［愛情純愛］既然忘記唔到佢，不如試下中意我⋯？: 35. 提議

「至少唔再中意佢掛⋯愛情角度上。」岑諾新好似早就知道我會問一樣，瞬間回答我，「唔係要討厭佢，而係唔再比佢影響到我嘅心情。」

唔想比佢影響到心情⋯同我嘅想法有啲相似，唔再受到佢嘅影響，先算係真正嘅放低

「你有冇諗過隨便搵個人拍拖？」我問道

「宜家。」岑諾新望住我，輕輕一笑回答，「只不過我地都經歷咗相似嘅嘢。」

同我一齊都算係「隨便搵個人拍拖」嘅～只要佢中意嘅唔係我，咁我對佢嚟講都只係一個水泡之類嘅嘢



「我地不如試下。」我直白地對佢講道，「試下一齊。」

若然我支支吾吾嘅話，會顯得我好似有私心，顯得我好唔自然，所以冇婉轉嘅意義

而我咁樣問佢，我知佢明我講咩，我亦冇解釋比佢知嘅打算

「你講嘅係邊種一齊⋯？」岑諾新問道，大概只係想確係一下佢嘅理解同我想講嘅嘢一唔一致

「你諗嘅嗰種。」我望一望佢，又默默地移開視線，「最近睇到個po，話放低一個人得兩種方法，一係時間，一係新歡。」



「你想我做你嘅新歡？」岑諾新好快就明白我想表達啲咩

通常講呢啲嘢嘅時候，唔係都會覺得尷尬之類㗎咩？但我同佢之間，好似一啲都唔尷尬，就好似普通傾計咁

「點解講到好似我單戀你咁⋯」我對佢啲表達方式有啲無奈，「係試下中意對方，唔係想你做我嘅新歡之類⋯」

岑諾新一聲不吭，搞到我莫名其妙地有啲尷尬，明明我只係講出一個提議，但就好似講咗啲咩驚天大秘密一樣⋯

我偷偷地瞄咗岑諾新一眼，岑諾新似乎諗緊我啱啱講嘅嘢，我有啲唔自在



沿路行番屋企，我都冇再開過口講嘢，只係為咗唔好令氣氛變得更加尷尬

「呃，我到啦。」我企喺大堂外，雖然心裏覺得有啲尷尬，不過我都係淡定地開口，「啱啱我講嘅嘢，你唔洗咁在意，只係一個我咁啱諗到嘅提議嚟，你唔想嘅話都唔緊要，當我冇提過就得。」

岑諾新冇出聲，但點一點頭

呀，果然有啲尷尬⋯

⋯

今日同平時同樣嘅時間出門口，行同一條路去巴士站搭車

琴日番到屋企之後，完全冇同岑諾新WhatsApp，係安靜嘅一日，仲有啲尷尬；佢拒絕我真係唔係問題，但見佢選擇沉默，搞到我都唔知點好

我就嚟行到巴士站嘅時候，見到岑諾新，呀⋯尷尬啦今次⋯



巴士剛好到達，停低開門，排隊嘅人開始向前行

「我唔同佢打招呼嘅話會唔會顯得我好奇怪⋯？」我望住佢跟住條隊行上巴士

我小跑起嚟跑向巴士，岑諾新踏上巴士，企喺拍卡位嘅時候，忽然朝車窗望去，佢見到我⋯！

「呀⋯尷尬⋯」我喺心中再次講道

我跟隨住隊尾上車，從裙袋中拎出八達通拍卡，然後帶着一顆尷尬嘅心行到去岑諾新企嘅位置：又係嗰個輪椅位，背住落車門企

「早晨⋯」我行到岑諾新嘅面前，同平時一樣

「早晨。」岑諾新直勾勾地望住我講道



我完全唔知可以講啲咩好，總覺得岑諾新今日對我嘅態度比平時更加冷淡

我悄悄地抬眼，打算偷瞄岑諾新一眼，但當我望到岑諾新嘅時候，發現佢一臉冷漠咁望住我

呀⋯果然係我琴日咁樣講嘢太奇怪⋯突然間提出要一齊之類，搞到氣氛尷尬啦！

落咗車之後，我同佢都好似平時一樣拖住手，但我地一直都冇講過嘢

詠妍，最衰就係你⋯！

我連上堂嘅時候都唔敢望向岑諾新，心入面尷尬到咁樣⋯

小息嘅時候，我一個人坐喺位，將啱啱上堂老師喺黑板寫嘅筆記抄番喺書入面，因為啱啱抄唔切

「你仲抄緊呀？」詠妍行到我前面嘅座位坐低望坐我抄筆記



「嗯⋯」我專心地拎住筆抄筆記

「係呢～你地點呀⋯？」詠妍借意問道，喺佢講「係呢～」嘅時候，我就已經知道佢想問啲咩，「你考慮成點呀？」

「多得你條屎橋，我同佢宜家尷尬到一個點⋯」我無奈地瞄咗詠妍一眼，「我嗰日放學同佢講完，佢冇答我，然後我地就冇再講過嘢，今日我地淨係講咗句早晨咋⋯」

「你考慮好啦⋯！」詠妍一臉驚訝，佢仲完全無視咗我講嘅嘢

「嗯⋯」我望咗佢一眼，無奈地點頭，「激死我⋯！」

我企起身打算去開locker，一企起身，岑諾新就企喺我身旁

「哇⋯！」我嚇咗一跳



佢幾時行過嚟㗎？我完全冇留意到⋯！




IG Link: https://www.instagram.com/nd_cotttoncandy/?hl=zh-tw