好大反應，所以，先要習慣一下當有人提起佢或者我見到佢嘅時候唔會有好大嘅反應

「哦～好似真係好有決心咁喎～」岑諾新望我一眼，輕輕一笑

「當然！」我一臉自信地望向岑諾新，「我決定咗㗎嘛！當然要做到⋯！」



岑諾新笑咗一笑，佢一定係睇死我又做唔到，我先唔會比佢睇死

「我要好好咁練習一下，等自己就算見到佢迎面行過嚟都好都唔會避。」我對岑諾新講道，「我都要好似你一樣自然呀～」

「都話我冇自然。」岑諾新沒好氣地笑道

⋯

「呵～欠⋯」我不禁打咗個喊露

點算⋯琴晚就應該早啲瞓啦～搞到宜家上個堂都不斷打喊露

我下意識望向其他地方，目光落喺坐喺近門口嗰邊第二行嘅岑諾新，佢坐尾二，後面係楊朗然

岑諾新托住頭拎住筆聽書，一臉專心



講真呀⋯佢喺學校同喺我面前係真係兩個人嚟，完全係⋯

喺學校嘅佢開朗又陽光，笑得開心；喺我面前嘅佢冷淡到死，佢肯答我問題真係要多謝佢，笑都唔會笑多兩下，如果我見到佢喺我面前笑嘅話，咁應該係我好彩

不過，冇感覺就係冇感覺，喺人前嘅偽裝都已經習慣

一齊嘅原因，我地都唔太知，好似冥冥之中自有主宰一樣⋯算啦算啦，反正我地都知道事實，反正最後一定會分手

「呵～欠⋯」我耷低頭望番自己本書，又打咗個喊露

拜托快啲放飯，我想瞓覺，唔放飯，放個小息都好呀

「阿sir好似講緊下星期個測驗會考啲咩⋯」我托住頭，一臉頹廢地聽阿sir講嘢



下個星期又測驗啦⋯今年真係好麻煩，成日都有測驗，一個月至少有3次測驗，你話攰唔攰？

「你地記得溫書呀！唔好唔溫書，我地班嘅合格率要keep住喺9成呀！」阿sir一臉自豪地講道

因為係佢教嘅一班，其他班嘅合格率得7成幾，而我地班嘅合格率則一定高於8成，都難怪阿sir咁緊張咁自豪嘅




IG Link: https://www.instagram.com/nd_cotttoncandy/?hl=zh-tw