［愛情純愛］既然忘記唔到佢，不如試下中意我⋯？: 29. 才不過分

我望向岑諾新，佢應該見到我send嘅message，佢緩緩企起身走向我，楊朗然一臉疑惑咁望住佢行過嚟

「講啦，咩創舉？」岑諾新坐喺我前面嘅座位

我勾勾手指，岑諾新朝我湊近，我細細聲地喺佢耳邊講出啱啱嘅事

「係唔係創舉先？」我笑着問道，「係唔係先？」

「對你嚟講又真係創舉嚟嘅⋯」岑諾新淡淡地講道，然後敷衍地拍咗兩下手，「拍兩下手比你。」



「我都算踏出咗一步呀！唔係咩？」我理直氣壯地問道

我可以做到咁樣我已經好勁㗎啦！我覺得⋯但係總好過見到佢仲要畏首畏尾咁呀～

「但會唔會係你太眼瞓，所以先會咁？」岑諾新托住腮問道

「應該唔會掛⋯」我遲疑地搖搖頭，「唔會嘅～不過你講起眼瞓，我今日放學番到屋企之後一定一定要瞓晏覺！」

「你唔落去買罐咖啡定住先？先上咗兩堂。」岑諾新瞄咗我一眼，然後又望番過去走廊嗰邊



「唔啦⋯唔想落去，陣間食飯先再算⋯」我伏低喺枱上，倦意湧出，「我都係有啲眼瞓⋯」

「得番5分鐘。」岑諾新默默地講完後便企起身行番埋位

我微微抬頭，望咗岑諾新一眼後又耷低頭小睡片刻，就算係5分鐘，我都要恰一下，如果唔係接住落嚟嘅堂我就真係會捱唔住

⋯

到咗Lunchtime



「我同佢地食飯。」岑諾新對我講道

佢都已經執好嘢準備同楊朗然佢地幾個一齊出去食飯，只係循例講聲比我知咁解

我同岑諾新一個星期應該得一至兩日會一齊食飯，唔洗覺得驚訝，因為我地都冇咩所謂，反正放學都會一齊走

「今日食咩呀？」我走向詠妍佢地幾個

「你今日同我地一齊食？」詠妍疑惑地望住我，「唔同岑諾新一齊食啦？」

「唔啦～佢同楊朗然佢地一齊食。」我望向課室門口，岑諾新佢地已經一齊出咗課室

「今日食米線好唔好？」樂恩提議道

「哦好呀～」希童迅速地和議道，「詠妍你地有冇咩想食？」



「米線囉，我都冇咩所謂。」詠妍聳肩，然後將銀包放喺裙袋中

「行啦！」我笑一笑，然後同佢地一齊離開課室出去食飯

身旁有好多我地學校嘅人行過，我悄然地留意身邊走過嘅人，好似尋找緊某一個人嘅身影一樣，努力地喺人群人尋找着

每一個經過嘅人，我都會望一望，其實冇咁嘅必要，因為其實望一眼就可以認得出佢

呀⋯我到底做緊啲咩？

我努力地想放低佢嘅同時，又努力地喺人海中尋找佢嘅身影，自相矛盾

或者得唔到嘅，真係特別吸引人



我地四個行到去食米線嘅地方，入去搵位坐低，我隔離坐着詠妍

點完餐嘅我地默默地睇手機，反正都係要等，而且就算冇嘢講都唔會覺得尷尬

「嘩好靚仔⋯！」樂恩望住希童嘅手機螢幕掩着嘴講道，「高大又靚仔！呢個腹肌⋯！」

「咩呀咩呀？」佢兩個嘅對話瞬間引起我同詠妍嘅興趣，「睇緊咩呀？」

「睇下！」希童將手機擰過嚟比我同詠妍睇

「Oh my god⋯！」我掩住嘴，但嘴角認唔住上揚起嚟，「佢個鎖骨⋯！」

我挽住詠妍嘅手臂，詠妍望住手機螢幕都忍唔住笑咗出嚟

「嘩唔得呀⋯！」詠妍嘅耳根紅起嚟，掩住嘴移開視線，「好靚仔⋯！」



冷酷嘅表情、棱角分明嘅臉型、帥氣嘅外表、抬起下巴而露出嘅頸部線條、因裇衫而若隱若現嘅腹肌、剛好嘅肌肉⋯

女仔都會因為呢啲類型而心動⋯！？

「後面仲有⋯！」希童嘅手將第一張滑走，然後又忍唔住笑住咁遞比我地睇，「好型⋯！」

「佢著西裝係咩事？點解型到咁⋯！？」我望住相中人不禁驚嘆道

「好靚仔呀咩事！？」詠妍用兩隻手指將張相放大嚟睇，「share比我地！」

我同詠妍收到希童share比我地嘅profile後即刻打開嚟睇

果然同朋友一齊真係特別開心，有人一齊癲一齊笑



「蔣倩盈你笑到面都紅晒！」樂恩望住我講道

「笑到好熱⋯」我用手為自己嘅臉頰潑涼，「要除冷衫⋯」

「你好過份呀蔣倩盈！」樂恩笑住咁講道，「比岑諾新知道你睇佢以外嘅男仔，仲要笑得咁開心嘅話你就知死呀～」

「唔會囉～」我笑住搖搖頭，同詠妍一齊睇得開心

手機忽然一震，上方彈出一個通知話希童喺story @咗我




IG Link: https://www.instagram.com/nd_cotttoncandy/?hl=zh-tw