［愛情純愛］既然忘記唔到佢，不如試下中意我⋯？: 73. 香水

「佢以前，都係咁樣對孫慧伶⋯」喺我嘅腦海中浮現出呢個想法，「佢其實，未放低係唔係⋯」

「你做咩呆咗？」岑諾新緊握咗我隻手一下

「呀？冇嘢呀～」我回過神來對佢微微一笑，我行到佢面前耷低頭，將頭埋喺佢嘅頸窩之中，「多謝你⋯」

「唔洗，你開心就得。」岑諾新輕輕地攬住我，「你覺得開心滿意就得。」

「點會唔滿意唔開心？」我不解地問道，手輕輕地放喺佢嘅腰間，「我超開心呀～以前都冇試過收到surprise⋯」



我以前，只敢偷偷幻想一下，但我知道張景彥唔會咁做，我都唔敢期望啲咩；但我從來都冇諗過，我想要嘅小驚喜，真係會有實現嘅一日

「比個100分你～」我笑一笑然後豎起大拇指

我心裏嘅開心久久不能平伏，或者係因為有一個人會將我呢啲咁細微嘅事睇喺眼中記喺心中

曾經只敢一個人偷偷幻想嘅事，今日發生啦，而且係第二次發生⋯

「偷笑啲咩？」岑諾新問我，我望向佢嘅時候見到佢微微側着頭望住



「冇咩～開心呀就係～」我自然地對佢笑道

「咁小事你就開心成咁？」岑諾新嘅笑容淡淡的

「可能對你嚟講係小事，但對我嚟講係好大件事嚟！好值得開心～」我笑了笑又講道

岑諾新望住我，然後佢都笑了笑，唔知道佢笑容嘅背後意思係咩呢⋯但對我嚟講已經好開心

⋯



我地行到傍晚嘅時候就起行番屋企，岑諾新同我一齊行到番去屋企樓下

「我到啦～我番去啦～聽日見～」我對岑諾新笑着講道

「嗯。」岑諾新點點頭

我企喺原地冇轉身走，我望住岑諾新，佢亦望住我，我微微側一側頭，低頭望一望佢嘅手

「我番去啦⋯」我拉一拉佢嘅衫袖，「真係番去啦⋯！」

「嗯，拜拜。」岑諾新耷低頭微微一笑後點頭講道

「我真係番去㗎啦⋯！」我微微側身，但手仍然拉住佢嘅衫袖

「嗯，拜拜，番去啦。」岑諾新點點頭，微微抬一抬下巴



「我番去啦！」我心裏不悅地鬆手然後轉身，細細聲地哼咗一聲

X⋯X⋯X

「喂⋯」我伸出右手拉住蔣倩盈嘅左手，將佢嘅手向右邊拉，佢轉咗180度面向住我，「做咩扁嘴？啱啱仲好開心㗎？」

「冇扁嘴⋯」蔣倩盈口不對心地講道，明明就扁住嘴都話冇，「我番屋企啦！」

「等陣先。」我捉住佢嘅手腕朝自己嘅方向拉咗一下，佢向前行咗一步，我將佢輕輕地攬到懷中，「今日我地都未攬。」

「你知我地未攬㗎咩⋯」蔣倩盈細細地咁抱怨一樣

扁起嘴嘅模樣顯得佢格外可愛，我覺得撒嬌嘅佢特別可愛，有種睇唔厭嘅感覺



我摸摸佢頭，佢微微鼓着兩泡腮抬起頭望我，但過咗兩秒之後，佢嘅臉上掛上甜美嘅笑容

「你想攬嘅話唔主動攬我？」我不禁問道

「我有主動呀⋯！」蔣倩盈一臉認真咁望住我

「主動咁拉住我嘅衫袖就有！」我無奈地笑咗一笑

「都算有主動⋯」蔣倩盈嘅語氣夾雜咗少少嗲，佢將頭靠喺我嘅頸窩，然後蹭咗兩下

就喺佢喺我頸上蹭嘅同時，一股電流喺我身體流過，心臟用力地緊縮咗一下

「唔好再蹭啦⋯！」我縮咗一下

「好啦～」蔣倩盈抬起頭望住我微微一笑，佢緩緩地鬆開手，「咁我，番去啦～」



「嗯，拜拜。」我點點頭然後鬆手，望住佢轉身帶着小跳步朝住大堂行去

佢喺拉門行入大堂前一刻回頭望咗我一眼，對我微微一笑

見到佢入咗大堂之後我先轉身走，我抬起頭望向天空，今日嘅天空好清

同蔣倩盈一齊，似乎可以感受到好多冇感受過嘅嘢，特別係嗰種「我嘅付出係有回報」嘅感覺

如果問我係唔係因為想佢中意我所以先咁做嘅話⋯呢個我唔否認，但只係其中一個原因，另一個原因好簡單，但套喺我地身上會有啲難以言喻嘅感覺

喺我決定要偷偷book位嘅時候、喺我偷偷地去買戲飛嘅時候，我到底，諗緊啲咩⋯？

「我想見到佢開心，見到佢嘅笑容。」我喺心中講道，「而且佢嘅撒嬌，令人有啲上癮⋯」



一切都改變緊⋯

「哈啾⋯」我用手掩住口鼻打咗個噴嚏

我嘅衫䄂一湊近鼻邊就已經聞到上面有淡淡嘅香水味

係佢身上嘅香水味，好淡嘅味道，但同佢好夾，一樣有種柔弱嘅感覺




IG Link: https://www.instagram.com/nd_cotttoncandy/?hl=zh-tw